Урысыем и МЧС и ГъэIорышIэпIэ шъхьаIэу Адыгэ Респуб­ликэм щыIэм тыгъуасэ щыкIогъэ зэIукIэр зыфэгъэхьыгъагъэр къэгъэнэжьакIохэм я Маф. АР-м и ЛIышъхьэу КъумпIыл Мурат ащ хэлэжьагъ.

ЗэIукIэр рагъэжьэным ыпэкIэ Урысыем и МЧС и ГъэIорышIапIэу Адыгэ Республикэм щыIэм 2022-рэ илъэсым къыIэкIэхьэгъэ мэшIогъэкIосэ ыкIи автомобиль техникэм нэIуасэ фашIыгъэх.

КъумпIыл Мурат зэIукIэм къыщиIуагъ гуетыныгъэ ахэлъэу ыкIи пшъэдэкIыжь инэу ахьырэр къагурыIозэ МЧС-м иIофы­шIэхэм япшъэрылъхэр зэрагъэцакIэхэрэм пае зэрафэразэр. Ащ дакIоу мэшIогъэ­кIуасэхэмрэ цIыфхэм якъэгъэнэжьын фэгъэзагъэхэмрэ ренэу япшъэрылъхэр зэрифэшъуашэу зэрагъэцакIэхэрэр къы­хигъэщыгъ.

«IэпыIэгъур ятыгъэнымкIэ шъо ренэу апэрэхэм шъуащыщ. ШъузэгурыIозэ шъузэдэлажьэ, шъуишIэныгъэхэм, шъуи­ухьазырыныгъэ зэрахэжъугъэхъощтым ренэу шъунаIэ тет. НэмыкIхэр къэжъугъэнэжьыхэзэ, шъо шъушъхьэ къырыкIощтым шъуемыгупшысэу блэнагъэ зешъо­хьэ. ШъуиIофшIэн ренэу псэемыблэжьыныгъэ ищыкIагъ. Iофэу шъузфэгъэзагъэм шъуфэшъыпкъэу шъуипшъэрылъхэр шъогъэцакIэх, джащ пае Адыгеим щыпсэухэрэм лъытэныгъэшхо къышъуфашIы», — къыIуагъ КумпIыл Мурат.

Урысыем и Президентэу Владимир Путиным къулыкъум ыпашъхьэкIэ пшъэ­рылъэу къыгъэуцухэрэр АР-м и ЛIышъхьэ агу къыгъэкIыжьыгъэх. Ахэр зэпхыгъэхэр МЧС-м иIофышIэхэм яIэпэIэсэны­гъэ хэгъэхъогъэныр, джырэ Iэмэ-псымэхэмрэ цифрэ технологиехэмрэ нахь дэгъоу гъэфедэгъэнхэр ары.

«Адыгеим ащ фэдэ IофшIэныр щагъэ­цакIэ. ЦIыфхэм якъэгъэнэжьын ыкIи машIом зыкъымыштэным афэгъэзэгъэ подразделениехэм джырэ технологиехэр дэгъоу къызфагъэфедэх, техникэу ящыкIагъэр зэкIэ аIэкIэлъ. ТапэкIи ащ фэдэ IофшIэным зегъэушъомбгъугъэным мэхьанэшхо иI, — къыIуагъ КъумпIыл Мурат. — Непэ экономикэм, зекIоным зядгъэушъомбгъун, республикэм исоциальнэ ыкIи иинженер инфраструктурэ нахьышIу шIыгъэным тынаIэ атедгъэтын фае. А пстэури цIыфым ищыIакIэ на­хьышIу хъуныр ары зыфэлажьэрэр. ЗэкIэ псэуалъэхэр ошIэ-дэмышIагъэ зыхэлъ тхьамыкIагъохэмрэ авариехэмрэ ащыухъумэгъэнхэ фае. ГъэпсэфыпIэ чIыпIэу «Лэгъонакъэ» игъэпсынкIэ проектышхор пхыращы зыхъукIэ МЧС-м иамалхэри къызфагъэфедэщтых».

ИкIэухым щытхъуцIэхэр афагъэшъошагъэх. «Адыгэ Республикэм цIыфхэм якъэгъэнэжьынкIэ изаслуженнэ IофышI» зыфиIорэр фагъэшъошагъ Алексей Носковым. Джащ фэдэу Адыгэ Республикэм и ЛIышъхьэ и Рэзэныгъэ тхылъ, медалэу «Адыгэ Республикэм ия 100-рэ илъэс» зыфиIорэр, АР-м и Къэралыгъо Совет — Хасэм и Рэзэныгъэ тхылъ, ведомствэхэм ятынхэр анахь IофышIэ дэгъу­хэу къахэщыгъэхэм аратыгъэх.

Джащ фэдэу, МЧС-м емыпхыгъэхэми, ау чIыпIэ зэжъум лIыхъужъныгъэрэ теубытагъэрэ къызхэфагъэхэм, псым ытхьалэхэрэм якъэгъэнэжьынкIэ зышъ­хьа­мысыжьыгъэхэм тынхэр афагъэшъо­шагъэх. ГущыIэм пае, Урысыем и МЧС имедалэу «За спасение погибающих на водах» зыфиIорэр БжьэшIо Рустамрэ Хъунэго Наурызэрэ аратыгъ. Бэдзэо­гъум и 23-м Тэхъутэмыкъое районым игъогу къытехъухьэгъэ тхьамыкIагъом – псыр зыдэт дэтIыкIыгъэм хэфэгъэ автомобилым цIыфхэр ахэм къырахыжьыгъэх. Ащ фэдэ медаль ратыгъ спецназовцэу Александр Якимцовыми — жъоныгъуа­кIэм и 29-м псэупIэу Дахъо дэжь псы­хъом хэфэгъэ бзылъфыгъэр ащ къы­гъэнэжьыгъ.

АР-м и ЛIышъхьэ ипресс-къулыкъу