КъумпIыл Мурат шIушIэ Iофтхьабзэм хэлэжьагъ
— Хабзэ зэрэхъугъэу, Урысые Федерацием и Къэралыгъо Совет изэхэсыгъо аублэным ыпэкIэ ти Президент Урысые шIушIэ Iофтхьабзэу «Елка желаний» зыфиIорэр зэрэрагъажьэрэр къыIуагъ. Владимир Путиныр кIэщакIо зыфэхъугъэ проектыр 2018-рэ илъэсым къыщегъэжьагъэу Урысыем щагъэцакIэ. Адыгеир мыщ фэдэ Iофтхьабзэм илъэс къэс хэлажьэ. Хэгъэгум ишъолъырыкIэхэри мыгъэ ащ хэлэжьэщтых.
КIэлэцIыкIухэр зыкIэхъопсыхэрэр Кремлым щагъэуцугъэ елкэм палъхьэгъэ открыткэхэм аратхагъэх. Адыгеим щыщ кIэлэцIыкIухэр зыфаехэр ахэм арытых. Тимур телескоп, Марие конструктор иIэ шIоигъу, Тимофей троллейбусым иводитель хъуным кIэхъопсы. ШIокI имыIэу яшIоигъоныгъэхэр ахэм къадэхъущтых.
НэмыкI кIэлэцIыкIухэми, анахьэу щыIэныгъэм чIыпIэ къин ригъэуцуагъэхэм, зыкIэхъопсыхэрэр къадагъэхъуным мэхьанэшхо иI. Ащ фэдэ кIэлэцIыкIухэм ящыIакIэ нахьышIу хъуным тэ ренэу ткIуачIэ етэхьылIэ, — аритхагъ Адыгеим и ЛIышъхьэ социальнэ хъытыухэм.