Адыгеим иныбджэгъушIоу, Москва щыпсэурэ орэдыIо цIэрыIоу Владислав Косаревым ипчыхьэзэхахьэ АР-м и Къэралыгъо филармоние щыкIуагъ.

Лектор-музыковедэу Хьакъуй Заремэ зэри­щэгъэ концертым иапэрэ едзыгъо Италием, нэмыкI хэгъэгухэм якомпозитор­хэм япроизведениехэр щыIугъэх.

ЯтIонэрэ едзыгъом Уры­сыем икомпозиторхэу О. Фельцман, А. Баба­джанян, В. Шаинскэм, фэ­шъхьафхэм аусыгъэхэр В. Косаревым къыIуагъэх. Р. Паулс ыкIи икIэлэцIыкIугъом Адыгеим щыпсэу­гъэ Муслим Магомаевым яорэдхэр В. Косаревым ыгъэжъынчыгъэх.

Адыгэ Республикэм и Къэралыгъо филармоние исимфоническэ оркестрэ В. Косаревым дежъыугъ, дирижерыр АР-м изаслуженнэ артистэу Аркадий Хуснияров.

Концертыр къызаухым пчыхьэзэхахьэм еплъы­гъэ­хэм, артистхэм В. Косаревыр гущыIэгъу афэхъугъ, упчIэхэм джэуапхэр къаритыжьыгъэх, нэпэеплъ сурэтхэр атырахыгъэх.

— Илъэс къэс Мые­къуапэ сиконцертхэр щэ­кIох, — къытиIуагъ Владислав Косаревым. —Гуфэбэныгъэ хэлъэу ­Адыгеим къыщыспэгъо­кIых. Филармонием ипащэу Къулэ Мыхьамэт, сим­фоническэ оркестрэм ихудожественнэ пащэу Темыркъэнэ Петр, дирижер шъхьаIэу Аркадий Хуснияровым, артистхэм лъэшэу сафэраз. 2023-рэ илъэсым Мыекъуапэ сыкъэкIонэу мурад сшIыгъэ. Адыгеим икомпозиторхэм аусыгъэ орэди зэхахьэм къыщысIощт. ИлъэсыкIэм фэгъэхьыгъэу сышъуфэгушIо.

ЕмтIылъ Нурбый. Сурэтхэм арытхэр: Владислав Косаревыр; симфоническэ оркестрэм иартистхэр.