2021 — 2022-рэ илъэс еджэгъум изэфэхьысыжьхэмкIэ Адыгеим щыпсэу­рэ ныбжьыкIэхэу лъэныкъо зэфэшъхьафхэмкIэ сэнаущыгъэ зыхэлъхэу къыхагъэщыгъэхэм республикэ естественнэ-хьисап еджапIэм тыгъэгъазэм и 29-м щафэгушIуагъэх.

Джащ фэдэу мы мафэм республикэм игъэсэныгъэ организациехэм якIэлэегъа­джэхэу Урысые гъэсэныгъэ проектэу «Урок цифры» зыфиIорэм къыщыхэщыгъэхэми просвещениемкIэ Министерствэм и Рэзэныгъэ тхылъхэр аратыжьыгъэх.

Iофтхьабзэм хэлэжьагъэх АР-м гъэсэныгъэмрэ шIэныгъэмрэкIэ иминистрэу Евгений Лебедевыр, цифрэ шIыкIэм хэхъоныгъэхэр ышIынхэмкIэ, къэбарлъы­гъэIэс ыкIи телекоммуникационнэ технологиехэмкIэ министрэу Шыу Заурбек.

Евгений Лебедевым къэзэрэугъоигъэ­хэм шIуфэс гущыIэхэмкIэ закъыфигъэзагъ. Къахагъэщыгъэ кIэлэеджэкIуи 10-мэ ар къафэгушIуагъ, тапэкIи гъэхъагъэхэр ашIынхэу къафэлъэIуагъ.

Шыу Заурбек гущыIэр лъигъэкIотагъ.

— КъумпIыл Мурат цифрэ шIыкIэм тет экономикэм хэхъоныгъэхэр ышIынхэм мэхьанэшхо реты, ар зэрифэшъуашэу тишъолъыр щыгъэпсыгъэным ынаIэ тет. Джащ фэдэу мы Iофыр лъызыгъэкIотэщтхэу IэпэIэсэныгъэ зыхэлъ специалистхэр республикэм ищыкIагъэх, — къы­Iуагъ министрэм.

Нэужым зыщафэгушIохэрэ Iахьыр аублагъ.

«ШIэныгъэ-техническэ творчествэр ыкIи гъэсэныгъэ-ушэтын IофшIэныр» зыфиIорэ лъэныкъом зишIэныгъэхэмкIэ нахь къахэщыгъэхэр Мыекъуапэ дэт лицееу N 8-м чIэс Глеб Алиевыр, Нэшъу­къое гурыт еджапIэу N 8-р къэзыухыгъэ Бекух Бэллэ, Кощхьэблэ районым ит гурыт еджапIэу N 9-м щеджэрэ Владислав Гирянскэр, Мыекъопэ гимназиеу N 5-м икIэлэеджакIоу Алина Дрожжинар, Красногвардейскэ районым ит гимназиеу N 1-м щеджэрэ Дарья Ермаковар, Джэджэ районым ит гурыт еджапIэу N 7-м чIэс Александра Капустинар, къуа­джэу АдыгеякIэм дэт гурыт еджапIэм щеджэрэ Валерия Самарцевар, Мыекъо­пэ районым игъэсэныгъэ гупчэу N 1-м икIэлэеджакIоу Никита Стрекозовыр.

«Художественнэ творчествэмкIэ» Адыгэкъалэ иеджапIэу N 2-м ия 10-рэ класс ис Хэкужъ Анетэ къыхагъэщыгъ.

Спортым ылъэныкъокIэ Шэуджэн районым ит къуаджэу Мамхыгъэ игурыт еджапIэу N 4-м щеджэрэ Максим Гонскэр атекIуагъ.

РеспубликэмкIэ анахь къахэщыгъэ ныбжьыкIэхэм илъэс къэс ахъщэ шIухьафтынхэр ыкIи тын лъапIэхэр афагъэшъуа­шэх. Къэралыгъо программэу «Гъэсэныгъэм ихэхъоныгъ» зыфиIорэм ар къы­ды­хэлъытагъ. ШIухьафтын къызытефэхэ­рэр зэнэкъокъу шIыкIэм тетэу къыхахых.

Урысыем просвещениемкIэ и Министерствэ и Рэзэныгъэ тхылъхэр зыфагъэшъошэгъэ кIэлэегъэджэ 11-мэ ащыщых республикэ естественнэ-хьисап еджапIэм иIофышIэхэу Марат Алиевыр, Цундышк Вячеслав, ПсыIушъо Азэмат, Екатерина Мацола, Теуцожь районым ит къутырэу Шевченкэм икIэлэегъаджэу Хъут Эммэ, Мыекъуапэ илицееу N 19-м икIэлэегъа­джэу Елена Матвеевар, нэмыкIхэри.

Iэшъынэ Сусан. Сурэтыр: Iэшъынэ Аслъан.