Телерадиокомпаниеу «Адыгеим» ыгъэхьазырырэ къэтынэу «Бысымгуащ» зыфиIорэм и ИлъэсыкIэ къыдэкIыгъо «Адыгэ макъэм» иIофышIэу Iэшъынэ Сусанэ хэлэжьагъ.

Адрэ илъэсхэм афэмыдэу лъэныкъо зэфэшъхьафхэм ащылэжьэрэ журналистхэр къэтыным къыхагъэлэжьагъэх. Республикэ гъэзетхэу «Советскэ Адыгеир» загъэпсыгъэр илъэси 100 зэрэхъу­гъэм фэшI ащ ижурналистэу Юля Мельниковар, «Адыгэ макъэм» къи­хьащт илъэсым джащ фэдиз ныбжь иIэ зэрэхъу­щтым къыдыхэлъытагъэу Iэшъынэ Сусанэ, джащ фэдэу телерадиокомпанием иIофышIэу Татьяна Беловар мэфэкI къэтыным хэлэжьагъэх.

Ащ изэхэщакIохэм пшъэрылъэу яIагъэр зэнэкъокъуныгъэ ахэмылъэу Илъэ­сыкIэ Iанэм тырагъэуцощт шхыныгъо зэмылIэужыгъохэм яшIынкIэ бзылъфыгъэхэм яIэпэIэсэныгъэ къагъэлъэгъоныр ары.

МэфэкI Iанэм тебгъэуцон плъэкIыщт шхыныгъо зэмылIэужыгъохэр дахэу гъэкIэрэкIагъэхэу бысымгуащэхэм осэшI­хэм апагъохыгъэх. Iэшъынэ Сусанэ лъэпкъ шхыныгъоу лы упIагъэр ыупщэ­рыхьагъ.

— Адыгэ лъэпкъ шхыныгъохэр тэ лъытымыгъэкIуатэу, цIыфхэм ятымыгъэ­лъэгъоу, ахэр зэраупщэрыхьэхэрэр къыткIэхъухьэхэрэм амышIэ хъумэ, ти­шхыныгъохэм яшIыкIэхэр кIодыжьыщтых. Адыгэ шхыныгъом иIэшIугъэ зэлъашIэным пае джары лы упIагъэр сыупщэрыхьанэу къызкIыхэсхыгъэр, — еIо Сусанэ.

Т. Беловам чэт гъэжъагъэр щыпсыр игъусэу ыгъэхьазырыгъ. Юля Мельниковам пцэжъые плъыжьым ыкIи къэбым шхыныгъо гъэшIэгъонхэр ахишIыкIыгъэх.

МэфэкI къэтыным къырагъэблагъи орэд къыщиIуагъ УФ-м изаслуженнэ артисткэу Нэхэе Тамарэ.

Къэтыным непэ, тыгъэгъазэм и 30-м, сыхьатыр 9.30-м каналэу Урысыер-2-м шъущеплъын шъулъэкIыщт.

КIАРЭ Фатим.