Урысыем и Президентэу Владимир Путиным Урысые Федерацием и Къэралыгъо Совет изэхэсыгъо тыгъуасэ зэрищагъ. Ар зыфэгъэ­хьыгъагъэр джырэ лъэхъаным ныбжьыкIэ по­литикэр пхырыщыгъэным иIофыгъохэр ары. Адыгеим и ЛIышъхьэу КъумпIыл Мурат ащ хэлэжьагъ.

Зэхэсыгъор аублэным ыпэкIэ къэралыгъом ипащэ ныбжьыкIэхэм я Унэу ЦВЗ-у «Мане­жым» щыIагъ. Хабзэ зэрэхъугъэу, Владимир Путиныр урысые шIушIэ Iофтхьабзэу «Елка желаний» зыфиIорэм хэлэ-жьагъ ыкIи ныбжьыкIэ политикэм ипроект шъхьаIэхэм нэ­Iуасэ зафишIыгъ, ныбжьыкIэ со­обществэхэм ялIыкIохэм гущыIэгъу афэхъугъ.

Къэралыгъо Советым изэ­хэсыгъо къызэIуихызэ, Урысыем и Президент стратегическэ лъэныкъомкIэ Iофыгъоу зыте­гущыIэхэрэм мэхьэнэ гъэнэфагъэ зэриIэр къыхигъэщыгъ ыкIи ныбжьыкIэхэм яIофшIэнкIэ теурыкIуагъэ къызхагъафэ зэрэмыхъущтыр къыIуагъ. Къэралыгъом ипащэ къызэриIуагъэмкIэ, хэгъэгум ныбжьыкIэ миллион 40 фэдиз щэпсэу. Ахэр ыпэкIэ лъыкIотэнхэм, гъэхъа­гъэхэр ашIынхэм фытегъэпсы­хьагъэх. Непэ анахь мэхьанэ зиIэ пшъэ­рылъхэм ащыщыр ныб­жьыкIэхэм якъарыурэ яамал­рэ хэгъэгупсэм игъэпытэн фэгъэIорышIэгъэныр ары.

«Мы аужырэ илъэсхэм со­циальнэ лъэныкъомкIэ амалыкIэхэр щыIэ хъугъэх. Хэгъэгум щызэлъашIэрэ платформэу «Рос­сия — страна возможностей» зыфиIорэм игугъу къэсшIынэу сыфай. Ащ ипроектхэм ыкIи зэнэкъокъоу зэхищэ­хэрэм ныбжьыкIэхэм сэнэхьатэу зэрагъэгъотыщтымкIэ ама­лэу яIэхэм япхырыщын фытегъэпсыхьэгъэ шIыкIэ зэфэшъхьафхэр къыдалъытэх, — къы­Iуагъ Владимир Путиным. —Зэрэхэгъэгоу ныбжьыкIэхэм IэпыIэгъу ятыгъэныр хабзэ щы­хъун фае, зэкIэ ныбжьыкIэхэм шъхьафитэу амалэу щы­Iэхэр къызфагъэфедэнхэ, гъэсэныгъэ дэгъу зэрагъэгъотын, агу пэблэгъэ IофшIэн гъэ­шIэгъон агъэцэкIэнымкIэ, сабыйхэр къафэхъунхэмкIэ ыкIи зычIэсыщтхэ унэхэр яIэ хъунхэмкIэ къэралыгъор зэрафэгумэкIырэр зэхашIэн фае».

НыбжьыкIэ политикэм чIыпIэхэм псынкIэу хэхъоныгъэ ащишIыным пае мы илъэсым программэу «Регион для мо­лодых» зыфиIорэр агъэцакIэу рагъэжьагъ. Мы илъэс благъэ­хэм зэнэкъокъур ылъапсэу Фе­дерацием ишъолъырхэм сомэ миллиард 15 аIэкIагъэхьащт. Гъэсэныгъэм ылъэныкъокIи про­ектхэр щыIэх, мары илъэситIу фэдиз хъугъэу обществэу «ШIэныгъ» зыфиIоу зыпкъ рагъэуцожьыгъэм гъэхъагъэ хэлъэу ипшъэрылъхэр егъэцакIэх. Владимир Путиным Урысыем иапшъэрэ еджапIэхэм япроектэу «Университетские смены» анаIэ тыраригъэдзагъ. Урысыем ишъолъыр зэфэшъхьафхэм яхэбзэ-зэхэтыкIэхэр ыкIи якультурэ афэгъэхьыгъэу нахьыбэ ашIэным иамал ащ къеты. Донецкэ ыкIи Луганскэ народнэ республикэхэм, Запорожскэ ыкIи Херсон хэкухэм яныб­жьыкIэхэмкIи ащ мэхьанэ иIэу щыт. Къэралыгъо Советым изэхэсыгъо ахэм ялIыкIохэри щыIагъэх.

