Арышъ, зизакъохэм янасып къыкъокIыщт, унагъо зышIэн гухэлъ зиIэхэм ягъогу зэIухыгъэщт. Джащ фэдэу унэ зыщэфы зышIоигъохэми яIофхэр зэпыфэщтых. IофшIэнымкIэ ошIэ-дэмышIэ лъэгапIэхэр ­илъэсым къыздихьыщтхэп, ау нахьышIум фэкIорэ цIыфхэм пэрыохъу яIэщтэп. Мурадэу иIэм фэкIоныр зикIасэхэм тхьакIумкIыхьэр IэпыIэгъу къафэхъущт. 2023-рэ илъэсыр джащ фэдэу чэтыум иилъэсэу аIо. Китаибзэм мы псэушъхьитIум зы иероглиф зэряIэм ар къыхэкIыгъ. Янэша­нэхэмкIэ мыхэр зэфэдэх, тIури губзыгъэх, шIэныгъакIэ­хэм афэ­кIох, унагъом гупсэфыныгъэ илъыныр якIас.

МэфэкI шIыкIэм тетэу илъэсыкIэр къидгъэхьаныр шэнышIу тфэхъугъ. Сыдэущтэу мы илъэсыр къибгъахьэмэ на­хьы­шIуа? ТхьакIумкIыхьэм иилъэс сыд фэдэ нэшана иIэхэр?

Сыд фэдэ шIухьафтына яптымэ нахь дэгъур?

Сыдэущтэу илъэсыр къибгъахьэмэ нахь дэгъуа?

ТхьакIумкIыхьэм цIыфыбэ зыщызэрэугъоирэ чIыпIэхэр ыгу рихьыхэрэп. Арышъ, илъэсыкIэр унагъор е анахь бла­гъэхэр уигъусэу къибгъахьэмэ нахьышIоу алъытэ. ЦIыф зэ­хэхьэшхохэм илъэсым итамыгъэ агъэщтэн алъэкIыщт. Iанэм хэ­тэрыкIхэр бэу зыхэлъ шхынхэр ыкIи салатхэр тетмэ нахь дэгъу. ТхьакIумкIыхьэм хэшIыкIыгъэ темыгъэуцомэ нахьышIу. Чэтыум иилъэсэуи зэра­лъытэрэм къыхэкIыкIэ пцэжъые, чэтым хэшIыкIыгъэ шхынхэр тебгъэуцомэ дэгъоу алъытэ.

ИлъэсыкIэм пщыгъыщтыр шэкI шъабэмэ ахэшIыкIыгъэн фае. Лъэшэу гъэкIэрэкIагъэхэр илъэ­сым итамыгъэ икIасэхэп.

Хабзэ зэрэхъугъэу, илъэсыкIэм ехъулIэу унэхэри агъэкIэракIэх. ТхьакIумкIыхьэм къэ­бзэныгъэр икIас, унэр дэгъоу зэIыхыгъэн фае, къэгъагъэхэр итхэмэ дэгъоу алъытэ. Iанэм тхьакIумкIыхьэм истатуеткэ тет­мэ игуапэ хъущт, ахъщэ жъгъэ­им атесэу шъхьангъупчъа­шъхьэм тебгъэтIысхьэмэ, ахъщэ къыздихьынэу, ынэгу дэ­гъэзыягъэу ибгъэуцомэ, уна-гъом рэхьатныгъэ къырилъхьа­нэу, пхъыр (морковкэр) тхьа­кIумкIыхьэм ыIыгъымэ, биз­несымкIэ гъэхъагъэхэр яIэнхэу аст­­рологхэм алъытэ.

ИлъэсыкIэу къихьэрэр дэ­гъоу кIонэу шъуфаемэ:

— унэ зэIыхыгъэм къибгъэхьан фае;

— сыхьатыр 12 хъу зы­хъукIэ шъхьангъупчъэр е пчъэр Iупхын, илъэсым дэеу къыхэфагъэр ибгъэ­кIын, илъэсыкIэм къибгъэхьан фае;

— пчыхьэм мэстэ-Iуда­нэ къапштэ, удэжьы ­хъущтэп;

— уизакъоу илъэсыкIэр къимыгъахьэмэ на­хьышIу;

— чIыфэ птелъэу е о ­уичIыфэ ателъэу илъэсыкIэр къимыгъахьэмэ нахьышIу.

ШIухьафтынхэр

ИлъэсыкIэр къэсы зыхъукIэ, хабзэ зэрэхъугъэу, цIыфхэр зэфэгушIожьых, зэпэблагъэхэм шIухьафтынхэр зэратыжьых.

СыдигъокIи цIыфым къыфэфедэжьыщт, ищыкIэгъэщт шIу­хьафтыныр ары ептын фаер. ИлъэсыкIэр мэфэкI чэфэу зэрэщытым дакIоу шъэфыгъэ ыкIи удыгъэ нэшанэхэр зэрэхэлъхэр къыдэплъытэзэ шIухьафтынхэр къэбгъотынхэ фае. 2023-рэ илъэсэу къихьащтым итамыгъэ къемыкIущтхэр зыщыбгъэгъу­пшэнхэу щытэп. Астрологхэм зэралъытэрэмкIэ, илъэсыкIэ шIухьафтынэу хъызмэт Iэмэ­-псымэхэр, IэплъэкI, лъэпэд, сы­хьат, тхылъ, лэныстэ, шъэ­жъые, гъунджэ, шэф остыгъэхэр япты хъущтхэп.

