АвтобусыкIэхэр къащэфыщтых
Аужырэ уахътэм Мыекъуапэ дэт транспортым хэпшIыкIэу хэхъуагъ —япчъагъэкIэ мин 90-рэ фэдиз хъугъэ, ащ фэшI къэлэ гъогухэм ахэр ащызэхэуцохэу бэрэ къыхэкIы. АР-м и ЛIышъхьэ зэнкIэ зэдэгущыIэгъоу иIагъэм ар къыщиIуагъ ыкIи цIыфхэм нахьыбэрэ общественнэ транспортыр агъэфедэзэ ашIынэу къяджагъ. ЦIыфхэм агъэфедэрэ общественнэ транспортым игъэкIэжьын ыуж зэритхэр ЛIышъхьэм къыхигъэщыгъ. ГущыIэм пае, маршруткэмэ язытет джырэ уахътэм нахьышIум ылъэныкъокIэ зэхъокIыныгъэхэр фашIыгъэх. Къэлэ гъогухэм ащыщхэм кIэу къащэфыгъэ маршруткэхэр атырагъэуцуагъэх, ахэм цIыфхэр арызепщэныр нахь Iэрыфэхъу хъугъэ, нахьыбэ арэфэ ыкIи гупсэфыпIэх.
— Инфраструктурэм игъэпсын фытегъэпсыхьэгъэ бюджет кредитым ишIуагъэкIэ 2024-рэ илъэсым автобусыкIэхэр Мыекъуапэ зэригъэгъотыщтых. А Iофыгъом шIуагъэу къыпыкIыщтыр цIыфмэ зэхашIэнэу щыт, — къыIуагъ КъумпIыл Мурат.