«ЗэрэслъытэрэмкIэ, кIалэхэм ыкIи пшъашъэхэм цIыф цIэрыIоу тиIэхэм: инженерхэм, конструкторхэм, шIэныгъэлэжьхэм афэгъэхьыгъэу нахьыбэ ашIэным тынаIэ тедгъэтыщт. Королевым, Курчатовым, Вавиловым ыкIи нэмыкIхэу тихэгъэгу анахь лъэ­ныкъо шъхьаIэхэмкIэ апэрэ чIы­пIэхэр ыIыгъынхэмкIэ зигъэ­хъагъэхэр лъэпсэшIу хъугъэхэр ащыгъупшэхэ хъущтэп. ТиныбжьыкIэхэр яхэгъэгу фэшъып­къэхэу пIугъэнхэмкIэ ащ фэдэ щысэхэм мэхьанэшхо яIэу щыт», — къыIуагъ Владимир Путиным.

ЧIыпIэхэм ныбжьыкIэхэм Iоф ащыдэзышIэхэрэм, специалистхэм IэпыIэгъу ятыгъэнымкIэ ыкIи ахэр лъыгъэкIотэгъэнхэмкIэ, Урысыем иныбжьыкIэхэм амалэу яIэхэр нахь къызэIухыгъэнхэмкIэ Президентым пшъэ­рылъ къыгъэуцугъ. Анахьэу Пре­зидентым зигугъу къышIыгъэхэм ащыщых хэушъхьафыкIыгъэ дзэ операцием ишъолъыр Iоф щызышIэрэ волонтерхэм зэшIуахыхэрэр. НыбжьыкIабэхэмкIэ ахэр щысэшIу хъущтых. Ащ дакIоу къэралы­гъом ипащэ пшъэрылъ къыгъэу­цугъ колледжхэм ыкIи апшъэрэ еджапIэхэм ачIэсхэм еджэным дакIоу волонтер гупчэхэми Iоф ащашIэным иамалхэр арагъэ­гъотынхэу.

Зэхэсыгъом илъэхъан къэгущыIагъэхэм ащыщых Къэра­лыгъо Советым икомиссиеу «НыбжьыкIэ политикэр» зыфиIорэ лъэныкъомкIэ зэхащагъэм итхьаматэу, Ямало-Не­нецкэ автоном коим игубер­наторэу Дмитрий Артюховыр, Урысые Федерацием и Правительствэ и Тхьаматэ игуадзэу Татьяна Голиковар, Росмолодежым ипащэу Ксения Разу­ваевар.

Урысые Федерацием 2030-рэ илъэсым нэс ныбжьыкIэ политикэр зэрэщыпхыращыщтым и СтратегиякIэ изэхэгъэуцонкIэ игъоу алъэгъухэрэр къахалъ­хьагъэх ыкIи Къэралыгъо Сове­тым хэтхэр хэлажьэхэзэ та­пэкIэ зэхащэгъэгъэ семинар­-зэ­IукIэм икIэуххэм къапкъыры­кIыгъэ еплъыкIэхэми ахэплъагъэх. Зэхэсыгъом игъо щалъэгъугъ кадрэхэм ягъэхьазырынкIэ гупчэу «Движения первых» зыфиIорэр зэхащэнэу, джащ фэдэу ныбжьыкIэхэм IофшIэн ягъэгъотыгъэнымкIэ IэпыIэгъу зэрафэхъущтхэ шIыкIэр гъэнэ­фэгъэнэу, Iэтахъохэм IофшIэн пIэлъэ гъэнэфагъэкIэ арагъэ­гъотын зыхъукIэ шапхъэхэр къыдалъытэнхэу. Дзэ къулыкъур къызаухкIэ ныбжьыкIэхэм Iоф­шIапIэ агъотынымкIэ гугъапIэ щыIэным, бизнес-проектхэр зэхагъэуцохэ зыхъукIэ IэпыIэгъу афэхъунхэм, джащ фэдэу ныбжьыкIэхэм Iоф адэзышIэхэрэм ялэжьапкIэ зыкъегъэIэтыгъэным, зэщыхъокIо кIуачIэхэр ныбжьыкIэхэм къахэмыхьанхэм ыкIи нэмыкIхэм япхыгъэ Iофыгъохэм атегущыIагъэх.

