Хабзэ хъугъэу, хэтрэ цIыфи илъэсыкIэм гугъэхэр репхых, ащ пае фэIо-фашIэхэр игъэкIотыгъэхэу зэшIуехых.

Адыгэхэм гъэтхэ илъэсыкIэм ипэгъо­кIэу, ижъыкIэ зэрашIыщтыгъэхэм фэдэу, ящагухэр агъэкъабзэх, унэхэр зэIахых, шхыныгъо зэмлIэужыгъохэр аупщэры­хьэх, щыгъыныкIэхэмкIэ загъэкIэракIэ, шIухьафтын ашIыщтхэр ащэфых.

Нахьыпэм илъэсыкIэм ехъулIэу Iофыгъо зэфэшъхьафыбэ агъэцакIэщтыгъ, ау ахэм ащыщэу макIэ тишэн-хабзэмэ къахэнагъэхэр. Тилъэхъанэ джыри загъо­рэ илъэсыкIэр къызыщихьащт пчыхьэм, тыгъэр къомыхьэзэ унэ Iупэм, щагум дэт псэуалъэхэм япчъэIупэхэм, къэлэпчъэ дэхьэгъухэм бысымгуащэхэм яжьэ аIуатакъоу мэхъу. Ащи мэхьэнэ гъэнэфагъэ иI. ИлъэсыкIэ чэщым Собай Iуашъхьэ удхэр щызэрэугъоихэу аIо ыкIи илъэсым шIурэ ерэ ашIэщтхэр щаухэсы. ЗэбгрыбыбыкIыжьынхэ зыхъукIэ, шIуми, еми агъэнэфагъэмэ ащыщхэр яIалъмэкъ­хэм аралъхьэхэшъ, ащ иIабэхэзэ, къырахырэр зыфэдэр амышIэу, зышъхьарыбыбыкIырэ чылэм щырадзыхыщтыгъэ. Еу къырадзырэр щагумэ, унэмэ анэмы­сы­нэу, къямыгоонэу ары яжьэхэр зыфыратэкъущтыгъэр.

Чэщым илъэсыкIэр къызэрихьагъэм лъыпытэу, «цIыф бзаджэхэр» агъэщтэнхэу шхончхэмкIэ маох, мэшIотопхэр къагъаох. Пасэм онджэкъым щэбзащэкIэ иукIыщтыгъэх.

ИлъэсыкIэр къызыщихьащт пчыхьэм анахьыкIэу унагъом исым чыжъые иупкIыгъакIэ ратыти, цIыкIуи, ини унагъом исхэм зэкIэхэм щэ атырагъэуIэщтыгъ. «Мыр — сицу, мыр — сицу, мыр — сицу», ыIозэ. Ащ имэхьанэщтыгъэр илъэсым къыкIоцI унагъом зы нэбгыри хэмыфыкъукIэу адрэ илъэсым нэс рихыныр ары.

«ИлъэсыкIэм узэрэпэгъокIырэм фэдэу илъэсыр ипхыщт» аIо. Арышъ, илъэсэу тызыхахьэрэм ехъулIэу тихэку ис адыгэхэми къытхэс лъэпкъыбэхэми Тхьэм тафелъэIу:

Тыдрэ чIыпIи щыпсэурэ адыгэхэм Насыпыр къытэбэкIэу, узи, бзаджи къытщаухьэу, Тызэрыс хэгъэгумэ пый къафыкъомыкIэу, Пый къыкъокIыгъэми, тинасып те­кIоу, Мамыр щыIэкIэ тхъагъо ЗэкIэхэми Тхьэм илъэсыкIэм къытфехь.

Тэу Аслъан.