Украинэм щыкIорэ хэушъхьафыкIыгъэ дзэ операциер анахь хъугъэ-шIэгъэ инэу мы уахъ­тэм зытегущыIэхэрэм ащыщ. Илъэсэу икIырэм ащ епхыгъэ Iофыгъуабэ Адыгеими щызэшIуахыгъ, IофшIэныр лъагъэкIуатэ.

УФ-м и Президент иуна­шъокIэ Луганскэ ыкIи Донецкэ народнэ республикэхэм цIыфэу арысхэр къэухъумэгъэнхэм фытегъэпсыхьэгъэ хэушъхьа­фыкIыгъэ дзэ операциер 2022-рэ илъэсым мэзаем и 24-м рагъэжьагъ.

Украинэм щыкIорэ операциер мамырныгъэр къэухъумэ­гъэным зэрэфэIорышIэрэм яцыхьэ зэрэтелъыр бэмэ ха­гъэунэфыкIы.

— Донецкэ ыкIи Луганскэ республикэхэм цIыфэу арысхэр щынэгъончъэу зэрэпсэущтхэм тицыхьэ телъ хъумэ, ахэр хэу­шъхьафыкIыгъэ субъектэу зэрэщытхэм, Къырым Урысые Федерацием зэрэщыщым Киев адыригъаштэмэ, операциер къэдгъэуцущт, — дзэ опера­циер зырагъажьэм къыIуагъ Владимир Путиным.

Охътэ гъэнэфагъэм къыкIоцI Донецкэ ыкIи Луганскэ рес­публикэхэр Урысыем щыщ хъу­гъэх. ХэушъхьафыкIыгъэ дзэ операциер мамырныгъэ зэдэгущыIэгъухэмкIэ зэшIуигъэкIынэу Урысыем и Главнокомандующэ ыуж итыгъ, ау Украинэм ипащэхэр ащ къезэгъыгъэхэп.

Къулыкъур ахьынэу къызтефэхэрэм къяджагъэх

Тикъэралыгъо ищынэгъон­чъагъэ къэухъумэгъэным фэшI Iоныгъом и 20-м къыщегъэжьагъэу «частичнэ мобилизациер» Урысыем щырагъэжьагъ.

Украинэм щыкIорэ хэушъхьафыкIыгъэ дзэ операцием нафэ къытфешIы Урысыем ицIыфыбэмэ яхэгъэгу шIу зэралъэгъурэр, патриотэу зэрэщытхэр.

— Къыблэ федеральнэ шъо­лъырым иштаб республикэм ыпашъхьэкIэ къыгъэуцугъэ пшъэ­рылъыр икъоу гъэцэкIагъэ хъугъэ. «Частичнэ мобилизацием» къыдыхэлъытагъэу пшъэрылъэу агъэнэфагъэхэр дэгъоу зэшIозыхын зылъэкIыщт цIыф купхэр ары анахьэу тыкъызэджагъэхэр. ПчъагъэкIэ къэпIон хъумэ, запасым щысхэу мобилизацием къыхиубытэхэрэм ащыщэу зы процент — нэбгырэ миным ехъу — Адыгеим икIыгъэр. Зы артиллерийскэ полк псау тирес­публикэ икIыгъэхэм агъэпсыгъ, ащ хэмыфагъэхэр дзэ частьхэм, щыкIагъэу яIэм елъыты­гъэу, ахагъэхьащтых, джыри шIои­гъоныгъэ зиIэхэр игъорыгъозэ куп-купэу макIох, —къы­Iуагъ АР-м идзэ комиссариат ипащэу Александр Авериным.

Адыгеим и ЛIышъхьэ пшъэ­рылъ зэрафишIыгъэм тетэу республикэм исхэу мобилизацием къыхиубытагъэхэм, хэу­шъхьафыкIыгъэ дзэ операциер зыщыкIорэ чIыпIэм щыIэ тичIыпIэгъухэм ыкIи ахэм яунагъохэм ящыкIэгъэ IэпыIэгъур ягъэгъотыгъэнымкIэ тишъолъыр Iофхэр щылъагъэкIуатэх.

— Анахь пшъэрылъ шъхьаIэ­хэм ащыщ дзэ къулыкъушIэхэмрэ ахэм яунагъохэмрэ яIофыгъохэр псынкIэу зэшIохыгъэнхэр. Ти Хэгъэгу къэзыухъумэхэрэм лъэ­ныкъо пстэумкIи IэпыIэгъу ягъэ­гъотыгъэным непэ мэхьанэшхо иI, — къыIуагъ Адыгеим и ЛIышъхьэу КъумпIыл Мурат.

ХэушъхьафыкIыгъэ дзэ операцием хэлажьэхэрэм яунагъо­хэм социальнэ IэпыIэгъу ягъэгъотыгъэнымкIэ, зэтыгъо ахъщэ IэпыIэгъу аIэкIэгъэхьэгъэнымкIэ ищыкIэгъэ амалхэр республикэм щызэрахьагъэх. Дащыгъэ­хэм республикэм щагъэнэфэгъэ сомэ мини 100 зырызыр аратыгъ. Социальнэ газификациемкIэ программэм къызэрэщыдэлъытагъэу, субсидие зэратыщтхэу, фэгъэкIотэныгъэ зиIэхэм дзэ къулыкъушIэхэм яунагъохэр ахагъэхьагъэх. Мобилизацием хэфагъэхэм ыкIи гуфитхэм якIэ­лэцIыкIухэу еджапIэхэм ачIэсхэм ыпкIэ хэмылъэу шхын стыр аIэкIагъахьэ, ны-тыхэу зисабый кIэлэцIыкIу IыгъыпIэм зыщэхэ­рэми ыпкIэ атырэп. Джащ фэдэу Адыгэ Республикэм и Къэралыгъо Совет — Хасэм идепутатхэр икIэщакIохэу хэушъхьафыкIыгъэ дзэ операцием хэлажьэ­хэ­рэм транспорт хэбзэIахь амытыным фэгъэхьыгъэ хэбзэгъэуцугъэ республикэм щаштагъ.

