Псауныгъэм лъэшэу егоорэ веществор Адыгэ Респуб­ликэм щыпсэурэ бзылъфыгъэм гъэбылъыгъэкIэ къызэрэригъэ­кIокIыгъэм епхыгъэ уголовнэ Iофэу къыфызэIуахыгъэм ихэплъэн ыкIэм фэкIуагъ.

ЩынэгъончъэнымкIэ федеральнэ ­къулыкъум и ГъэIорышIапIэу АР-м щыIэм Н. Л. Плотниковам уголовнэ Iофыр къыфызэIуихыгъ ыкIи зэхифыгъ.

ГъэIорышIапIэм икъулыкъушIэхэм зэрагъэунэфыгъэмкIэ, 2022-рэ илъэсым, мэлылъфэгъум илъэс 45-рэ зыныбжь бзылъфыгъэу поселкэу Яблоновскэм щыщым ИнтернетымкIэ IэкIыб къэралым щыщ ымышIэрэ цIыфым оды зызэра­шIырэ препаратэу «сибутраминыр» (бгъэфедэ мыхъущт препаратхэм ахэхьэ) зыхэлъыр грамм 600-м ехъоу къыщищэфыгъ.

Почтэ дунэе каналыр бзылъфыгъэм къызфигъэфеди, УФ-м икъэралыгъо гъунапкъэ къызэпичи хэбзэнчъэу Адыге­им веществор къырищагъ. Бгъэфедэ мыхъущт препаратыр почтэм къычIи­хыжьызэ щынэгъончъэнымкIэ федеральнэ къулыкъум и ГъэIорышIапIэу АР-м щыIэм икъулыкъушIэхэм ар къаубытыгъ.

2022-рэ илъэсым шэкIогъум и 7-м Тэхъутэмыкъое район хьыкумым Н. Л. Плотниковар ыгъэмысагъ, илъэси 4 хьапс условнэу тырилъхьагъ.

Унашъом кIуачIэ иIэ хъугъэ.

ЩынэгъончъэнымкIэ федеральнэ къулыкъум и ГъэIорышIапIэу АР-м щыIэм ипресс-къулыкъу.