Зэо лъэхъаным фэгъэхьыгъэх
Дунэе зэнэкъокъоу «Нарисуй «Елку Победы» зыфиIорэр ТекIоныгъэм и Музей исайт щызэхащагъ. Адыгеим щыщхэри ащ чанэу хэлажьэх.
ЦIыфхэр сурэтхэм яплъыгъэх, ащ ыуж агу рихьыгъэхэр къыхахынхэ ыкIи уасэ афашIын алъэкIыгъ. Анахь мэкъабэ зыфатыгъэхэм «Приз зрительских симпатий» зыфиIорэр афагъэшъошагъ.
ЕзыгъэжьэгъэкIэ ыкIи IэпэIэсэныгъэ зиIэ сурэтышIхэм Хэгъэгу зэошхом илъэхъан илъэсыкIэр къызэрэрагъахьэщтыгъэр, илъэсыкIэ чъыгыр зэрагъэкIэракIэщтыгъэр, ежь аIэкIэ джэгуалъэхэр зэрашIыщтыгъэхэр, шIухьафтынэу зэратыжьыщтыгъэхэр къизыIотыкIырэ сурэтхэр ашIыгъэх, ащкIэ амал зэфэшъхьафхэр агъэфедагъэх.
ЗэхэщакIохэм къызэраIуагъэмкIэ, хабзэ зэрэхъугъэу, сурэтышI ныбжьыкIэхэр ары анахьэу зэнэкъокъум хэлэжьагъэхэр. Илъэси 6-м къыщегъэжьагъэу 11-м нэс зыныбжьхэм сурэт мин 12-м ехъу къагъэхьыгъ. ЗэкIэмкIи онлайн-проектым сурэт мин 18-м ехъу хэхьагъ. Урысые Федерацием ишъолъыр 86-мэ ыкIи Казахстан, Белоруссием, Армением, Молдавием, Киргизием ыкIи Тыркуем ялIыкIохэр хэлэжьагъэх.
ТекIоныгъэм и Музей, кIэлэеджакIохэм я Урысые движениеу «ЮНАРМИЯ», купэу «АСТ», тучан сетеу «Передвижник» ыкIи заводэу «Невская Палитра» зыфиIохэрэр ары Iофтхьабзэм кIэщакIо фэхъугъэхэр.