УФ-м и Лъэпкъ гвардие и ГъэIорышIапIэу АР-м щыIэм 2022-рэ илъэсым Iоф зэришIагъэм изэфэхьысыжьхэм афэгъэхьыгъэ брифингэу зэхищагъэм хэлэжьагъэх ГъэIорышIапIэм ипащэу, полицием игенерал-майорэу Олег Якушевыр, вневедомственнэ ухъумэным ипащэу Андрей Власовыр, лицензионнэ-Iизын IофшIэнымкIэ отделым ипащэу Игорь Нечаевыр.

О. Якушевым пэублэм къызэриIуагъэмкIэ, 2022-рэ илъэсым Лъэпкъ гвардием икъулыкъушIэхэм анахьэу анаIэ зытырагъэтыгъэр къэралыгъо ыкIи общественнэ щынэгъончъэныр, цIыфхэм яфитыныгъэхэр ыкIи яшъхьафитыныгъэ къэухъумэ­гъэн­хэр ары. ЩынэгъончъэнымкIэ федеральнэ къулыкъум и ГъэIорышIапIэу АР-м щыIэр, АР-м хэгъэгу кIоцI IофхэмкIэ и Министерствэ, АР-м и Прокуратурэ, Следственнэ комитетым иследственнэ ГъэIорышIапIэ, УФ-м ошIэ-дэмышIэ IофхэмкIэ и Министерствэ и ГъэIорышIэпIэ шъхьаIэу АР-м щыIэр зэгъусэхэу общественнэ-политическэ ыкIи мэхьанэшхо зиIэ Iофтхьабзэхэр зэхащэх.

2022-рэ илъэсым цIыф зэрымысэу къэзыбыбыхьэрэ пкъыгъор къызыфагъэфедэзэ Iоф­тхьабзэхэр зэхащагъэх. Общественнэ рэхьатныгъэр ыкIи щынэгъончъагъэр къэухъумэ­гъэн­хэмкIэ операции 8 отделым зэхищагъ, къулыкъу-дзэ быбыни 115-рэ рагъэкIокIыгъ. Ошъогум щызэхащэгъэ Iофтхьабзэхэм адакIоу АР-м и Къэралыгъо автоинспекцие икъулыкъушIэхэр ягъусэхэу рэхьатныгъэр къэухъу­мэгъэнымкIэ ыкIи гъогурыкIоныр щынэгъончъэу щытынымкIэ ад­министративнэ хэукъоныгъэ 13 тишъолъыр къыщыхагъэщыгъ.

Росгвардием иподразделениехэу ОМОН-м ыкIи СОБР-м якъулыкъушIэхэм хэушъхьафыкIыгъэ Iофтхьабзэу рагъэкIокIыгъэхэм къакIэлъыкIоу бзэджэшIагъэ зэрахьагъэу зэгуцэфэ­хэрэ нэбгырэ 26-рэ къаубы­тыгъ, Iэши 6, наркотик зыхэлъ пкъыгъо грамми 5, ахъщэу сомэ мин 400 ыкIи доллар 3500-рэ къапкъырахыгъэх.

А. Власовым къызэриIуагъэм­кIэ, республикэм ивневедомственнэ къулыкъу шъолъырым ит псэолъэ 1313-рэ къегъэгъунэ. 2020-рэ илъэсыр къызихьагъэм щегъэжьагъэу общественнэ рэ­хьатныгъэр къэухъумэгъэным, щынэгъончъэныр гъэлъэшыгъэным афэшI ГъэIорышIапIэм иподразделение дэкIыгъо 756-рэ иIагъ, хэбзэукъоныгъи 102-рэ къызэтырагъэуцуагъ, ахэм аха­хьэ физическэ ыкIи юридическэ лицэхэм алъэныкъокIэ къагъэгъунэрэ амыгъэкощырэ мылъку 36-рэ. 2022-рэ илъэсым имэзэ 11 хабзэр аукъуагъэу нэбгыри 195-рэ къыхагъэщыгъ, ахэм ащыщэу 8-мэ алъыхъущтыгъэх.

Iашэр къызэрэрагъэкIокIырэм зэрэлъыплъэхэрэм, унэе мылъкур къызэрагъэгъунэрэм япхыгъэу къэгущыIагъ И. Нечаевыр. Ащ къызэриIуагъэмкIэ, Iашэр зыгъэфедэн фитэу тиреспуб­ликэкIэ Iизын къызэратыгъэхэм япчъагъэ нэбгырэ 12099-рэ мэхъу, ахэм Iэшэ мин 22-м ехъу аIэкIэлъ. Мы лъэныкъомкIэ щыIэ хэбзэгъэуцугъэр зыукъуагъэхэм Iэшэ 518-рэ аIахыгъ.

ГъэIорышIапIэм ипащэу Олег Якушевым кIэухым къызэриIуа­гъэмкIэ, 2022-рэ илъэсымкIэ пшъэрылъхэр гъэцэкIагъэхэ хъугъэ.

Республикэм ищыIэкIэ-псэукIэ нахьышIоу гъэпсыгъэнымкIэ Лъэпкъ гвардием мэхьанэшхо зэриIэм щэч хэлъэп. Арышъ, къулыкъум шIуагъэ къытэу иIоф­шIэн зэхищэным, цIыфхэм IэпыIэгъу афэхъуным, ахэр къыухъумэнхэм тапэкIи анаIэ зэрэтырагъэтыщтыр ГъэIорышIапIэм ипащэ къыIуагъ.

КIАРЭ Фатим.