Карачаевск къалэм дэт, Алиев Умар и цIэр зезыхьэ Къэрэшей-Черкес къэрал университетым къыщапщытэжащ «Мы разные, но равные» зи фIэщыгъэцIэ XII Хэгъуэгузэпх IэщIагъэ зэпеуэр.

Мыбы зыкъыщагъэлъэгъуэну лъэкIыныгъэ яIащ Ищхъэрэ-Кавказ федеральнэ хэгъуэгумрэ Адыгэ Республикэмрэ анэ-дэлъхубзэмрэ литерату-рэмрэкIэ я егъэджакIуэ нэхъыфIхэм. Мы зэхьэзэхуэр илъэс къэс­кIэ ирагъэкIуэкI. ИкIи абы и иужьрей зэпеуэм ди хэгъуэгум щыщым бжьыпэр зэрыщиубыдам къыхэкIыу, мыгъэрей зэхьэзэхуэм и къызэгъэпэщакIуэ пщэ­рылъыр ди республикэм къылъы­сащ.

ЛъэпкъыбзэхэмкIэ егъэджа­кIуэхэм я хэгъуэгузэпх зэпеуэр хуэунэтIащ лъэпкъхэр зэшэлIэным, бзэм ехьэлIа лъэпощхьэпохэр сэтей щIауэ утыку къи­хьэным, анэдэлъхубзэр егъэ­джыным ехьэлIауэ къыхэлъхьэныгъэ-щIэхэмкIэ зэдэгуэшэным.

Зэпеуэм и къэпщытэжы-ныгъэ махуэм абы къекIуэ- лIащ, уеблэмэ икIэм нэс хэтащ КъЧР-м егъэджэныгъэмрэ щIэ­ныгъэмрэкIэ и министр Кравченко Иннэ, абы и къуэ­дзэ Бэчыжь Фа-тимэ, КъЧкъУ-м и ректор Узденов ТаусулътIан, егъэджэныгъэмкIэ Урысейпсо Профсоюзым и республикэ къудамэм и пашэ Чотчаевэ Маринэ, нэгъуэщIхэри.

Ищхъэрэ Осетие-Аланием, КъБР-м, АР-м, Шэшэн, Ингуш республикэхэм, Ставрополь крайм, КъЧР-м къабгъэдэкIа егъэджакIуи 9-м утыку кърахьащ я IэщIагъэ IэпщIэлъапщIагъыр, ябгъэдэлъ Iуэху зэхэщIыкIыр, щIэныгъэр, ирагъэкIуэкI къэхутэныгъэ лэжьыгъэхэр.

МахуищкIэ екIуэкIа зэхьэзэхуэм и япэ Iыхьэм зэпеуэм хэтахэм видео-презентацэ IэмалымкIэ утыку кърахьащ зыщыщ хэгъуэгум и дахагъыр, и гуакIуагъыр, ябгъэдэлъщ хъу­гъуэ­фIыгъуэхэр.

ЕтIуанэ махуэм — зэпеуэр IыхьитIу ягуэшащ. Япэрейр: «визитная карточка» зыфIаща, егъэджакIуэм бгъэдэлъ творческэ лъэкIыныгъэхэр, щIэныгъэр къыздыщигъэлъэгъуа Iыхьэщ; етIуанэр — «методическая мас­терская» жыхуаIэу дерсыр зэ­ры­рагъэкIуэкIымкIэ мастер-класс егъэджакIуэхэм здыщата Iыхьэщ.

Япэ дакъикъэхэм щыщIэдзауэ нэрылъагъу хъуащ бжьыпэр зыубыдыну нэрыбгищыр. ИкIи, жюрим текIуэныгъэр хуигъэфэщащ Шэшэн Республикэм щыщ, шэшэныбзэмкIэ егъэджакIуэ Бангачиев Эдик.

Ди республикэм къыбгъэ­дэ­кIа, Ищхъэрэ Тебэрды курыт еджапIэм къэрэшеибзэмкIэ щезыгъаджэ Байчоров Ринат къыхагъэщащ «Кавказым и хабзэхэм и хъумакIуэ» номинацэмкIэ.

Гуапэ зэрытщыхъуну, хэ- гъуэгу куэд къызэщIэзыубыда зэпеуэм етIуанэ, ещанэ увыпIэхэр къалъэщащ адыгэ-бзэмкIэ и егъэджакIуэхэу Къэбэрдей-Балъкъэрым щыщ Гулажын Маринэрэ Адыгэ Республикэм къыбгъэдэкIа Мыгу Анжелэрэ. Адыгэ фащэр ящыгъыу, адыгэбзэр дахэу утыкум къизыхьа ди лъэпкъэгъу бзылъхугъэхэм ябгъэдэлъ щIэныгъэмкIи, зыкъэгъэлъэгъуэныгъэхэмкIи жюрир къахьэхуащ, езыхэри къыхагъэ­щащ.

Абыхэм утыкур зэрагъэдэхам адыгэм и пщIэр хуабжьу къиIэтащ. Дригушхуэу дыкъыщIэкIыжащ къуэш хэгъуэгухэм щыщ ди лъэпкъэгъу егъэджакIуэ­хэм къагъэлъэгъуа ехъулIэныгъэхэм.

Махуэ псом екIуэкIа зэхьэзэхуэр уэрэджыIэ, къэфакIуэ концерт программэкIэ ягъэбжьыфIащ. Зэпеуэм и кIэм абы хэтахэм саугъэтхэмрэ ФIыщIэ тхылъхэмрэ хуагъэфэщащ.

Хэгъуэгу зэхуэмыдэхэм щыщу къеблэгъа хьэщIэхэми, зэпеуэм хэтахэми фIыщIэ хуащIащ фIагъ лъагэ иIэу XII Хэгъуэгу­зэпх IэщIагъэ зэпеуэр къызэзыгъэпэща, КъЧР-м егъэджэны­гъэмрэ щIэныгъэмрэкIэ и Министерствэмрэ Алиев У. и цIэр зезыхьэ КъЧкъУ-мрэ.

Сурэтым щыволъагъу: сэмэгумкIэ къыщегъэжьауэ МыгуАнжелэ, Бангачиев Эдик, Гулажын Маринэ сымэ.

АСЛЪЭНЫКЪУЭ Мадинэ.