ИлъэсыкIэ мэфэкIхэр къэблагъэх. ЗекIоным фэгъэзэгъэ къулыкъухэмкIэ анахь Iофыгъуабэ зэшIохыгъэн фаеу зыщыхъурэ лъэхъан ар. ЗекIо мини 100 фэдиз мэфэкIым Адыгеим къэкIонэу ары зэрэгугъэхэрэр.

ХьакIэщ ыкIи гъэпсэфыпIи 160-м ехъумэ ачIэсыщтхэр агъэ­нэфэгъахэх. ЗекIонымкIэ къулыкъум щылажьэхэрэм программэ игъэкIотыгъэ агъэхьазырыгъ. ХьакIэхэм чIыпIэ зэфэшъхьаф­хэр арагъэлъэгъущтых, лыжэхэмкIэ, жэхэмкIэ къачъыхьащт, анахь чIыпIэ гъэшIэгъонхэм лъэсэу ыкIи шыхэм атесхэу къащакIухьан амал яIэщт.

«Адыгэ Республикэм зекIонымкIэ ыкIи зыгъэпсэфыпIэхэмкIэ и Комитет зекIо къакIохэрэм щынэгъончъэу загъэпсэфынымкIэ, джащ фэдэу хьакIэщхэмрэ зекIоным епхыгъэ псэуалъэ­хэмрэ пэщэныгъэ адызезы­хьэхэрэм псэуалъэхэр терроризмэм щыухъумэгъэнхэмкIэ, гъэпсэфыгъо мафэхэм ялъэ­хъан дежурствэ зыхьырэ къулыкъу­хэм къэбарыр псынкIэу алъагъэIэсын алъэкIыным иамалхэр агъэ­нэфэнхэмкIэ пшъэрылъ афэсшIыгъ. Гъогухэр щынэгъон­чъэнхэмкIэ, коммунальнэ къулыкъур осыр гъогухэм атеукъэ­бзы­кIы­гъэным фэхьазырынымкIэ хэ­ушъхьафыкIыгъэу пшъэ­рылъхэри афэзгъэнэфагъэх.

ЦIыфхэр загъэпсэфынэу, чIыпIэ дахэхэр зэрагъэлъэгъунхэу, яуахътэ щынэгъончъэу щытынэу ары тадэжь къызкIа­кIохэрэр. Ащ пае хьакIэхэм дэгъоу тапэгъокIыным фытегъэ­псыхьэгъэ инфраструктурэр джыри нахьышIу шIыгъэным епхыгъэ Iофтхьабзэхэр лъыдгъэ­кIотэнхэ фае. ЗекIо къакIохэрэр нахьыбэ хъунхэмкIэ, анахьэу етIани кIымэфэ лъэхъаным, къушъхьэлъэ зыгъэпсэфыпIэу «Лэгъонакъэ» ишIогъэшхо къэ­кIонэу тэгугъэ», — Адыгеим и ЛIышъхьэ исоциальнэ хъытыу­хэм къаригъэхьагъ.