Адыгеим лъэпкъ проектхэмрэ къэралыгъо программэхэмрэ зэрэщагъэцакIэхэрэм фэгъэ­хьыгъэ зэфэхьысыжь кIэкI ЛIышъхьэу КъумпIыл Мурат социальнэ хъытыухэм къащишIыгъ.

УФ-м и Президент къыгъэуцурэ пшъэ­рылъ шъхьаIэхэм ахэр зэращыщхэр Адыгеим ипащэ къыхигъэщыгъ.

Къэралыгъо программэ 21-рэ ыкIи лъэпкъ проект 12-мэ къадыхэлъы­тэгъэ шъолъыр проект 47-рэ тиреспубликэ щыпхыращых. 2022-рэ илъэсымкIэ ахэм ягъэцэкIэн те­лъытагъэр сомэ миллиард 17,8-рэ.

Ащ къыдыхэлъытагъэу тишъо­лъыр социальнэ мэхьанэ зиIэ ыкIи инженернэ псэуалъэхэр кIэу щашIых, щагъэцэкIэжьых, щагу кIоцIхэр, общественнэ чIыпIэхэр щызэтырагъэпсыхьэх, автомобиль гъогухэр щагъэцэкIэжьых.

— Къэралыгъо программэхэмрэ лъэпкъ проектхэмрэ пхырыщыгъэ зэрэхъухэрэм ишIуагъэкIэ оборудованиякIэ тэщэфы, предпринимательствэ цIыкIумрэ гурытымрэ IэпыIэгъу агъоты. ТитхылъеджапIэхэр аужырэ шапхъэхэм атетэу зэтетэгъэпсыхьэх, республикэм щыпсэухэрэм Iэзэгъу уцхэр ягъэгъотыгъэнымкIэ социальнэ фэIо-фашIэхэр тэгъэцакIэх. Къыхэзгъэщынэу сыфай Iофэу зэшIотхырэм къыдыхэлъытагъэу ублэпIэ классхэм арыс еджакIохэм шхын стыр зэрарагъэгъотырэр, кIэлэегъаджэхэм классым пэщэныгъэ зэрэдызэрахьэрэм пае ахъщэ тынхэр зэраIэкIэдгъахьэ­хэрэр. Джащ фэдэу кIэлэцIыкIу ибэхэм ыкIи ны-тыхэр зышъхьащымытхэм псэупIэхэр ягъэгъотыгъэным иIофыгъуи, нэмыкIыбэми тадэлажьэ, — къыт­хыгъ КъумпIыл Мурат.

Щысэхэр

ИкIырэ илъэсым зигугъу тшIырэ лъэ­ныкъохэмкIэ изэфэхьысыжь шъхьа­­Iэхэр:

— лъэпкъ проектхэмкIэ объект 30-мэ IофшIэнхэр джыри ащэкIох, зыщаухыгъэ­хэр 16. Культурэм иуни 4-мэ ыкIи зы IэзапIэм гъэцэкIэжьынхэр ащаухыгъэх, псым икъэтынкIэ псэолъи 6-мэ IофшIэнхэр гъунэм ащынагъэсыгъэх. Мы илъэсыр имыкIызэ псыр зыщаубытырэ зы псэуалъэ икIэрыкIэу зэтырагъэпсыхьа­жьыщт, 13-мэ 2023-рэ илъэсым джыри адэлэжьэщтых;

— «Къоджэ псэупIэхэм хэхъоныгъэ ягъэшIыгъэныр» зыфиIорэ программэмкIэ объект 34-мэ IофшIэнхэр ащэкIох, мыхэм ащыщэу 30-р хьазыр, 4-р къи­хьащт илъэсым аухыщт. Ахэм ащыщых ветеринарнэ участкэхэр, гъэстыныпхъэ шхъуантIэм ирыкIуапIэхэр, фельдшер-мамыку IэзапIэхэр, псырыкIуапIэхэр, еджа­пIэхэмрэ кIэлэцIыкIу IыгъыпIэхэмрэ, спортивнэ псэуалъэхэр, IэзапIэхэр, культурэм иунэхэр;

— мы илъэсым республикэм исоциальнэ-экономическэ хэхъоныгъэкIэ программэм къыдыхэлъытагъэу Шъхьэгуащэ Мыекъуапэ зыщыдэчъырэм иджабгъу ыкIи исэмэгу нэпкъхэм ягъэпытэн тегъэпсыхьэгъэ IофшIэнхэр ыкIэм щыфакIох;

— унагъохэу сабыищ е нахьыбэ зиIэхэм унэхэр ащашIынхэм пае аратыгъэ чIыгу Iахьхэм инженернэ псэуа­лъэхэр ящэлIэгъэнхэмкIэ Iофтхьабзэхэр зэшIуахых; — «Культурэм хэхъоныгъэ егъэшIыгъэныр» зыфиIорэ къэралыгъо программэм къыдыхэлъытагъэу искусствэхэмкIэ республикэ колледжэу Тхьабысымэ Умар ыцIэ зыхьырэм игъэцэкIэжьын ыкIэм щыфакIо;

— федеральнэ программэу «Гъэсэныгъэм иеджэпIэ системэ гъэкIэжьыгъэ­ныр» зыфиIорэм къыдыхэлъытагъэу еджэ­пIи 8-р игъэкIотыгъэу агъэцэкIэ­жьыгъ. 2023-рэ илъэсымкIэ гухэлъхэр:

Къихьащт илъэсым Адыгеир Урысыем икъэралыгъо программи 103-мэ ахэлэжьэн мурадхэр щыIэх. Мы Iофтхьабзэхэм зэкIэмкIи сомэ миллиард 19,1-рэ апэIуагъэхьанэу агъэнафэ.

АР-м и ЛIышъхьэ ипресс-къулыкъу