Пэтхъу-Iутхъур ыкIи гриппыр къызэузыхэрэм япчъагъэ лъэшэу хахъоу ригъэжьагъ. АдыгеимкIэ анахьэу зыгъэсымэджагъэхэр «Адыгэ макъэм» зэригъэшIагъ.

РеспубликэмкIэ эпидемиологием изытет къытедгъэгущы­Iагъ щэфакIохэм яфитыныгъэ­хэр ыкIи цIыфым игупсэфыныгъэ къэухъумэгъэнхэмкIэ Федеральнэ къулыкъум и ГъэIорышIапIэу Адыгэ Республикэм щыIэм ипащэу Сергей Завгороднер.

Ащ къызэриIуагъэмкIэ, зэпа­хырэ узхэу анахьэу тишъолъыр къыщекIокIыхэрэ пэтхъу-Iутхъур, гриппыр, коронавирусыр ыкIи тхьабыл плъыр-стыр узыр къызэузыхэрэм япчъагъэ тхьамафэ къэс гъунэ лъафы, зэфэхьысыжьхэр фашIых.

— ГущыIэм пае, икIыгъэ тхьамафэр тштэмэ, пэтхъу-Iутхъур (ОРВИ) ыкIи гриппыр нэбгырэ мини 3,5-м ехъурэмэ къяузыгъэу агъэунэфыгъ, — къеIуатэ Сергей Завгороднем. — А пчъагъэм къызэригъэлъэгъуагъэмкIэ, нэбгырэ мини 10-м телъытагъэу сымэджагъэхэр процент 76,2-рэ, тхьамафэм телъытагъу эпидемием ишап­хъэу агъэнэфагъэм ар процент 73-кIэ нахьыб. Ау ащ ыпэрэ тхьамафэм ебгъапшэмэ, джы къэсымэджагъэр процент 11-кIэ нахьыбэ мэхъу.

Ныбжь купхэмкIэ ухаплъэмэ, зэкIэри сымэджагъэх, ау кIэлэцIыкIухэм анахьи ныбжь зиIэхэр процент 73,6-кIэ нахьыбэ хъугъэх, кIэлэцIыкIухэр — процент 20-кIэ.

ТигущыIэгъу къызэрэхигъэщыгъэмкIэ, нахьыбэрэмкIэ рес­публикэм щызекIорэр «свиной гриппэу» H1N1-р ары.

— Эпидемие лъэхъаныр къы­зежьагъэм къыщыублагъэу «свиной гриппыр» къеузыгъэу нэбгырэ 95-рэ атхыгъ, — къе­Iуатэ С. Завгороднем. — Мы пчъагъэр сымэджэщхэм зафэзыгъэзагъэхэр ары, унэм исхэу зэIэзэжьыхэрэми ар къызэу­тэкIыгъэ къахэкIын ылъэкIыщт. Мыр псынкIэу зэпахырэ узэу щыт, сымаджэхэр шъхьафы ашIыгъэх, ищыкIэгъэ медицинэ уплъэкIунхэр афашIыгъ.

Джащ фэдэу Роспотребнадзорым АР-мкIэ и ГъэIорышIапIэ ипащэ зигугъу къышIыгъэхэм ащыщ еджапIэхэу зэфашIыгъэ­хэр. ПэIудзыгъэ шIыкIэм тетэу еджэпIэ 22 е класс 87-рэ еджэ. ПстэумкIи ащ кIэлэцIыкIу мини 2 къыхиубытагъэр. Республи- кэм игурыт еджэпIэ 21-р зэфашIыпагъэх, ахэм якласс 529-мэ кIэлэцIыкIу мин 14 арыс.

Адыгеим исанитарнэ врач шъхьаIэ цIыфхэм закъыфегъазэ мы уахътэхэм нахь зыфэсакъы­жьынхэу, цIыфхэр бэу зыщызэрэугъоихэрэ чIыпIэхэм амал зэриIэкIэ нахь макIэу ахэхьанхэу. ЩэпIэ чIыпIэхэм шъузыкIокIэ нэгуIухъор жъугъэфедэмэ нахь тэрэзэу ащ ылъытагъ.

ШъуIэхэмкIэ шъунэгу шъукIэмыIэбэжь! ШIэныгъэлэжьхэм къызэралъытагъэмкIэ, непэ зы сыхьатым гурытымкIэ гъогогъу 25-рэ цIыфыр ынэгу енэсы. Ащ дакIоу, а IэхэмкIэ пкъыгъо зэфэшъхьафхэу вирусыр зытелъын ылъэкIыщтхэм атеIабэ.

Жьы къабзэм мэхьанэ иI. Унэ кIоцIхэм бэрэ жьы къабзэ арыбгъэхьаныр дэгъу. Ащ вирусыр нахь макIэ ешIы.

Iэшъынэ Сусан.