ИлъэсыкIэ мэфэкIым ехъулIэу тиреспубликэ щыпсэурэ унагъо горэм (ылъэкъуацIэ къетIонэу фэягъэхэп) хэкум къэзыгъэзэжьыгъэ тилъэпкъэгъухэм ащыщхэм шIушIэ шIу­хьаф­тынхэр афишIыгъэх.

IэкIыбым къикIыжьыгъэ тилъэпкъэгъухэр щыIэныгъэм хэгъэгъозэжьыгъэнхэмкIэ Гупчэм ипащэу ГъукIэлI Асхьад тызэрэщигъэгъозагъэмкIэ, хабзэ зэрафэхъугъэу лъэкI зи­Iэхэм хэкум къэзыгъэзэ­жьыгъэ тилъэпкъэгъухэр янэплъэгъу рагъэкIыхэрэп. Ащ ишыхьатэу Адыгеим щыпсэурэ унагъо горэм гъот макIэ зиIэ унэгъо 19-м гъомылапхъэхэр зэ­рылъ Iалъмэкъхэр ари­тыгъэх. Ахэм арылъыгъэх килограмм тфырытф хъурэ мэлылыр, шъоущыгъур, хьаджыгъэр, тыгъэгъэзэ да­гъэр ыкIи IэшIу-IушIу зэ­хэпхъагъэхэр.

ШIухьафтыныр зыфа­шIыгъэ тилъэпкъэгъухэр шIушIэ IэпыIэгъу къязытыгъэхэм лъэшэу афэразэх, гъэзетыр къызфагъэфе­дэзэ «тхьашъуегъэпсэу» араIо. Псауныгъэ пытэ яIэу, агу пыкIырэм фэдиз пыхъожьэу щыIэнхэу афэ­лъаIох.

Адыгеим щыпсэухэу гъот зиIэхэм шIушIэным, псэпагъэм алъэныкъокIэ Iофыгъоу зэрахьэрэм уры­гушхонэу щыт. ГъукIэлI Ас­хьад къызэриIуагъэмкIэ, мы шIушIэ Iофтхьа­бзэм нэмыкIэу илъэсыкIэр къыз­щихьащтым ехъулIэу IэкIыбым къикIыжьыгъэ тилъэпкъэгъухэм ясабый нэбгырэ 59-мэ Гупчэм шIу­хьафтынхэр аритыщт.

КIАРЭ Фатим.