ИлъэсыкIэм ипэгъокIэу, хабзэ зэрэхъугъэу, зыныбжь илъэси 7-м къыщыублагъэу илъэс 13-м нэсырэ кIэлэцIыкIухэм мэфэкI Iофтхьабзэхэр афызэхащэх.

Сэнаущыгъэ ин зыхэлъхэр, сэкъатныгъэ зиIэхэр, гъот макIэ зиIэ унагъохэм къарыкIыгъэхэр ахэм къарагъэб­лагъэх. Мы илъэсым ахэм къахэхъуагъэх дзэ къулыкъум дащыгъэхэм якIэлэцIыкIухэр. ЗэкIэмкIи нэбгырэ 3300-рэ фэдиз мэфэкIхэм ахагъэлэжьэщт.

Адыгеим и Къэралыгъо филармоние сабыйхэм мэфэкIэу ащыфызэхащэхэрэм яжъотыпI. КIэлэцIыкIухэм къажэх пшысэхэм къахэкIыгъэ «хьакIэхэр», театрэ къэгъэ­лъэгъонхэр, чэф зыхэлъ Iофтхьэбзэ зэфэшъхьафхэр. ЛIыжъ Щтыргъу­кIымрэ Ос Пшъашъэмрэ сабыйхэр елкэм хъураеу къырагъэкIокIыщтых. КIэухым пстэуми IэшIу-IушIухэр афагощыщтых.

— ИлъэсыкIэ шIухьафтынхэр джащ фэдэу республикэм иеджапIэхэм я 1 – 4-рэ классхэм арысхэм, Геническ щыпсэухэрэм, Херсон хэкум къикIыхи Адыгеим къэкIуагъэ­хэм афэдгъэхьазырыгъэх. МэфэкIыр пстэуми агу къинэжьыным, ашIогъэшIэгъоныным тыпылъыщт! — къащитхыгъ исоциальнэ нэкIубгъохэм Адыгеим и ЛIышъхьэу КъумпIыл Мурат.