Адыгеим и ЛIышъхьэу КъумпIыл Мурат Красногвардейскэ районым щыIагъ псауныгъэр гъэпытэгъэным фытегъэпсыхьэгъэ комплексэу «Кавказ» зыфиIоу район гупчэм щагъэпсыгъэмрэ селоу Еленовскэм щашIыгъэ спортзалымрэ якъызэIухын хэлэжьагъ.

Селоу Еленовскэм дэт гурыт еджапIэу N 6-м щагъэпсыгъэ спортзалыр программэу «Къуаджэхэм зэдиштэу хэхъо­ныгъэ ягъэшIыгъэныр» зыфиIорэм ишIуагъэкIэ ашIыгъ. Псэуалъэм сомэ миллиони 100 фэдиз тефагъ. Унэм хэтых спортзалыр, зытIэкIыпIэр, санитарнэ шапхъэхэм адиштэрэ унэ зэфэ­шъхьафхэр: гъэпскIыпIэр, Iэмэ-псымэхэр зэрылъхэр, тренерым иунэ ыкIи нэмыкI­хэр. Нэбгырэ 270-мэ физическэ культурэмрэ спортымрэ мыщ щапылъынхэ алъэкIыщт.

Республикэм и ЛIышъхьэ залыкIэр къыплъыхьагъ, еджапIэм щылажьэхэрэм ыкIи спортивнэ секциехэм анахь чанэу ахэтхэм гущыIэгъу афэхъугъ. Нафэ къы­зэрэхъугъэмкIэ, кIэлэцIыкIухэм ямыза­къоу, зыныбжь икъугъэхэри мыщ къекIуа­лIэх. ГущыIэм пае, волейболымкIэ чIыпIэ командэр республикэ ыкIи муниципальнэ мэхьанэ зиIэ зэнэкъокъу­хэм ахэлажьэ, апэрэ чIыпIэхэр бэрэ къехьых.

«Республикэм спортымкIэ инфраструктурэм зыщетэгъэушъомбгъу, анахь пэIудзыгъэ псэупIэхэми псэолъэ гъэнэфагъэхэр а лъэныкъомкIэ ащытэгъэпсых. Еленовскэм дэсхэр къыкIэлъэIугъагъэх спортзал афашIынэу. Къэралыгъо программэхэм яшIуагъэ­кIэ ар къыддэхъугъ. Джы анахь шъхьа­Iэр зышIоигъо пстэуми спорт псэолъа­кIэр къызфагъэфедэн алъэкIыныр ары, щыIэкIэ-псэукIэ тэрэз цIыфхэм яIэнымкIэ спортым нахьыбэу ахэр хэщэгъэнхэм мэхьэнэ гъэнэфагъэ иI», — къыхигъэщыгъ АР-м и ЛIышъхьэ.

Еленовскэ къоджэ псэупIэм ипащэу Елена Клиновамрэ гурыт еджапIэу N 6-м идиректорэу Iэтэжьыхьэ Маерэ зэкIэ Еленовскэм щыпсэухэрэм ацIэкIэ республикэм и ЛIышъхьэ зэрэфэразэхэр къыхагъэщыгъ. Мы аужырэ илъэсхэм фельдшер-мамыку IэзапIэ мыщ ща­шIыгъ, культурэм и Унэ агъэцэкIэжьыгъ, лъэс­ры­кIохэр ашIыгъэх, гъогухэм ягъэкIэжьын макIо, кIэлэцIыкIу IыгъыпIэ ашIынэу рахъухьагъ.

Мы мэфэ дэдэм Адыгеим и ЛIышъхьэ селоу Красногвардейскэм щашIыгъэ, джырэ лъэхъаным диштэрэ физкультурнэ комплексэу «Кавказым» икъызэIухын хэлэжьагъ. Лъэпкъ проектэу «Демографиер» зыфиIорэм тегъэпсыхьагъэу ар ашIыгъ, пстэумкIи псэуалъэм сомэ миллиони 136-рэ тефагъ. Квадрат метрэ 2200-рэ хъурэ унэм зыщыджэгущтхэ залымрэ нэбгырэ 220-мэ ателъытэгъэ трибунэхэр хэтых, джащ фэдэу тренажернэ зал, зытIэкIыпIэ, зыгъэпскIыпIэ, административнэ унэхэр хэтых.

КъекIолIагъэхэм шIуфэс къарихызэ КъумпIыл Мурат къыхигъэщыгъ комплексыкIэр цIыфхэм дэгъоу къызэрэзыфагъэфедэщтым ицыхьэ зэрэтелъыр, тре­нировкэхэр ашIынхэмкIэ ыкIи зэнэкъо­къухэр зэхащэнхэмкIэ амалышIухэр зэкIэ ащ иIэх.

«Республикэм ирайон гупчэхэм псауныгъэм икъэухъумэнрэ спортым зегъэ­ушъомбгъугъэнымрэ япхыгъэ псэуалъэ­хэм яшIын мы комплексымкIэ тэухы. Адыгеим спортым зыщиушъомбгъунымкIэ, анахьэу тикIэлэцIыкIухэм ащкIэ яфэныкъоныгъэхэр игъэкъугъэнхэмкIэ тфэлъэкIыщтыр зэкIэ джыри тшIэщт. Хэгъэгум и Президентэу Владимир Путиным, Урысыем и Правительствэ лъэ­шэу яшIогъэшхо къытагъэкIы ащкIэ. Илъэс заулэ хъугъэу республикэм спорт псэолъакIэхэр къетаджэх. Мыгъэ ащ фэдэ комплексыкIэу 5 дгъэпсыгъэ», — къыIуагъ АР-м и ЛIышъхьэ.

Республикэм и ЛIышъхьэ къызэрэхигъэщыгъэмкIэ, къэралыгъо программэхэмрэ лъэпкъ проектхэмрэ яшIуагъэкIэ къоджэ щыIакIэм илъэныкъо пстэуми уахътэм диштэрэ зэхъокIыныгъэшIухэр афэхъух ыкIи а IофшIэныр джыри лъыкIотэщт.

Красногрвардейскэ районым ипащэу Гъубжьэкъо Темур къышIыгъэ джэуап гущыIэм къызэрэщыхигъэщыгъэмкIэ, ренэу ишIуагъэ зэраригъэкIырэм пае Адыгеим и ЛIышъхьэ фэраз, 2022-рэ илъэс закъом социальнэ мэхьанэ зиIэ псэолъэ 16 муниципалитетым зэрэщашIыгъэр ащ къыIуагъ.

Спорткомплексым икъызэIухын илъэ­хъан дзюдомкIэ, атлетикэ онтэгъумкIэ ыкIи спортым инэмыкI лъэпкъхэмкIэ районым испортсмен ныбжьыкIэхэм зэнэкъокъухэр зэхащагъэх. ИкIэухым хьакIэхэр боксымкIэ тренировкэу кIорэм еплъыгъэх.

Апэрэ спорт зэнэкъокъухэм ахэлажьэхэрэр спорт псэолъакIэм къекIуа­лIэхэу рагъэжьагъ, хъулъфыгъэхэм азыфагу волейболымкIэ республикэм щыкIощт чемпионатым изичэзыу тур къыдилъытэрэ джэгукIэ зэфэшъхьафхэри мыщ щызэхащэщтых.

АР-м и ЛIышъхьэ ипресс-къулыкъу