Лъэпкъ зэфыщытыкIэхэмкIэ, дин объединениехэм адэлэ­жьэ­гъэнымкIэ Советэу Адыгэ Республикэм и ЛIышъхьэ дэжь щызэхэщагъэм изэхэсыгъо тыгъуа­сэ щыIагъ.

АР-м и ЛIышъхьэу КъумпIыл Мурат унашъо къызэрэфишIыгъэм тетэу Iоф­тхьабзэм тхьамэтагъор щызэрихьагъ Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэ­гъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр.

Iофтхьабзэм хэлэжьагъэх Адыгэ Рес­публикэмрэ Пшызэ шъолъыррэ ащы­псэурэ быслъымэнхэм ямуфтиеу Къэр­дэнэ Аскэрбый, Мыекъуапэрэ Адыгеимрэ яархиепископэу Тихон, лъэпкъ общественнэ объединениехэм япащэхэр, министерствэхэм, ведомствэхэм ялIыкIохэр, муниципалитетхэм яIэшъхьэтетхэр.

Шъхьэлэхъо Аскэр пэублэ гущыIэ къышIызэ къыIуагъ гушъхьэбаиныгъэр къэухъумэгъэнымкIэ ыкIи гъэпытэгъэнымкIэ къэралыгъо политикэр пхырыщыгъэным общественнэ лъэпкъ-культурнэ объединениехэр, дин организациехэр чанэу зэрэхэлажьэхэрэр. ЦIыфхэм яхэ­гъэгу шIу алъэгъоу, унагъом уасэ фашIэу пIугъэнхэмкIэ, лъэпкъ зэгурыIоныгъэ ахэлъэу зэдэпсэунхэмкIэ дин организациехэм мэхьанэшхо зэряIэр хигъэунэфыкIыгъ. Дин зэфыщытыкIэхэм ягъэпытэн епхыгъэу пшъэрылъ заулэ къыгъэнэфагъ. Дин организациехэмрэ лъэпкъ общественнэ объединениехэмрэ Iофтхьабзэу зэрахьэхэрэм ныбжьыкIэхэр нахьыбэу къахагъэлэжьэн зэрэфаем анаIэ тыраригъэдзагъ. Джащ фэдэу гъэсэныгъэмрэ культурэмрэ алъэныкъо­кIэ къэралыгъо политикэу зэрахьэрэм лъэпкъ, дин объединениехэр зэрэхэлажьэхэрэм мэхьанэшхо зэриIэр комитетым ипащэ къыхигъэщыгъ.

— Республикэм зыпкъ итэу хэхъоныгъэ ышIын зилъэкIыщтыр, тихэгъэгу щыпсэухэрэм ящыIэкIэ-псэукIэ зыкъызиIэтыщтыр общественнэ зэгурыIоныгъэ щыIэ зыхъукIэ ары, — къыIуагъ Шъхьэ­лэхъо Аскэр.

Нэужым зэхэсыгъом хэлажьэхэрэр Адыгэ Республикэмрэ Пшызэ шъолъыр­рэ ащыпсэурэ быслъымэнхэм я Дин­дэлэжьапIэ, Мыекъуапэрэ Адыгеимрэ яепархие Iофэу ашIэрэм фэгъэхьыгъэ къэбархэм ядэIугъэх.

Республикэм идин организациехэр зэрэзэдэлажьэхэрэр, социальнэ мэхьанэ зиIэ проектхэм япхырыщынкIэ респуб­ликэм ипащэхэр IэпыIэгъу къазэрафэ­хъухэрэр дин пащэхэм хагъэунэфы­кIыгъ.

АР-м и Общественнэ движениеу «Адыгэ Хасэм» республикэм игъэцэкIэкIо хэбзэ къулыкъухэр ыкIи федеральнэ гъэцэкIэкIо къулыкъухэр игъусэхэу 2022-рэ илъэсым Iоф зэрэзэдашIагъэхэм къатегущыIагъ Адыгэ Хасэм ипащэу ЛIымыщэкъо Рэмэзан. Ащ къыIотагъ экстремизмэм ыкIи терроризмэм ащыухъумэгъэнхэмкIэ, лъэпкъ зэфыщытыкIэхэр гъэпытэгъэнхэмкIэ хэбзэ гъэцэ­кIэкIо къулыкъухэм, министерствэхэм, ведомствэхэм ялIыкIохэр ягъусэхэу республикэм ирайонхэр зэкIэ къызэракIухьагъэхэр, цIыф зэхахьэхэр рагъэ­кIокIыхэзэ зэдэгущыIэгъухэр зэрада­шIыгъэхэр. IэкIыбым къикIыжьыгъэ тимылъэпкъэгъухэр нахьыбэу зыдэс псэу­пIэхэм анахьэу анаIэ атырагъэтыгъ, ахэм лъэпкъ зэгурымыIоныгъэ къахэмыхьаным, мамырэу зэдэпсэунхэм къы­фэджагъэх.

Лъэпкъ-культурэ объединениехэм Адыгэ Республикэм игъэцэкIэкIо хэбзэ къулыкъухэм, хабзэм ифедеральнэ къу­лыкъухэм ячIыпIэ подразделениехэм зэдэлэжьэныгъэ зэрадыряIэми зэхэсыгъом щытегущыIагъэх.

КIАРЭ Фатим.