АР-м и ЛIышъхьэ къэбар жъугъэм иамалхэм яIофышIэхэм адыриIэгъэ зэдэгущыIэгъум зэ­рэщыхигъэунэфыкIыгъэмкIэ, зытегущыIэхэрэ Iофыгъор къэралыгъом иIэкIоцI политикэкIэ анахьэу мэхьанэ зиIэхэм ащыщ. НыбжьыкIэхэм IэпыIэгъу ягъэгъотыгъэнымкIэ хэгъэгум бэ ща­шIэрэр. Ау УФ-м и Президент ипсалъэ къыщигъэнэфэгъэ пшъэрылъыбэмэ язэшIохынкIэ бэ ашIэнэу къапыщылъ. Ныбжьы­кIэ политикэм ипхырыщынкIэ чаныгъэ къызыхагъэфэным, ныбжьыкIэхэм Iоф зэрадашIэрэ шIыкIэр зэблэхъугъэным, амалыкIэхэр къызыфэгъэфедэгъэнхэм, шIэныгъакIэхэр къызIэкIагъэхьанхэм фэгъэчэфыгъэнхэм, патриотическэ щысэ дэгъухэмкIэ ахэр пIугъэнхэм, кIэлэегъэ­джэ кадрэхэм ягъэхьазырын мэхьанэшхо яI. Ащ пае ныбжьыкIэ политикэмкIэ Адыгеим амал тедзэхэр агъэфедэх.

«Къэралыгъо ныбжьыкIэ политикэм ипхырыщын респуб­ликэм щыпылъыгъэр АР-м гъэсэныгъэмрэ шIэныгъэмрэкIэ и Министерств ары. Ау мы лъэны­къом Iофхэр нахьышIоу щызэ­хэщэгъэнхэм, ныбжьыкIэ ин­фраструктурэм зегъэушъом­бгъу­гъэным апае хэбзэ къулыкъу шъхьаф зэхэтщагъ», — къыIуагъ КъумпIыл Мурат.

Адыгеим и ЛIышъхьэ зэрэ­хигъэунэфыкIыгъэмкIэ, ныбжьыкIэ политикэм лъэныкъо зау­лэхэмкIэ республикэм зыщеушъомбгъу. Ащ хэхьэх гуфа­кIохэм ядвижение, дзэ-патриотическэ пIуныгъэр, унэгъо ныб­жьыкIэхэм IэпыIэгъу ягъэгъотыгъэныр, ныбжьыкIэ предпринимательствэм зегъэушъомбгъугъэныр, ныбжьыкIэ сэнаущ­хэм IэпыIэгъу афэхъугъэныр, щыIэкIэ-псэукIэ тэрэзым ахэр рыгъэгъозэгъэнхэр.

НыбжьыкIэ парламентым, Урысые кIэлэцIыкIу-ныбжьыкIэ дзэ-патриотическэ движениеу «Юнармия» зыфиIорэм ишъо­лъыр штаб республикэм чанэу Iоф щашIэ. КIэлэцIыкIухэмрэ ныбжьыкIэхэмрэ я Урысые движение ишъолъыр къутамэу бэмышIэу зэхащагъэр ылъэ теуцо. ГуфакIохэм ядвижение зиушъомбгъугъ —– мэхьанэшхо зиIэ социальнэ Iофыгъохэр ахэм зэшIуахых, тхьамыкIагъо хэ­фагъэхэм IэпыIэгъу афэхъух, Iофтхьэбзэшхохэм язэшIохын чанэу хэлажьэх. Мы движением республикэм зыщеушъомбгъу. ГуфакIохэм я Ресурснэ гупчэу «Волонтеры Адыгеи» зыфиIорэм непэкIэ нэбгырэ мин 65-рэ фэдиз къепхыгъ. Пандемием илъэхъани ахэм яшIуагъэ къагъэкIуагъ, мобилизацием къыхиубытагъэхэм, ахэм яунагъо­хэм, зышъхьэ къезыхьыжьэ­жьыгъэхэм, Геническэ районым ис­хэм IэпыIэгъу ягъэгъотыгъэным епхыгъэ Iофхэм яшъыпкъэу ахэлажьэх. НыбжьыкIэхэм «Единэ Россием» ипартийнэ проектыбэ, Iофтхьабзэу «МыВместе» зыфиIорэр, шIушIэ Iофтхьабзэхэр республикэм щы­зэрахьэх, фэныкъохэм IэпыIэгъу афэхъух.

