УФ-м ПенсиехэмкIэ ифонд и Къутамэу АР-м щыIэм иIофышIэхэм гъэсэныгъэм иучреждениеу шъолъырым итхэм зэпхыныгъэ адыряIэу ахэм ащеджэхэрэм зэIукIэгъухэр адашIых, урокхэр афызэхащэх.

Ащ тетэу фондым иIофшIэн нэIуасэ фашIыгъэх къуаджэу Пэнэжьыкъуае игурыт еджапIэу N-у 1-м иапшъэрэ классхэм ащеджэхэрэр. Нэбгырэ 57-рэ Iофтхьабзэм хэлэжьагъ. Ахэм «якIэлэегъэджагъ» цIыфхэм Iоф адэшIэгъэнымкIэ Къутамэм икъулыкъу испециалистэу Лъэу­стэн Маринэ.

Фондым иIофшIэн зэрэзэхэщагъэр, кIэлэцIыкIу зэрыс унагъохэм IэпыIэгъоу аратыхэрэр, пэIудзыгъэ шIыкIэм тетэу ведомствэм ифэIо-фашIэхэр къызэрэзыIэкIэбгъэхьащтхэр ащ къафиIотагъ. Пенсиеу щыIэхэр зыфэдэхэм, страхованиемкIэ взносхэм ямэхьанэ, уипенсие зыфэдизыщтыр непэ зэрэб­гъэ­IорышIэщтым, ны мылъкум игъэ­федэн, нэмыкIхэм афэгъэ­хьыгъэ упчIэхэр кIэлэеджакIохэм къатыгъэх. Джэуапынчъэу зыпари къэнагъэп.

— КIэлэеджакIохэм тиспе­циалистхэр зэраIукIэхэрэр хэ­бзэшIу хъугъэ. Тихэгъэгу пенсиехэмкIэ исистемэ зэрэгъэ­псыгъэр икъоу ныбжьыкIэхэм алъыдгъэIэсыныр типшъэрылъ шъхьаIэхэм ащыщ.

Апшъэрэ классхэм арысхэу тызIукIэхэрэм ар зэрашIогъэшIэгъоным, чанэу къызэрэхэлажьэхэрэм, тапэкIи нахь куоу мы темэм зыщагъэгъозэнэу шIоигъоныгъэ зэряIэм тегъэгушIо, — къыIуагъ Лъэустэн Маринэ.

Шъугу къэдгъэкIыжьын, ащ фэдэ къэбарлъыгъэIэс Iоф­тхьабзэхэр 2011-рэ илъэсым къыщыублагъэу шъолъырхэм зэкIэми фондым ащызэхещэ. Адыгеир пштэмэ, студентэу ыкIи кIэлэеджакIоу нэбгырэ минитIу фэдиз илъэс къэс ахэм ахэлажьэ. Мы илъэсыр екIыфэкIэ республикэм ичIыпIэхэм зэ­кIэми ПенсиехэмкIэ фондым ипроект анэсыщт.

УФ-м ПенсиехэмкIэ ифонд и Къутамэу АР-м щыIэм ипресс-къулыкъу.