Щылэ мазэм и 1-р — ИлъэсыкI
Адыгэ Республикэм щыпсэухэу лъытэныгъэ зыфэтшIыхэрэр! ТичIыпIэгъу лъапIэхэр! 2023-рэ илъэсыкIэу къихьэрэмкIэ тышъуфэгушIо!
Мы хъугъэ-шIэгъэ гушIуагъом ехъулIэу кIэуххэр зэфэтэхьысыжьых, гухэлъыкIэхэр итэхъухьэх, нахьышIум ылъэныкъокIэ гугъапIэхэр тэшIых.
ИкIырэ илъэсэу тарихъым хахьэрэр хъугъэ-шIэгъэ зэфэшъхьафхэмкIэ ыкIи пшъэдэкIыжь зыпылъ унашъохэмкIэ баигъ, ахэм яшIуагъэкIэ дунэе гъэпсыкIэм исистемэ зэхъокIыныгъэ инхэр фэхъугъэх, «многополярность» зыфаIорэм къыфэдгъэзэжьыгъ, ащ дакIоу Урысыер нахь пытэ хъугъэ.
2022-рэ илъэсыр Адыгеим къэралыгъо гъэпсыкIэ зиIэр илъэси 100 зэрэхъугъэм ихэгъэунэфыкIын епхыгъэу кIуагъэ. ТишъолъыркIэ мэхьанэшхо зиIэ мэфэкI мафэм фэгъэхьыгъэу Iофтхьэбзэ зэфэшъхьафхэр зэхэтщагъэх, еджапIэхэр, медицинэ учреждениехэр тшIыгъэх, модельнэ тхылъеджапIэхэр дгъэпсыгъэх, культурэм иучреждениехэр дгъэцэкIэжьыгъэх ыкIи кIэу тшIыгъэх, общественнэ чIыпIэхэр зэтедгъэпсыхьагъэх, инфраструктурэм ипроект инхэр дгъэцэкIагъэх. Джащ фэдэу IофшIэпIэ чIыпIакIэхэр гъэпсыгъэнхэмкIэ, псэупIэхэм язэгъэгъотын епхыгъэ гумэкIыгъохэр дэгъэзыжьыгъэнхэмкIэ, Адыгеим ипсэупIэхэм гъэстыныпхъэ шхъуантIэр алъыгъэIэсыгъэнымкIэ республикэм бэ щызэшIуахыгъэр.
Республикэм хэхъоныгъэхэр ышIынхэм фытегъэпсыхьэгъэ Iофтхьабзэхэр гъэцэкIэгъэнхэм, мыщ щыпсэухэрэм ящыIакIэ нахьышIу ыкIи Iэрыфэгъу шIыгъэным, илъэс къэс тишъолъыр нахь кIэракIэ хъуным тапэкIи тыпылъыщт.
ИкIырэ илъэсым игъэхъагъэхэр къихьащт 2023-рэ илъэсым зэрэщылъыкIотэщтхэм тицыхьэ телъ, гухэлъэу, мурадэу тиIэхэр щыпхырыщыгъэнхэм ар фэIорышIэщт. ТичIыпIэгъу лъапIэхэр, илъэсыкIэу къихьэрэм псауныгъэ пытэ шъуиIэнэу, мамырныгъэ, гушIуагъо къышъуфихьынэу шъуфэтэIо. 2023-р икIырэ илъэсым нахь дэгъунэу, Адыгеим ыкIи Урысыем хэхъоныгъэхэр езыгъэшIыщт гъэхъэгъакIэхэм шъуафэкIонэу тышъуфэлъаIо.
Адыгэ Республикэм и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу КъумпIыл Мурат
Адыгэ Республикэм и Къэралыгъо Совет – Хасэм и Тхьаматэу Владимир Нарожнэр