Зын къымылъфыгъэ зэшых, Къэсымылъфыгъэ сикIалэх! Ежь-ежьырэу зигъэтIылъыжьыгъ, Мыжъосыни зыфигъэуцужьыгъ. ЦIыфми ишIушIагъэ аIэтыгъ, ЗыфаIэтын шIушIагъи къыпкъырыкIыгъ.

Рустам кIэлэцIыкIу IыгъыпIэм къыдычIэсыгъэхэри зыдеджа­гъэхэри шIу ылъэгъущтыгъэх, лъытэныгъэ афишIыщтыгъ. Анахь пэблагъэ хъугъагъэхэр Iэшъынэ Вячеславрэ ЯхъулIэ Казбекрэ. Мыхэр зэрысыгъэхэ классым сэ адыгабзэмкIэ сырикIэлэ­егъэджагъ. ЗэкI пIоми хъунэу дэгъоу еджэщтыгъэх, класс зэ­дэIужьыгъ, зэнэкъокъумэ ахэ­лажьэщтыгъэх, республикэмкIи хагъэунэфыкIырэ чIыпIэхэр къа­хьэу хъугъэ.

Рустам бзэ Iофым нахь фытегъэпсыхьэгъагъ, усэ зэхэлъхьаныр къыдэхъущтыгъ. ЕджапIэр къызаухым Рустам литературэ лъэныкъомкIэ зигъэзэн сшIошIыгъ, ау политехническэ институтым ЯхъулIэ Казбекрэ Iэшъынэ Вячеславрэ адакIошъ, чIэхьэх. Урокым къычIахьэрэми, ежь классым исми псынкIэу гу лъатэщтыгъ сэнаущыгъэу хэ­лъым. БзэмкIэ урокхэм темэу ткIурэм ехьылIагъэу усэ цIыкIуми, рассказ цIыкIуми къатхынэу зястыкIэ псынкIэу къызэхилъхьэщтыгъ. Гъэзетхэу «Адыгэ макъэм», «Теучежские вести» къарядгъэгъэхьанхэу зэкIэми къысаIощтыгъ, ау зэрэсикIалэм фэшI сыукIытэщтыгъ. Ау щыт нахь мышIэми, усэхэр зэрэзэхилъхьэхэрэр зэлъашIагъэ. Культурэм и Унэ пчыхьэзэхахьэ­хэр щыIэхэ зыхъукIэ рагъэблагъэти, иусэмэ къырагъаджэ­щтыгъ. Иныбджэгъумэ апкъ къикIыкIэ Тэхъутэмыкъое телевидением рагъэблэгъэнэу мэхъу, ау ежь афиштэрэп Iоф­шIэныр.

Культурэм и Унэ пчыхьэзэ­хэхьэшхоу щыIэщтым Рустам кIонышъ, иусэмэ ащыщмэ къя­джэнэу селъэIу. Ау кIалэр мыкIохэнэу зиIокIэ, ар зэрэау­жыпкъэрэр гурысэгъаIо. МакIо, пчыхьэзэхахьэм хэлажьэ, шIу­хьафтыныр къызыратым къа­Iихыгъэп, «Ащыгъум мы къэ­гъагъ Iэрамыр уянэ тфетыжь» заIокIэ къысфехьыжьышъ, къысеIо: «Тыухыгъэ усэ тхынри, къеджэнри». Усэхэр зыдэт тетрадри ащ нахьыбэрэ слъэгъу­жьыгъэп.

Язэныбджэгъуныгъэ нахь амы­гъэпытэмэ, къыщамыгъакIэу кIэлищыр зэхэтхэзэ, Пэнэ­жьыкъуае щыщхэу, ау чылэм дэмысхэу ЗауритIу ныбджэгъу къафэхъу: зыр Краснодар, адрэр Адыгэкъалэ щеджэщтыгъэх. Ахэм къахэхьажьы аскъэ­лэе кIалэ, зын къылъфы-гъэм фэдэхэу институтыр къы­зэдау­хы. ЕтIанэ чылэм къы­зегъэзэ­жьым, Кушъу Аслъани къахэхъо. Рустам шъэогъукIэ баигъэ, зэкIэхэри шIу ылъэ­гъущтыгъэх, ежьыри къалъэгъу­щтыгъ. ИщыIэныгъэ зеухыми ныбджэгъу-шъэогъу шъып­къэхэу къы­чIэкIыжьыгъэх.

Рустам машинэ зэутэкIым зыхафэм дисыгъэр Кушъу Ас­лъан. Аслъан псаоу къекIыжьы, Рустам хэкIуадэ, ар шъхьадж инасып. Хьадагъэри ыкIэм фэкIуагъэу, цIыфхэри нахь пIокIэ-лъакIэ хъугъэхэу Аслъан къэкIошъ, къытеIо: «Сыпсаоу сыкъызэрэнэжьыгъэм фэшI сянэ-сятэхэм къурмэн сфа­шIыжьынэу аIо». СIощтыр амы­шIэу Рустам яти ыши къысэплъыгъэх. СигущыIэ къежэхэ- рэм къясIуагъ: «Псаоу укъызэрэнагъэр боу сигуапэ, игъу, пфашIыжьын адэ, сикIалэ ежь кIодыгъэми, цIыф екIодылIагъэп, ари шыкур. Псаоу укъызэрэнагъэр зэрэсигуапэр уянэ­уятэми сфяIожь, ахэми уря­кIэлэ закъу».