Адыгеим и ЛIышъхьэ зэрэхигъэунэфыкIыгъэмкIэ, ныбжьыкIэхэр зыфытегъэпсыхьагъэхэр къагъэлъэгъонымкIэ социальнэ амалыбэ щыI. Гъэсэныгъэм, общественнэ щыIэныгъэм гъэ­хъагъэхэр ащашIынхэмкIэ, Iэ­натIэхэм щалъыкIотэнхэмкIэ республикэм зэфэдэ амалхэр щарагъэгъотых.

«ЗиIоф хэшIыкIышхо фызиIэ, кIочIэшхо зиIэ, зэхъокIыныгъэшIухэм афэблэрэ ныбжьыкIэхэр тищыкIагъэх. Ахэм хэхъоныгъэ ашIын зэралъэкIыщт гъогур ягъэлъэгъугъэным, яамалхэр къызэIухыгъэнхэм мэхьанэшхо яI. НыбжьыкIэхэм гъэсэныгъэ дэгъу зэрагъэгъотынымкIэ, ясэнэхьаткIи, нэмыкI лъэныкъохэмкIи ащылъыкIотэнхэмкIэ зэкIэ ищыкIагъэр тэ тшIэнэу тыпылъ. Гурыт еджапIэхэр дэгъоу къэзыуххэрэр республикэм ищыкIэгъэ сэнэхьатхэм афядгъэ­джэнхэу тэгъакIох. Социальнэ проектхэм мылъкоу къафыхагъэкIырэр нахьыбэ хъугъэ. Ти­кIэлэеджакIохэмрэ тистудентхэмрэ зэнэкъокъу, проект зэ­фэ­шъхьафхэм ащатекIох, шIу­хьафтынхэр къащахьых», — къы­Iуагъ КъумпIыл Мурат.

Платформэу «Россия — страна возможностей» зыфиIорэм, проектхэу «Лидеры России», «Успех каждого ребенка» зыфиIохэрэм амалэу къатыхэрэр зэрафэлъэкIэу республикэм щагъэфедэх. НыбжьыкIэхэм язэ­хахьэу «Фыщт» зыфиIорэр зэхащэныр республикэм хабзэ щыхъугъ. Адыгеим и ЛIышъхьэ, хэбзэ къулыкъухэм ялIыкIохэр, кIэлэеджакIохэр къушъхьэу «Фыщт» ылъапэ нэсыхэшъ, лагерь щагъэпсы, ныбжьыкIэхэр зыгъэгумэкIырэ Iофыгъохэм щатегущыIэх. Ащ фэдэ Iоф­тхьабзэхэм яшIуагъэ къэкIо ныбжьыкIэ политикэр нахь шIуагъэ къытэу политикэр зехьэгъэнымкIэ.

«Хэгъэгум и Президент къыгъэнэфэгъэ пшъэрылъхэр, предложениеу къахьыгъэхэр зэкIэ дгъэцэкIэщтых, ныбжьыкIэ поли­тикэу зэрахьэрэм зедгъэушъом­бгъущт, ягукъэкIхэр пхыращынхэм ныбжьыкIэхэр кIэдгъэгу­шIущтых, республикэм тапэкIэ хэхъоныгъэ егъэшIыгъэнымкIэ ар къэкIопIэшIоу щыт», — къы­Iуагъ республикэм ипащэ.

АР-м и ЛIышъхьэ ипресс-къулыкъу

Сурэтхэр А. Гусевым тыри­хыгъэх.