КъумпIыл Мурат игъусагъэх Адыгэ Республикэм псауныгъэр къэухъумэгъэнымкIэ иминистрэу Мэрэтыкъо Рустем, псэолъэшI организацием ипащэу, пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Форвард» зыфиIорэм идиректорэу ДзэлI Аскэр.

Адыгеим ыцIэкIэ координаторэу, республикэм икIыгъэ специалист купым пэщэныгъэ дызезыхьэрэ Хъоткъо Хъызыр а чIыпIэм ахэм къащыпэгъо­кIыгъ. Мы купым Геническэ районым ренэу Iоф гъэнэфагъэ щешIэ, чIыпIэ администрацием упчIэжьэгъу фэхъу, районым щыпсэухэрэм къаIэтырэ Iофыгъохэм язэшIохынкIэ IэпыIэгъу афэхъух.

Адыгеим и ЛIышъхьэ Геническэ районым зэкIом респуб­ликэм икIыгъэ специалистхэм Iофэу ашIагъэм фэхъугъэ кIэ­уххэм защигъэгъозагъ, социальнэ псэуалъэхэу агъэцэкIэжьыгъэхэм язытет ыуплъэкIугъ, Геническэ районым ихэхъоныгъэкIэ Iофэу къыпыщылъыр зыфэдизыр къыгъэнэфагъ.

Республикэм и ЛIышъхьэ щагухэм язытет къыплъыхьагъ, а чIыпIэм щыпсэухэрэм гущыIэгъу афэхъугъ. КIэлэцIыкIу джэгупIэхэу джырэ шапхъэхэм адиштэхэрэм осэшIу бэмэ къафашIыгъ. Адыгеим и ЛIышъхьэ пшъэрылъ зэрафишIыгъэм тетэу, а чIыпIэм щыпсэухэрэм ялъэ­Iухэм адиштэу а джэгупIэхэр ашIыгъэх.

КъумпIыл Мурат кIэлэцIыкIу­хэм апае амалышIухэр щыIэнхэм, ахэм яуахътэ гъэшIэгъонэу агъэкIоным ынаIэ зэрэтыригъэ­тырэм фэшI къызэрэфэразэхэр цIыфхэм къаIуагъ. Республикэм кIэлэцIыкIухэм языгъэпсэфыгъо уахътэ гъэшIэгъонэу зэрэщагъэ­кIуагъэм, медицинэ IэпыIэгъоу ахэм аратыгъэм апае гущыIэ фабэхэр къаIуагъэх. Адыгеим икIыгъэ врачхэм Iоф зыщашIэрэ медицинэ учреждениехэм защэIэм республикэм и ЛIышъхьэ партиеу «Единэ Россием» ипроектэу «Псауныгъэм имэшIоку» зыфиIорэр щыIэныгъэм гъэцэкIагъэ зэрэщыхъурэм нэIуасэ зыфишIыгъ. Ащ нэмыкIэу Геническэ гупчэ сымэджэщым Iут врачхэм ялъэIу тетэу Адыгеим икIыгъэ специалистхэр медицинэ Iэмэ-псымэ лъэпкъ зэфэшъхьафхэм яIофшIэн зыпкъ игъэуцогъэнымкIэ адеIагъэх, упчIэу яIэхэмкIэ джэуапхэр аратыгъэх.

Джащ фэдэу КъумпIыл Мурат чIыпIэрысхэм гущыIэгъу зафэ­хъум анахьэу зыгъэгумэкIыхэрэ Iофыгъохэм защигъэгъозагъ. Урысые Федерацием и Президентэу Владимир Путиным хэгъэгум ишъолъырыкIыхэм IэпыIэгъу ятыгъэнымкIэ пшъэ­рылъхэу къыгъэуцугъэхэм зэшIохыкIэу афэхъущтхэм щахэплъагъэх Геническэ районым ипсэупIэхэм япащэхэр зыхэлэжьэгъэхэ зэIукIэу район администрацием щыкIуагъэм. Анахьэу къызыщыуцугъэ Iофыгъо­хэм ащыщых инфраструктурэмрэ зэхэкъутэгъэ унэхэмрэ зыпкъ игъэуцожьыгъэнхэр, санитарием ылъэныкъокIэ шэпхъэ гъэнэфагъэхэм атетэу цIыфхэм ящыIакIэ нахь Iэрыфэгъу зэрэхъущтым тегъэпсыхьэгъэ пшъэрылъхэр тэрэзэу зэшIохыгъэнхэр.

