ИлъэсыкIэ мэфэкIым ехъулIэу IэкIыбым къикIыжьыгъэ тилъэпкъэгъухэр щыIэныгъэм хэгъэгъозэжьыгъэнхэмкIэ Гупчэм хэкум къэзыгъэзэжьыгъэ тилъэпкъэгъухэм якIэлэцIыкIухэм шIухьафтынхэр афешIых. Мы мафэхэм кIэлэцIыкIу 59-мэ IэшIу-IушIу зэхэпхъагъэхэр зэрылъ къэмлэнэ гъэкIэрэкIагъэхэр Гупчэм ипащэу ГъукIэлI Асхьад аритыжьыгъэх.

— Тилъэпкъэгъу кIэлэцIыкIухэм дэгъоу ашIэ ИлъэсыкIэ мэфэкIыр зыфэдэр. Илъэс къэс тиамал къызэрихьэу ахэм мыщ фэдэ шIухьафтын цIыкIу­хэр афэтэшIых, тэгъэгушIох. Ятарихъ хэку къызэрифэжьыгъэхэм щыгушIукIхэу, зэрэтицIыфхэр ашIэу, щыIэкIэшIу яIэу щыIэнхэу тыфай, — еIо ГъукIэлI Асхьад.

Илъэсым къыщегъэжьагъэу илъэс 13-м нэс зы­ныбжь кIэлэцIыкIухэр Гупчэм къыращэлIагъэх. Асхьад ахэм гущыIэ фабэхэр ариIозэ шIухьафтынхэр аритыгъэх, мэфэкIэу къэблагъэрэмкIэ афэгушIуагъ.

— Мыщ фэдэ шIушIэ Iофтхьабзэ зэхэтщэнымкIэ зишIуагъэ къытэзыгъэкIыхэрэм «тхьашъуегъэпсэу» ясIо сшIоигъу, — еIо Асхьад. — Апэу къыхэзгъэщымэ сшIоигъу АР-м и ЛIышъхьэу КъумпIыл Мурат. Хэкум къэзыгъэзэжьыгъэ тилъэпкъэгъухэм, ахэм яунагъохэм ынаIэ атырегъэты, мылъкукIэ Гупчэм ренэу къыдэIэпыIэ. Джащ фэдэу ренэу тиIэпыIэгъух пшъэдэкIыжьэу ахьырэмкIэ гъунэпкъэ гъэнэфагъэ зиIэ обществэхэу «Мыекъопэ машинэшI заводыр», «Картонтарэр», зэIухыгъэ Iахьзэхэлъ обществэу «Мыекъопэ редукторышI заводыр», Яблоновскэ дэт «Домбытхим» зыфиIорэр, «Мые­къопэ пивэшI заводыр», Кощхьэблэ районым ит дэгъэшI заводэу «Мамырыкъор», Мыекъопэ щэ заводыр. Гъэзетыр къызфэзгъэфедэзэ ИлъэсыкIэу къихьэрэмкIэ ахэм сафэгушIо, псауныгъэ яIэу, агу пыкIырэм фэдишъэ хэхъожьэу щыIэнхэу сафэлъаIо.

ГъукIэлI Асхьад къызэриIуагъэмкIэ, зихэкужъ къэ­кIожьыгъэ тилъэпкъэгъухэм къакIэхъорэ кIэлэцIыкIу­хэм япчъагъэ илъэс къэс зэрэхахъорэм егъэгушIох. ТапэкIи мыхэр янэплъэгъу рагъэкIыщтхэп, кIэлэ­цIыкIухэм щыIэкIэ тэрэз яIэу псэунхэм Гупчэр дэлэжьэщт.

КIАРЭ Фатим.