Партийнэ проектэу «Единэ Россием и Бзылъфыгъэ дви­же­ние» зыфиIорэмрэ Адыгеим и «Гвардие НыбжьыкIэрэ» ахэтхэм ИлъэсыкIэм ипэгъокI открыткэхэм ягъэхьазырынкIэ Iофтхьабзэ зэхащагъ.

Хьазыр хъурэ открыткэхэу мэфэкIэу къэбла­гъэрэм фэгъэхьыгъэ шIу­фэс ыкIи агу къэIэтыгъэным пае гущыIэ фабэхэр зытетхэгъэщтхэр хэу­шъхьа­фыкIыгъэ дзэ опера­цием хэлэжьэрэ дзэкIолI­хэм афатIупщыщтых.

Мыекъуапэ щыпсэурэ волонтерэу Александр Ковальчевскэр мы илъэсым ибжыхьэ дзэкIолIхэр зыщычъыещтхэ дзыохэм ядын хэлэжьэгъагъ, джы игуапэу открыткэхэм ягъэ­хьазырын иIахь хешIыхьэ, иныбджэгъухэри ащ зы­лъещэх. Волонтерэу Кирилл Беспаловми а Iоф­тхьабзэм мэхьанэу иIэр дэгъоу къыгурэIо ыкIи фэ­лъэкIыщтымкIэ ишIуагъэ къегъакIо. Ащ ятэ заом зыщэIэм кIэлэцIыкIухэр къызэрэфатхэхэрэр лъэшэу гуапэ щыхъущтыгъ, ыгуи нахь къыIэтыщтыгъ.

«ИлъэсыкIэ почтэр» зыфиIорэ Iофтхьабзэр тыгъэгъазэм икъихьагъум Адыгеим щаублэгъагъ. Жъугъэу цIыфхэр ащ къы­хэлажьэх. Непэ ехъулIэу открыткэ 500-м ехъу къау­гъоигъ ыкIи дзэ частым агъэхьыгъ. Мастер-классэу зэхэтщагъэм къыхэдгъэлэжьагъэх мобилизацием къыхиубытагъэхэм якIэлэцIыкIухэри. Ащ нэмыкIэу къыхэдгъэщымэ тшIоигъу партием иегъэблапIэрэ «Гвардие НыбжьыкIэм» иштабрэ зышIоигъо пстэуми агъэхьазырыгъэ открыткэхэмрэ письмэхэмрэ къарахьылIэнхэ зэра­лъэкIыщтыр. ЧIыпIэу къыз­дахьыщтыр: къ. Мыекъуа­пэ, ур. Краснооктябрьскэр, 4. Ахэр зэкIэ дзэ­кIолIхэм аIэкIэдгъэхьащтых», — къыIотагъ партиеу «Единэ Россием» и Генсовет хэтэу, Адыгеим и «Гвардие Ныб­жьыкIэ» ипащэу, къа­лэу Мыекъуапэ идепутатэу Бэрзэдж Асыет.

Шъугу къэтэгъэкIыжьы: «Единэ Россием» Донбасс зышъхьэ къизыхыжьыгъэ­хэр пIэлъэ гъэнэфагъэкIэ зыщыпсэухэрэ чIыпIэхэм илъэсыкIэ елкэхэр ащи­гъэуцущтых ыкIи дзэ къулыкъушIэхэу заохэрэм афэ­гушIощтых, агу къаIэтыщт. Партием илIыкIохэр джащ фэдэу афэгушIощтых егъэ­зыгъэ IофкIэ къэко­щы­гъэ­хэм якIэлэцIыкIухэм.

«Единэ Россием» и Тхьаматэу Дмитрий Медведевыр ары Iофтхьабзэу «Елка желаний» зы­фиIо­рэм партиер хэлэ­жьэным кIэщакIо фэхъугъэр. Урысыем ишъолъыр пстэуми ащыпсэурэ цIыф­хэу партием хэтхэр а Iофтхьабзэм къыхэлажьэх. «Единэ Россием и Гвардие НыбжьыкIэрэ» «Волонтер ротэмрэ» шъо­лъырыкIэхэу щыIэ хъугъэ­хэм илъэсыкIэ елкэхэм япхыгъэ Iофтхьабзэхэр ащызэшIуахых.