Адыгеир Урысые шIушIэ Iофтхьабзэу «Елка желаний» зыфиIорэм хэлажьэ. Хабзэ зэрэхъугъэу, Урысые Федерацием и Къэралыгъо Совет изэхэсыгъо аублэным ыпэкIэ Урысыем и Президент ащ фэдэ Iофтхьабзэр зэрэрагъажьэрэмкIэ макъэ къыгъэIугъ.

Шъугу къэдгъэкIы­жьын, Владимир Путиныр кIэщакIо зыфэхъугъэ Iофтхьабзэу «Елка желаний» зыфиIорэр 2018-рэ илъэсым къы­щегъэ­жьагъэу Урысыем щагъэцакIэ. Президент платформэу «Россия — страна возможностей» зыфиIорэм хэх­ьэрэ шIушIэ проектэу «Мечтай со мной» зыцIэм диштэу ар зэхащэ.

Iофтхьабзэу «Елка желаний» зыфиIорэм ишIуагъэкIэ хэгъэгум икIэлэцIыкIухэу чIыпIэ къин итхэм зыкIэхъо­псыхэрэр афагъэцакIэ. КIэлэцIыкIухэм яшIо­игъо­ныгъэхэр зэрытхэгъэ открыткэхэр Кремлым щагъэуцугъэ елкэм па­лъа­гъэх. Адыгеим щыщ кIэлэцIыкIуи 3-мэ яоткрыткэхэр ахэм къахэфагъ. ГущыIэм пае, Мыекъуапэ щыщэу илъэси 7 зыныбжь Тимур телескоп, псэупIэу Каменномостскэм щыщэу, илъэси 10 зыныбжь Марие конструктор зэрэфаехэр яоткрыткэхэм аратхагъ. Мыекъуапэ щыщэу илъэс 12 зыныбжь Тимофей троллейбусым иводитель хъумэ зэрэшIоигъор открыткэм ритхагъ.

Республикэм и ЛIышъхьэу КъумпIыл Мурат республикэм щыщ кIэлэцIыкIухэм яоткрыткэхэр елкэм къыпихыгъэх, ахэр зыкIэхъопсыхэрэр афигъэцэкIагъ.

«ИлъэсыкIэ мэфэкIхэм ялъэ­хъан хьалэмэт горэхэр къэхъунхэу, зыкIэхъопсыхэрэр къафа­гъэцэкIэнхэу кIэ­лэцIыкIухэр мэгугъэх. ЯшIоигъоныгъэхэр афагъэцакIэхэ зыхъукIэ кIэлэцIыкIухэр зэрэгушIохэрэр плъэ­гъуныр насыпыгъэшху. Амал зэриIэкIэ ахэр нахьыбэрэ дгъэгушIонхэм ренэу ткIуачIэ етхьылIэщт, къыткIэхъухьэрэ ныбжьыкIэхэм хэхъоныгъэ ашIынымкIэ, ящыIэкIэ-псэукIэ зыкъе­гъэIэтыгъэнымкIэ амалхэр зетхьащтых», — къыIуагъ КъумпIыл Мурат.

Джащ фэдэу Адыгеим и ЛIышъхьэ къызэрэхигъэщыгъэмкIэ, хабзэ зэрэхъу­гъэу, ИлъэсыкIэм ипэгъокIэу шIушIэ Iофтхьабзэхэр республикэм щызэрахьэх. Республикэм игурыт еджапIэхэм яа 1 — 4-рэ классхэм арысхэм, Геническэ дэс кIэлэцIыкIухэм, Херсон хэкум къи­кIыхи Адыгеим къэкIогъэ кIэлэцIыкIухэм апае илъэсыкIэ шIухьафтынхэр агъэхьазырыгъэх. Ащ нэмыкIэу Къэралыгъо филармонием щызэхащэрэ илъэсыкIэ Iофтхьабзэхэм кIэлэеджэкIо сэнаущхэр, гъот макIэ зиIэ унагъохэм арысхэр, сэкъатныгъэ зиIэ кIэлэцIыкIухэр къарагъэблагъэх. Мобилизацием къыхэфэгъэ дзэ къулыкъушIэхэм якIэлэцIыкIухэри мыгъэ республикэм иелкэ шъхьаIэ къырагъэблэгъэщтых. ПстэумкIи илъэси 7-м къыщегъэжьагъэу илъэс 13-м нэс зыныбжь кIэлэцIыкIу мини 3,3-рэ фэдиз мэфэкI Iофтхьабзэхэм ахэлэжьэщт.

Адыгэ Республикэм и ЛIышъхьэ ипресс-къулыкъу