Партиеу «Единэ Россием» ипащэхэмрэ ащ ифракциеу Думэм щыIэмрэ 2022-рэ илъэ­сым хэбзэихъухьан IофшIэнэу агъэцэкIагъэм икIэуххэр зэфа­хьысыжьыгъэх.

Къуаджэм IэпыIэгъу етыгъэным, цIыфхэм IофшIэн ягъэгъотыгъэным, общественнэ инициативэхэм ыкIи гуфакIохэм, ныбжьыкIэ предпринимательствэм, сабыйхэр зэрыс унагъо­хэм япхыгъэ Iофыгъуабэ илъэсым зэшIохыгъэ хъугъэ.

Илъэсэу икIырэм анахьэу анаIэ зытырагъэтыгъэр хэушъхьа­фыкIыгъэ дзэ операцием хэлажьэхэрэм ыкIи ахэм яунагъо­хэм IэпыIэгъу ятыгъэныр ары. Мобилизацием къыхиубытагъэ­хэмрэ гуфакIохэмрэ яIофшIэпIэ чIыпIэхэр къэнэжьынхэмкIэ гарантие яI, «кредит каникулкIэ» заджэхэрэр ахэм япхыгъэу агъэфедэщт, унэ-коммунальнэ фэIо-фашIэхэм апае атырэм техъо фэхъущтэп ыкIи нэмыкI­хэр. Ащ нэфэшъхьафэу ежь яшIоигъоныгъэкIэ зэхащэгъэ формированиехэм ястатус шапхъэу щыIэхэмкIэ гъэпытэжьыгъэ хъугъэ, социальнэ гарантиехэри а формированиехэм ахэтхэм яIэ хъугъэх.

— Партиеу «Единэ Россием» и Адыгэ шъолъыр къутамэ хэтхэм пшъэрылъ афэсшIыгъ партием къырихьыжьэрэ Iоф­тхьэбзэ пстэури республикэм шIуагъэ къытэу щызэшIохыгъэ хъунхэм анаIэ тырагъэтынэу. ХэушъхьафыкIыгъэ дзэ операцием хэлажьэхэрэм, Геническэ районым исхэм, Адыгеим къэкощыжьыгъэхэм IэпыIэгъоу ара­тырэр лъыгъэкIотэгъэнымкIэ республикэм Iофтхьэбзэ тедзэ­хэу щызэрахьащтхэм тадэлажьэ, — къыIуагъ Адыгеим и ЛIышъхьэу КъумпIыл Мурат.

Мобилизацием къыхиубытэгъэ пстэуми республикэмкIэ агъэ­нэфэгъэ ахъщэр аратыгъах, ахэм якIэлэцIыкIухэр еджапIэхэмрэ колледжхэмрэ ыпкIэ хэмылъэу ащагъашхэх, кIэлэцIыкIу IыгъыпIэхэм ясабыйхэр зэрэщаIыгъхэм ыпкIэ ны-тыхэм аIахырэп, унагъо пэпчъ IэпыIэгъу гъэнэфагъэ раты. Республикэм имылъкукIэ, бизнес-сообществэм ыкIи партиеу «Единэ Россием» хэтхэм IэпыIэгъоу къаратырэм яшIуагъэкIэ Адыгеим икIыгъэ дзэкIолIхэм ящыкIагъэр зэкIэ ягъэгъотыгъэным тегъэпсыхьэгъэ Iофтхьабзэхэр зэрахьэх.

Волонтерхэр, предпринимательхэр, общественнэ Iофы­шIэхэр, организацие зэфэшъхьафхэр хэлажьэхэзэ, зышъхьэ къизыхыжьыгъэхэм япхыгъэ IофшIэныр республикэм дэгъоу щызэшIуахы. Мэфи 10 тешIэ къэс гъомылапхъэхэр, псэу зэшъощтхэр, Iэзэгъу уцхэр, псэолъапхъэхэр, техникэмкIэ амал зэфэшъхьафхэр, тхылъхэр, спорт Iэмэ-псымэхэр ыкIи нэмыкI пкъыгъохэу ящыкIагъэхэр тынаIэ зытедгъэтырэ чIыпIэхэу Украинэм итхэм алъагъэIэсых. Партиеу «Единэ Россием» ишъо­лъыр къутамэ ынаIэ тетэу а IэпыIэгъум къыдилъытэрэ лъэныкъохэр зэкIэ зэшIохыгъэ мэхъух.