Дунаим каратэмкIэ изэнэкъокъу къалэу Орел щыкIуагъ.

Урысые Федерацием спортымкIэ и Министерствэрэ дунаим каратэмкIэ и Федерациерэ зэхащэгъэ зэнэкъокъум хэгъэгу 22-мэ ябэнэкIо 1600-м нахьыбэ хэлэжьагъ. Грецием, Тыркуем, Иран, Пакистан, Кубэ, Казахстан, Армением, Абхъазым, Белоруссием, Урысыем, фэ­шъхьафхэм къарыкIыгъэхэм яIэпэIэсэныгъэ къагъэлъэгъуагъ. Урысыем ихэшыпыкIыгъэ ко­ман­­дэ хэтхэу Адыгэ Республи­кэм испортсмени 4 алырэгъум щыбэнагъ.

Илъэс 12 — 13 зыныбжьхэм якуп Адыгэ республикэ гимназием щеджэрэ Пакъэ Астемир апэрэ чIыпIэр къыщыдихыгъ. Судьяхэм зыкIыныгъэ ахэлъэу нарт шъаом дышъэ медалыр къыфагъэшъошагъ.

Мыекъуапэ игурыт еджапIэу N 7-м иеджакIоу, бгырыпх шIуцIэр зиIэ Егор Христофоровми апэрэ чIыпIэр къыдихыгъ. Бэнэгъу уахътэр амыухызэ гъого­гъуи 3 зэIукIэгъухэр къыхьыгъэх. Дышъэм икъыдэхынкIэ зэнэкъо­къум Чэчэным къикIыгъэм щы­текIуагъ.

— Мы илъэсым ти­спортсменхэр нэмыкI зэIукIэгъухэм чанэу ахэлэжьагъэх, — къыти­Iуагъ тренерэу Владимир Васильченкэм. — Урысыем и Гъэмэфэ я XI-рэ Спартакиадэ Е. Христофоровым апэрэ чIыпIэр къыщихьыгъ. Санкт-Петербург, Иваново ащызэхащэгъэ зэнэкъокъухэми Е. Христофоровым текIоныгъэр къыщыдихыгъ.

Мыекъуапэ игурыт еджапIэу N 6-м икIэлэеджакIоу Юсуп Мухаевым Иваново щыкIогъэ зэнэкъокъум апэрэ чIыпIэр къыщихьыгъ.

Сурэтым итхэр: тренерэу Владимир Васильченкэр, ащ ыгъэсэрэ бэнакIохэр.