Шъугу къэтэгъэкIыжьы: мы илъэсым Херсон хэкум и Геническэ район IэпыIэгъу етыгъэнымкIэ Iофышхо зэшIохыгъэ хъугъэ. Мэфи 10 тешIэ къэс пIоми хъунэу шIушIэ хьылъэр афатIупщы, ахэм гъомылапхъэ­хэр, Iэзэгъу уцхэр, псауныгъэм икъэухъумэнкIэ учреждениехэм ящыкIэгъэ Iэмэ-псымэхэр, джащ фэдэу гъэсэныгъэ зыщарагъэгъо­тырэ организациехэм къа­шъ­хьэпэщт пкъыгъо зэфэшъхьаф­хэр аIэкIагъэхьагъэх. Адыгеим икIыгъэ специалистхэм еджапIэхэм, кIэлэцIэкIу IыгъыпIэхэм, спорт еджапIэхэм апае Iэмэ-псымэхэр къащэфыгъэх, кIэлэцIыкIу джэгупIэхэр агъэпсыгъэх, транспорт ыкIи инженер инфраструктурэм къыхиубытэрэ псэолъэ заулэ зыпкъ рагъэуцожьыгъ.

Адыгеим икIыгъэ медикхэм а районым диспансеризациер щызэхащэгъагъ, ящыкIэгъэ медицинэ IэпыIэгъур цIыфхэм аратыгъ. Геническэ районым къикIыгъэ кIэлэцIыкIухэм гъэма­фэм республикэм зыщагъэпсэфыгъ, шIэныгъэм и Мафэ ехъу­лIэу кIэлэеджакIохэм шIухьафтынхэр аратыгъэх, Геническэ районым ис кIэлэцIыкIухэм апае илъэсыкIэ шIухьафтын мин 12,5-рэ агъэхьазырыгъ ыкIи афащагъ.

Дзэ къулыкъу­шIэхэм ящыIакI

Адыгеим щыщхэу хэушъхьафыкIыгъэ дзэ операцием хэлэ­жьэнхэу кIуагъэхэм анахьэу анаIэ атырагъэты IэпыIэгъум ылъэныкъокIэ. КъумпIыл Мурат Адыгеим икIыгъэ дзэ къулы­къушIэхэмрэ хэбзэухъумакI­охэм­рэ аIукIагъ ыкIи гущыIэгъу афэхъугъ. Нафэу зэрэщытымкIэ, Херсон хэкум рэхьатныгъэрэ щынэгъончъагъэрэ илъынхэмкIэ ахэм яшIогъэшхо къэкIо. Респуб­ликэм ихэбзэ къулыкъухэм, партиеу «Единэ Россием» хэтхэм ренэу анаIэ къызэратырагъэтырэм, дзэ операцием хэла­жьэхэрэм апашъхьэ ит пшъэ­рылъхэр гъэцэкIагъэ хъунхэм пае ящыкIагъэр зэкIэ къызэраIэкIагъахьэрэм афэшI зэрафэразэхэр къаIуагъ. Мы мэфэ благъэхэм илъэсыкIэ шIухьафтынхэр ахэм къяжэх, шIушIэ хьылъэр гъогу тет. Ащ хэхьэх цIыфым нахь игъэкIотыгъэу къызфигъэфедэрэ пкъыгъохэм ямызакъоу Адыгеим икIыгъэ кIалэхэу хэушъхьафыкIыгъэ дзэ операцием хэлажьэхэрэм апае шIухьафтынхэр, гущыIэ фабэхэр зэрыт письмэхэмрэ открыткэхэмрэ. Адыгеим и ЛIышъхьэ зыдэщыIагъэм къыщаIэтыгъэ Iофыгъохэм ыкIи ежь къылъэгъугъэ­хэм атегъэпсыхьагъэу министрэ­хэм я Кабинет хэтхэм пшъэрылъ заулэ къафишIыгъ. Анахьэу етIани хэушъхьафыкIыгъэ дзэ операцием хэлажьэхэрэмрэ ежь Геническэ районым щыпсэухэ­рэмрэ IэпыIэгъоу аратыщтым тегъэпсыхьэгъэ Iофыгъохэр ары къызщыуцугъэр. Социальнэ псэуалъэхэм гъэцэкIэжьын Iоф­шIэнэу ащыкIощтхэр, Iэмэ- псымэхэу ящыкIэгъэщтхэр ащ къыгъэнэфагъэх.

«Тэ тызэгъус! А гущыIэхэр урысые Iофтхьабзэм ыцIэ къодыехэу щытхэп. Ахэр Iофэу зэшIотхыхэрэмкIэ, фэныкъохэм IэпыIэгъоу ятты­хэрэмкIэ къэдгъэшъыпкъэ­жьынхэ фае. Урысые Федерацием и Президентэу Владимир Путиным иIэпыIэгъу хэлъэу тыздеIэрэ районым тишIуагъэ джыри нахь зэредгъэкIыщтым тынаIэ тедгъэтыщт. Къошныгъэм­рэ хэхъоныгъэмрэ ягъогу тызэдытет. Партиеу «Единэ Россием» хэтхэм тырягъусэу Адыгеим ыцIэкIэ районым шIушIэ IэпыIэгъоу еттырэр лъыдгъэкIотэщт. ЛъэныкъуабэхэмкIэ ахэр дгъэцэкIэщтых. Джырэ лъэхъанэ Геническэ районым илъ щыIа­кIэр зыпкъ игъэуцожьыгъэным пае тиреспубликэ фэлъэкIыщтыр зэкIэ ышIэщт», — къыIуагъ Адыгеим и ЛIышъхьэ.