Урысые Федерацием и Правительствэ 2022-рэ илъэсым тыгъэгъазэм и 2-м ыштэгъэ унашъоу N 2216-р зытетэу «Транспортым итхынрэ водительскэ удостоверениер ятыжьыгъэнымрэ япхыгъэ къэралыгъо фэIо-фашIэхэр зэрагъэцакIэхэрэм, Урысые Федерацием хэгъэгу кIоцI IофхэмкIэ и Министерствэ и ГИБДД иподразделениехэм транспортыр зэращатхырэ ШIыкIэм ия 14-рэ пункт зэхъокIыныгъэхэр фэшIыгъэнхэм яхьылIагъ» зыфиIорэр правовой информациемкIэ официальнэ интернет порталэу «www. рrаvо. gоv.ru» зыфиIорэм къихьагъ.

Урысые Федерацием хэхьэрэ шъолъырыкIэхэр — Донецкэ, Луганскэ народнэ республикэхэр, Запорожскэ, Херсон хэкухэр зэрэзэхащэхэрэм ехьылIэгъэ федеральнэ конституционнэ законхэм адиштэу Урысые Федерацием и Правительствэ мы иунашъо къагъэхьазырыгъ.

Урысыеми, IэкIыб къэралыгъохэми арысхэм, гражданствэ зимыIэхэу Урысые Федерацием хэмыхьэхэзэ зигугъу къэтшIыгъэ чIыпIэхэм ренэу ащыпсэугъэхэм е ыпэкIэ ахэм арысыгъэхэу Урысые Федерацием кощыжьыгъэхэм, мы чIыпIэхэм ащатхыгъэ юридическэ лицэхэм унашъор алъэIэсы.

Ащ диштэу 2026-рэ илъэсым щылэ мазэм и 1-м нэс ыпшъэкIэ зигугъу къэтшIыгъэ цIыфхэмрэ юридическэ лицэхэмрэ ятранспорт атхыщт, Урысыем иводительскэ удостоверениехэр къаратыжьыщтых.

Регистрационнэ документхэмрэ къэралыгъо номерхэмрэ зэблэхъугъэнхэм пае Урысыем ипаспорт е «вид на жительство» зыфаIорэр, ДНР-м, ЛНР-м, Запорожскэ, Херсон хэкум ренэу зэрэщыпсэухэрэр къэзыушыхьатырэ документхэр, транспорт документхэу, къэралыгъо номерэу мы унашъом джыри кIуачIэ имыIэзэ Украинэм, Донецкэ, Луганскэ народнэ республикэхэм якъулыкъухэм къаратыгъэхэр, ащ фэдэхэр щымыIэ зыхъукIэ, транспортыр регистрацие зэрашIыгъэр къэзыгъэшъыпкъэжьырэ къэбархэр аIэкIагъэхьанхэ фае. Юридическэ лицэхэм урысые юридическэ лицэу зэратхыгъэхэр къэзыушыхьатырэ тхылъи аIэкIагъэхьан фае.

Урысые Федерацием игражданин ипаспорт е «вид на жительство» зыфаIорэр, водительскэ удостоверениер зарахьылIэхэкIэ, экзамен аIамыхэу Украинэм, ДНР-м, ЛНР-м ыпэкIэ къащаратыгъэгъэ водительскэ удостоверениехэр урысые удостоверениекIэ къафызэблахъущтых.

Къэралыгъо автоинспекцием иподразделениехэм шъолъырыкIэхэм ямызакъоу, Урысыем инэмыкI шъолъырхэм якъэлэ шъхьа­Iэхэми транспортым итхынрэ водительскэ удостоверениер ятыжьыгъэнымрэ япхыгъэ къэралыгъо фэIо-фашIэхэр ащагъэцэкIэщтых.

КъэIогъэн фае мыщ фэдэ къэралыгъо фэIо-фашIэхэр зыфагъэ­цакIэхэрэм къэралыгъо пошлинэ зэраIамыхыщтыр, яавтомобиль изытет арагъэуплъэкIунэу зэримыщыкIагъэр. Къэралыгъо фэIо-фашIэхэр шъолъырыкIэхэм щафагъэцакIэхэ зыхъукIэ, 2024-рэ илъэсым щылэ мазэм и 1-м нэс страховкэ зарагъэшIынэу ищыкIэгъэщтэп, медицинэ уплъэкIунхэр арамышIылIэхэу водительхэми яудостоверениехэр къафызэблахъущтых.