Свято-Успенскэ кафедральнэ чылысым ишIын зэрэкIорэм Адыгеим и ЛIышъхьэу КъумпIыл Мурат зыщигъэгъо­загъ. Ащ игъусагъэх къалэм имэрэу Геннадий Митрофановымрэ Адыгэ ыкIи Мыекъопэ епархием пэщэныгъэ дызезыхьэрэ архиепископэу Тихонрэ.

Чылысым ишIын зэпыугъо ин зыфэ­хъугъэгъэ нэужым 2014-рэ илъэсым IофшIэнхэр аублэгъагъэх. ШIушIэным пылъ цIыфхэм, республикэм ипащэхэм яIэпыIэгъу хэлъэу чэзыу къиныр зэпычыгъэ хъугъэ.

Непэрэ мафэм чэзыу-чэзыоу псэолъэ­шIыныр лъэкIуатэ. Конструкциехэр зэхагъэуцогъахэх, чылысым иодыджынышхоу метрэ 41-рэ зилъэгагъэм ияруситIу хьазыр. Унашъхьэм, унэкIоцI Iоф­хэм, инженер коммуникациехэм япхыгъэ IофшIэнхэр макIох.

Чылысым ишIын лъыгъэкIотэгъэным епхыгъэ Iофыгъохэм зыщатегущыIэгъэхэ лъэхъаным КъумпIыл Мурат къалэм ипащэ пшъэрылъ фишIыгъ чылысым къыпэIулъ чIыпIэм изэтегъэпсыхьанкIэ дизайн-проектыр зэхэгъэуцогъэным епхыгъэ Iофыгъохэм ауж ихьанэу.

— Къалэм игупчэ мэщытыр, АР-м и Лъэпкъ музей, Къэралыгъо филармониер зыдэщыIэхэм композиционнэ зыкIыныгъэу яIэщтым зыкIэ щыщ хъущт чылысыр цIыфхэмкIэ Iэрыфэгъоу хъун фае, зыгъэпсэфыпIэ шъолъыр а псэуалъэ­хэм япэчIынатIэу агъэпсыщт. IофшIэнхэр амал зэриIэкIэ нахь псынкIэу ухыгъэнхэм тынаIэ тет. Чылысхэмрэ мэщытхэмрэ яшIын цIыф лъэпкъ зэфэшъхьафхэм къахэкIыгъэхэу Адыгеим щыпсэухэрэмкIэ мэхьанэшхо иIэу щыт, лъэпкъэу къызыхэкIыгъэхэм, динэу алэжьырэм ямы­лъы­тыгъэу зэкIэми зэгурыIоныгъэрэ зэзэгъыныгъэрэ азыфагу илъэу респуб­ликэм щыпсэунхэм иамал ащ къытыщт, — къыIуагъ КъумпIыл Мурат.

Къалэм имэр игъусэу зэтегъэпсыхьан IофшIэнхэр зыщыкIохэрэ нэмыкI чIыпIэу къалэм иIэхэм ащыщхэр къаплъыхьагъ.