Республикэм икъэлэ шъхьаIэ изыгъэпсэфыпIэ зэтегъэпсыхьагъэхэм шIэхэу джыри зы къахэ­хъощт — къэблэгъэрэ илъэсныкъом Къэралыгъо филармонием къыпэIулъ чIыпIэр къэмышIэжьынэу зэтырагъэпсыхьащт ыкIи къэлэдэсхэм ямызакъоу, хьакIэу къакIохэрэми якIопIэщт.

Филармонием ыгупэхэр зэрагъэдэхэщтхэм имызакъоу, инженернэ псэуалъэхэу ыгъэфедэхэрэри зэблахъущтых. Квадратнэ метрэ мин 14 фэдиз хъурэ чIыналъэу къыпэIулъым цIыфхэм къызщакIухьан алъэ­кIыщт гъогужъыехэр пхыры­щыгъэщтых, тIысыпIэхэр агъэуцущтых, къэгъэгъэ къэгъэкIыпIэ­хэр щызэтыраутыщтых, розэхэм яаллее къытеуцощт, къэ­зыгъэ­нэфырэ пкъыгъохэр ха­гъэу­цощтых. Гупчэм бгъэгъэ хъурэе фыжьышхо рагъэуцощт, ащ хъэ­ренэхэр зэфэдэу палъэщтых.

— Пшъэрылъ афэсшIыгъ пстэури зэдиштэу зы шапхъэ иIэу зэтырагъэпсыхьанэу. СкверыкIэр зэрэIэрыфэгъущтым имызакъоу, лъэхъаным диштэу, нэр ыгъэгушIоу щытын фае, — къыхигъэщыгъ КъумпIыл Мурат.