Ащ ыужым тызэлъыкIо зэ­хъум Аслъан янэ къысеIо: «Зэ­хьэрам тыхъущтмэ, «О уикIалэ къани сэ сикIалэ хэкIодагъ» пIощтмэ тымышIэу, зы гугъум адрэ гугъур тетыжьыгъ». Джы Аслъан сикIалэ ычIыпIэ иуцо­жьыгъэм фэд, адрэ кIалэмэ ахэтэу кIэлэегъаджэм и Мафэми, Бирамыми сыхагъэунэфыкIы, садэжь къэкIох. СикIалэ къихьажьыгъ сщагъэхъоу, сыгу къыдащае, сагъэгушхо. Аслъан Пэнэжьыкъое къоджэ Советым итхьаматэу Iоф ешIэшъ, нахьыбэрэ сыIокIэ. Хъярми къинми унагъохэмкIэ тызэ­хэ­хьэх, сипсауныгъэ зэрагъэшIэ­нэу, сызэрагъэлъэгъунэу къа­кIохэуи мэхъу.

Къэсымылъфыгъэ сикIалэхэу ЛIыхэсэ Мэдин (ащ къызэри­гъэягъэр джы къызнэсыгъэм стхьакIумэ ит), Iэшъынэ Вячеслав, ЯхъулIэ Казбек, Мыгу Заур, Нэныжъ Заур, еджапIэм щыдеджэгъэ кIалэхэри — зэ­кIэхэри хьадагъэр окIофэ, мэфэ тIокIитIу, шъэныкъорэ тIурэ охъуфэ нэс «Рустам ыIуагъ, ышIагъ» аIоу, гукIэгъоу хэлъы­гъэр афэмыухэу, тэри тыгу къыдащаеу щагум дэтыгъэх. ШIапхъэр ашIагъ, Iуапхъэр ­аIуагъ, ышнахьыжъ ыгу къыдащаеу, ышнахьыкIэ къыгот шIуа­гъэшIэу, тэри ахэр зытлъэгъу­хэкIэ, тыгу нахь псынкIэ къэ­хъоу уахътэр кIуагъэ.

Рустам икъэ ащыщэу апэ зыгъэкъэбзэщтыр язэрэмыгъа­шIэу зэныбджэгъухэм алъэкI къагъанэрэп. Исаугъэт ежь зыфишIыжьыгъ. ИшIынкIэ къыддеIагъэри ежь деджэщтыгъэ кIал, янэ-ятэмэ саугъэтхэр ара­гъэшIыхэу щытхэти, ежь ахэм адеIэщтыгъ. Нахь дэгъоу зы­шIыхэрэм зыкIэупчIэхэм, ахэм адэжь ышырэ ышыпхъурэ агъэ­кIуагъэх. Картыр къашти, зырагъэлъэгъум къыхэкуукIи, ынэпс­хэр къэкIуагъэх, Рустам ащ къышIэжьыгъ, тIэкIу зытешIэ ужым къыIуагъ: «МыщкIэ ар хъущтэп, гранитыр Грецием къищыгъэн фае». Джащ тетэу саугъэтыр лъагэу, Iэбгъу-лъэбгъоу, исурэти хэутыгъэу, гущыIэ дахэхэри дыкIыгъоу агъэпсыгъ. Ащ лъатыщт ахъщэри ежь Рус­там хьалэлэу къылэжьыгъэу, сигъэгъэтIылъыгъэу щы­Iагъ. Ежь­-ежьырэу зигъэтIылъы­жьыгъ, саугъэти зыфигъэуцу­жьыгъ.

СикIалэ зыфыкъуагъэм щегъэжьагъэу районым щырагъэ­кIокIырэ Iофтхьабзэхэм ащыщ хъужьыгъэу турнир фызэхащэ. Ахэм якIэщакIох Рустам ышнахьыжъэу Налбый, иныбджэгъу кIалэхэр. Усэхэр зэриусыщтыгъэхэм фэшI, гъэзетэу «Теучежские вести» зыфиIорэм щызэдаштагъэу, анахь дэгъоу усэ зэхэзылъхьэхэрэм е адыгабзэм изэгъэшIэнкIэ зэнэкъокъухэрэм ащытекIохэрэм, анахь класс дэ­гъухэм ахъщэ шIухьафтынхэр сэри арясэгъэтых.

Рустам псаоу щыIагъэмэ, 2023-рэ илъэсым щылэ мазэм и 9-м ыныбжь илъэс 45-рэ хъущтгъагъэ. Нахьыбэу сы­къызкIэтхагъэр цIыфхэм къиныр къызэрэддаIэтыгъэмкIэ «тхьашъуегъэпсэу» ясIожьыным фэшI. Джыри зэ къыхэзгъэщымэ сшIоигъор ишъэогъухэр ары. Ахэр Рустам ишъэогъу закъохэп, янэ къымылъфыгъэ ышых, сэ къэсымылъфыгъэ сикIалэх. ЦIыфмэ язгъашIэ сшIоигъу непэ къызнэсыгъэм ахэм афэдэ шъэо­гъу шъыпкъэхэр зэрэщы­Iэхэр.

Сатеплъэмэ, сикIалэ къычIэ­кIыжьыгъ сшIуагъэшIэу сыщыI, сыщызгъаIэхэрэр ахэр арых, цIыфмэ ягукIэгъу. А си­кIалэмэ джы насып дахэу яIэм фэдэ яIэу бэрэ щыIэнхэу са­фэлъаIо.

ЦIыфым цIыфыр ищхэпс, ЦIыфым ущегъаIэ, Тамэ къыбгуегъакIэ, Угуи къегъэушъэбы, укъегъэIасэ.

Кощэгъу Нуриет. Пэнэжьыкъуай.