ЦIыфхэм яшIуагъэ арагъэкIы

НепэкIэ анахь зигъо пшъэ­рылъхэм зыкIэ ащыщ егъэзыгъэ IофкIэ Херсонрэ Херсон хэкум­рэ къэзыбгынэхи Адыгеим зы­къэзыгъэзэжьыгъэхэм IэпыIэгъу афэхъугъэныр. Ахэм афэдэу республикэм нэбгырэ 521-рэ къэкощыгъ. Адыгеим и ЛIышъхьэу КъумпIыл Мурат ежь ышъ­хьэкIэ ахэм апэгъокIыгъ. ПIэлъэ гъэнэфагъэкIэ пункти 4-мэ къэ­кощыгъэхэр атырагощагъэх, псэунхэмкIэ ящыкIэгъэ амалхэр къыдалъытагъэх. Ахэр къызыщыуцугъэ чIыпIэхэм тащыIагъ, гущыIэгъу тафэхъугъ.

Мы уахътэм зышъхьэ къезы­хьыжьэжьыгъэхэм документхэм ягъэпсынкIэ IэпыIэгъу гъэ­нэфагъэ араты: урысые пас­портхэр, СНИЛС-хэр, банк кар­тэхэр, сим-картэхэр аIэкIагъахьэх. Джащ фэдэу респуб­ликэм зэтыгъоу унагъом исым пэпчъ сомэ мин 20 зырыз хъурэ ахъщэ IэпыIэгъур, уна­гъом агъэфедэщт IапIэхэр къызэращэфын алъэкIыщт сомэ мини 100 зырыз ыкIи игъорыгъозэ унэ сертификатхэр аратых.

Зышъхьэ къезыхьыжьэжьыгъэхэм гъомылапхъэхэмкIэ, щы­гъынхэмкIэ, цIыфым нахь ищыкIэгъэ пкъыгъо зэфэшъхьаф­хэмкIэ Адыгеим исхэр IэпыIэгъу афэхъух.

ШIушIэ IэпыIэгъур

Партиеу «Единэ Россиемрэ» республикэ штабэу «Тэ тызэгъус» зыфиIорэмрэ икIэщакIохэу хэушъхьафыкIыгъэ дзэ операциер зыщыкIорэ чIыпIэми, Херсон хэкумкIэ Геническэ рай­онми гъомылапхъэхэр, рациехэр, щыгъын фабэхэр, автомобиль щэрэхъ ыкIи нэмыкI пкъыгъохэр зыхэхьэрэ шIушIэ IэпыIэгъур аIэкIагъахьэ.

Шъугу къэдгъэкIыжьын политическэ партиеу «Единэ Рос­сиер» хэушъхьафыкIыгъэ дзэ операциер зырагъэжьагъэм къы­щыублагъэу Донбасс зы­шъхьэ къизыхыжьыгъэхэми, шъхьафит ашIыжьыгъэ чIыпIэхэм къарынагъэхэми IэпыIэгъу зэрафэхъурэр. Херсон хэкум и Геническэ район щыпсэухэрэм тхыгъэ къагъэхьыгъ къиныгъо зыщыхэтхэ уахътэм Адыгеим исхэр IэпыIэгъу къазэрафэхъугъэхэмкIэ зэрафэразэхэр къыщиIоу. Аужырэ пчъагъэхэмкIэ, хэушъхьафыкIыгъэ дзэ операциер зырагъэжьагъэм къы­щыублагъэу «Урысые народнэ фронтым» АдыгеимкIэ ишъо-­ лъыр къутамэ шIушIэ IэпыIэ­гъоу тонни 7, шъолъыр партиеу «Единэ Россием» тонн 200 аугъоигъ ыкIи ащ арагъэщагъ.

IэпыIэгъур зэпагъэурэп. ГущыIэм пае, джыдэдэм аугъои илъэсыкIэ ыкIи рождественскэ мэфэкIхэм яхъулIэу арагъэщэщтыр. Геническэ щыпсэурэ кIэ­лэцIыкIухэм апае шIухьафтын мин 12,5-м ехъу атIупщыщт. Херсон хэкум къикIыжьыгъэ кIэлэцIыкIухэми джащ фэдэу шIухьафтынхэр аратыщтых. Мы Iофыгъом фэгъэхьыгъэу КъумпIыл Мурат къызэриIуагъэмкIэ, хабзэ зэрэхъугъэу, илъэсыкIэ шIухьафтын IэшIухэр а 1 — 4-рэ классхэм ащеджэхэрэм зэкIэми аIокIэх. Анахьэу анаIэ зытетыщтхэр зипсауныгъэкIэ щыкIагъэ зиIэ сабыйхэр ары. Мыхэм апае шIушIэ илъэсыкIэ мэфэкIхэр зэхащэх.

Iэшъынэ Сусан.