УФ-м и Социальнэ фонд кIэлэцIыкIухэм ыкIи сабый ежэрэ бзылъфыгъэхэм апае зы пособиеу агъэнэфагъэр 2023-рэ илъэсым аритынэу ригъэжьэщт.

Илъэс 17-м зыныбжь шIомыкIыгъэ кIэлэцIыкIу е зихэхъогъу зэрыс унагъоу зигъот макIэхэм афакIощтыгъэ IэпыIэгъу зэфэшъхьафхэр къызэлъеубытых а зыкI ахъщэ тыным. Законым къызэрэдэлъытагъэмкIэ, уна­гъом гъотэу иIэр нэбгырэ пэпчъ телъытагъэу, зым тефэрэр цIыфыр зэрыпсэун ылъэкIыщт ахъщэ анахь макIэу шъолъырым щагъэнэфагъэм кIэмыхьэрэмэ, ащ къыхеубытэ.

Пособиер зыфэдизыщтыри гъотэу унагъом иIэм елъытыгъ. ЦIыфыр зэрыпсэун ылъэкIыщт ахъщэ анахь макIэм ызыныкъо, ипроцент 75-рэ е проценти 100 къатыщтыр. Урысыер пштэмэ, гурытымкIэ лъытагъэу, сомэ мини 7 — 14 мазэм унагъом фэкIонэу щагъэнэфагъэр. Сабый ежэрэ бзылъфыгъэхэм япособие, ари гурытымкIэ лъытагъэу, сомэ мини 7,8 — 15,7-рэ хъущт. Мы уахътэм ахэм къаратырэр цIыфыр зэрыпсэун ылъэкIыщт ахъщэ анахь макIэм ипроцент 50-м фэдиз.

Зы пособием игъорыгъоу техьажьынхэу унагъохэм амал яI. ГущыIэм пае, ахъщэ тыныр къыфэкIонэу зыгъэпсыгъахэхэр, ащ пIалъэу пылъыр аухыфэкIэ пособиякIэм пае лъэIу тхылъыр амытын фитых. 2023-рэ илъэсыр къимыхьэзэ кIэлэцIыкIур къэхъугъэмэ, ащ ыныбжь илъэ­си 3-м нэсыфэкIэ пособиер джы непэ щыIэ шапхъэхэм ате­тэу къыфэкIонэу фитыныгъэ иI.

Мы зыкI пособием ишIуагъэ­кIэ бзылъфыгъэр сабый къы­фэхъунэу зыщежэрэм къыщыублагъэу, ащ ыныбжь илъэс 17-м нэсыфэкIэ къэралыгъо IэпыIэгъу иIэщт. Ахъщэ тынхэм ягъэпсын къызэрыкIоу ыкIи унагъохэмкIэ гурыIогъошIоу щыт.

ПособиякIэхэм апае лъэIу тхылъхэр къэралыгъо фэIо-фашIэ­­хэм япортал мы мафэхэм щатынхэу унагъохэм амал яI. Къи­хьащт илъэсым ищылэ мазэ и 9-м щыублагъэу МФЦ-м ыкIи Социальнэ фондым иофисхэм аштэнхэу рагъэжьэщт.

Ахъщэ тынхэм апылъ къэбархэр УФ-м ПенсиехэмкIэ ифонд иинтернет нэкIубгъоу «https://pfr.gov.ru/grazhdanam/edinoe_posobie/» зыфиIорэм ижъугъотэщт.

УФ-м ПенсиехэмкIэ ифонд и Къутамэу АР-м щыIэм ипресс-къулыкъу.