Хэсашъхьэм хэтыщтхэм якъыхэхын
Республикэ общественнэ движениеу «Адыгэ Хасэм» изичэзыу Зэфэс 2023-рэ илъэсым щылэ мазэм Мыекъуапэ щыкIощт.
Ащ фэгъэхьыгъэ зэхахьэ Адыгэ Хасэм игъэцэкIэкIо куп иIагъ. Адыгэ Хасэм итхьаматэу ЛIымыщэкъо Рэмэзан къыIуагъ Хэсашъхьэм хэтыщтхэм якъыхэхын джырэ уахътэ Iоф зэрэдашIэрэр. Адыгабзэм, лъэпкъ шэн-хабзэхэм, тарихъым язэгъэшIэн, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэр гъэпытэгъэнхэм, ныбжьыкIэхэм пIуныгъэ дэгъу ятыгъэным тапэкIи зэрэдэлэжьэщтхэр Р. ЛIымыщэкъом къыIотагъэх.
СтIашъу Юр, МэщфэшIу Нэдждэт, ЦIыкIушъо Аслъан Адыгэ Хасэм ригъэжьэгъэ лъэпкъ Iофхэм ныбжьыкIэхэр нахь чанэу хэгъэлэжьэгъэнхэм яеплъыкIэхэр къыраIолIагъэх. Къуижъ Къэплъан, Хъот Юныс, Тэу Аслъан Хэсашъхьэм хагъахьэхэ ашIоигъохэм къатегущыIагъэх. Зэхахьэхэм бэрэ къащыгущыIэхэу, ау унашъоу Адыгэ Хасэм ыгъэуцухэрэм ягъэцэкIэн зыщызыдзыехэрэр Хэсашъхьэм хамыгъэхьанхэр нахьышIукIэ алъытагъ.
Районхэм ащызэхащэгъэ Адыгэ Хасэхэр Хэсашъхьэм упчIэжьэгъу ышIыхэзэ хэдзын Iофыгъохэм зафигъэхьазырыщт.
ИлъэсыкIэу къихьэрэм республикэм ис цIыфхэм ящыIакIэ нахьышIу хъунэу, мамырэу псэунхэу ЛIымыщэкъо Рэмэзан афиIуагъ.
Сахьидэкъо Нурбый.