Дунэе хъытыум къызэритырэмкIэ, мы аужырэ илъэсхэм цIыфхэм анахь къафэфедэрэ шIухьафтынэу алъытагъэр ахъщэр ары. Ащ ыуж мобильнэ телефонхэр ыкIи техникэ зэ­фэ­шъхьафхэр къэкIох. Мы илъэс­ми аущтэу щытынэу къытшIошIы. Ахъщэ зытынэу фэмыехэм ыкIи зэратыщтым ищыкIагъэр зымышIэхэрэм апае анахь хэкIыпIэ дэгъур сертификатыр ары. Шъыпкъэ, цIыфыр ахъщэм нахь щыгушIукIын ылъэкIыщт, ау ар хьап-щыпмэ нахь апэкIуадэ, гукъэкIыжь зи къыпфигъанэрэп. ШIухьафтынэу сертификатымкIэ къыщэфыщтыр ежь къыхихыщт, ыгу зэрэрихьыщтыр гъэнэфагъэ.

Дахэу зэхэлъ IэшIу-IушIухэм, пхъэшъхьэ-мышъхьэхэм хэти ыгу къыдащэещт. Мыщ фэдэ шIухьафтынхэр нахь агъэфедэх, ар дахэ ыкIи Iэрыфэгъу. Гъомылэпхъэ шIухьафтыныр сыдым хэшIыкIыгъэщта? Ар нэбгырэ пэпчъ иамал ыкIи игукъэкI елъытыгъ. Тучанхэм янахьыбэм угъоигъахэу ачIэт е узыфаер къыхалъхьэзэ къаугъоищт. На­хьыбэрэмкIэ мыщ фэдэ матэм шоколад ыкIи конфетхэр, пхъэ­шъхьэ-мышъхьэхэр, икрар, щай е кофе зэфэшъхьафхэр, нэ­мыкIхэр ахэлъых.

ГъэрекIо цIыфхэр нахь зыфэе шIухьафтынхэмкIэ зекIонымкIэ путевкэхэм ятIонэрэ чIыпIэр аубытыгъагъ. ЫпэкIэ къэтIогъэ шIухьафтынхэм ялъытыгъэмэ, мыщ нахь гукъэкIыжь инхэр къыгъэнэщтых. IэкIыб къэрал чыжьэхэм уарыкIонымкIэ путевкэ закъоп мыщ къыдилъы­тэрэр, шъхьадж амалэу иIэм елъытыгъэу къыхехы. Тиреспуб­лики чIыпIэ дэхабэ иI.

Унэгъо кIоцIым исхэр, ныб­джэгъухэр, нэIуасэхэр шIу­хьафтынхэмкIэ тэгъэгушIох. Ау анахь шъхьаIэр кIэлэцIыкIухэр зэрэдгъэгушIощтхэр, зэрэдгъэ­чэфыщтхэр ары. Ахэр анахьэу зыщыгушIукIыхэрэр джэголъэ зэфэшъхьафхэр, IэшIу-IушIухэр ары.

ИлъэсыкIэ шIухьафтынхэр къызэращэфырэ шIыкIэм зы­щыдгъэгъозэнэу нэбгырэ зау­лэмэ гущыIэгъу тафэхъугъ.

Сусан, пшъэшъэ ныбжьыкI:

— Анахь сикIэсэ мэфэкIхэм ИлъэсыкIэр ащыщ, сигуапэу сежэ. ШIухьафтынэу къафэс­щэфыщтхэм сягупшысэныр па­сэу есэгъажьэ, ау тыгъэгъа- зэм ыкIэхэм къэсэщэфых. Ся­нэ­-сятэхэмкIэ къесэгъажьэшъ, анахь къыспэблагъэу слъытэ­хэрэм шIухьафтынхэр афэсэшIых. Шъхьадж икIасэр къыдэслъытэзэ ахэр къыхэсэхых. Сыд фэдэми, цIыфым ымыгъэфе­дэщтыр естыныр сикIасэп. Сэ сшъхьэкIи шIухьафтын зыфэ­сэшIыжьы. Ар къызэрыкIон, гущыIэм пае, илъэс реным сызыкIэхъопсыгъэу, ушъхьагъу зэфэшъхьафхэмкIэ къэсымыщэфышъугъэ горэн ылъэкIыщт.

Фатима, сабыищмэ ян:

— Сабыйхэр зэрэзгъэгушIощтхэм нахь сыпылъ. СэгъэтIыс­хэшъ, ЛIыжъ Щтыргъу­кIым письмэ фясэгъэтхы. Ащ ратхагъэр къафэсэщэфы, ащ нэмыкIэуи сэ сцIэкIэ анахь зыфаехэр ясэгъэгъусэ. Джащ фэд, сигупсэхэм, бэми макIэми, зы­горэ ястын фаеу къысшIошIы, амалэу сиIэм елъытыгъэу къа­фэсэщэфы.

Сыд фэдиз уныбжьыми, Илъэ­сыкIэ мэфэкIым уемыжэн плъэ­кIырэп, ащ хьалэмэтыгъэ горэ хэлъэу, дэгъу горэ къыздихьыщтэу ущэгугъы. ИлъэсыкIэ хъяр Тхьэм къытфырегъахь!

Делэкъо Анет.