Адыгеим ипедиатрическэ бригадэ Херсон хэкумкIэ Ге­ническэ районым Iоф зыщишIэрэр мазэ хъугъэ.

А уахътэм къыкIоцI врач­хэм кIэлэцIыкIу 1344-мэ япсауныгъэ изытет зэрагъэшIагъ.

— ЯщыкIэгъэ медицинэ уплъэкIунхэр кIэлэцIыкIу пстэуми арагъэкIугъэх, ащыщхэм дагъохэр къахагъэщыгъэх, зэряIэзэщтхэ шIыкIэр афагъэнэфагъ. ЯпсауныгъэкIэ щыкIагъэ горэхэр кIэлэцIыкIу 701-мэ яIэу агъэунэфыгъ, нэ­бгырэ 667-мэ ахэр апэрэу къахагъэщыгъ, — къы­Iуагъ Мэрэтыкъо Рустем.

Шъугу къэтэгъэкIыжьы Адыгеим иврачхэр пар­тиеу «Единэ Россием» зэхищэгъэ Iофтхьабзэу «Псауныгъэм имэшIоку» зыфиIорэм шышъхьэIум къыщегъэжьагъэу зэрэхэлэжьагъэхэр, Геническэ районым ахэр зэрэщыIагъэхэр. Мэзищым къы­кIоцI нэбгырэ мини 10 ауплъэ­кIугъ. Ахэм ащыщэу 1300-р кIэлэцIыкIух, операцие 35-рэ ашIыгъ. Зышъхьэ къе­зыхьыжьэжьыгъэхэмрэ нэмыкI чIыпIэ агъэкощыгъэхэмрэ IэпыIэгъу ягъэгъотыгъэныр мэхьанэшхо зиIэ лъэныкъохэм зэу ащыщ. Волонтерхэр, предпринимательхэр, общест­веннэ IофышIэхэр, респуб­ликэм иорганизацие зэфэшъхьафхэм аIутхэр зы­шъхьэ къезыхьыжьэжьын фаеу хъугъэхэм атегъэ­псыхьэгъэ Iофтхьабзэхэм чанэу ахэлажьэх, Донбасс, Херсон хэкум арысхэм, Адыгеим щыщ дзэ къулыкъушIэхэу хэушъхьафыкIыгъэ дзэ операцием хэла­жьэхэрэм шIушIэ IэпыIэгъоу алъагъэIэсыщтхэм яугъоин яIахь хашIыхьэ.