Къэбар нэпцIыр къыригъэкIокIыгъ

Красногвардейскэ районым щыщ хъулъфыгъэм УФ-м и УIэшыгъэ КIуачIэхэм афэгъэ­хьыгъэ къэбар нэпцI къызэрэригъэкIокIы­гъэм епхыгъэ уголовнэ Iофэу къыфызэIуахыгъэм ихэплъэн ыкIэм фэкIуагъ.

УФ-м и Следственнэ комитет иследственнэ ГъэIорышIапIэу АР-м щыIэм Iоф хьылъэхэм язэхэфынкIэ иотдел Красногвардейскэ районым щыщ илъэс 39-рэ зыныбжь хъулъфыгъэм къыфызэIуахыгъэ уголовнэ Iофым хэплъагъ.

ЩынэгъончъэнымкIэ федеральнэ къулыкъум и ГъэIо­рышIапIэу АР-м щыIэм икъулыкъушIэхэм къагъэхьазырыгъэ материалхэмкIэ уголовнэ Iофыр къызэIуа­хыгъ.

Следствием зэригъэунэфыгъэмкIэ, 2022-рэ илъэсым гъэтхапэм Красногвардейскэ щыщ хъулъфыгъэм имобильнэ телефон къызфигъэфедэзэ, УФ-м и УIэшыгъэ КIуачIэхэм афэгъэхьыгъэ къэбар нэпцIыр къизыIотыкIырэ видеотехыгъэр Интернетым къыригъэхьагъ.

Уголовнэ Iофыр хьыкумыр хэплъэнэу фагъэхьыгъ.

Студентхэм аIукIагъ

Къолъхьэ тын-Iыхыным пэшIуекIогъэным и Дунэе мафэ ехъулIэу шъолъыр следственнэ ГъэIорышIапIэм Iоф хьылъэхэм язэхэфынкIэ иотдел ипащэу Блэгъожъ Заурбый Адыгэ къэралыгъо университетым истудентхэм ыкIи икIэлэегъаджэхэм аIукIагъ.

КъулыкъушIэм студентхэм къафиIотагъ коррупцием лъэныкъоу къызэлъиубытырэр, ащ епхыгъэ бзэджэшIагъэ зезыхьагъэхэм пшъэдэкIыжьэу арагъэхьырэр зыфэдэр, къолъхьэ тын-Iыхын нэшанэ зиIэ бзэджэшIагъэ зэрахьаным лъапсэ фэхъурэр, нэмыкIхэри.

З. Блэгъожъым зэдэгущыIэгъум къыщыхигъэщыгъ коррупцием ылъэныкъокIэ бзэджэшIагъэ зезыхьэхэрэм обществэм щынагъо къызэрэфахьырэр ыкIи хэбзэгъэ­уцугъэм къыдилъытэу пшъэдэкIыжьэу тазыр ыкIи хьапс зэратыралъхьэрэр. Джащ фэдэу къыIуагъ бзэджэшIагъэм ыпкъ къикIэу зэрар зэрахыгъэхэм къафегъэгъэ­зэжьыгъэным фэшI бзэджашIэм имылъку арест зэрэтыралъхьэрэр.

Iофтхьабзэм хэлэжьагъэх бзэджэшIагъэ зезыхьагъэ­хэм пшъэдэкIыжь ягъэхьыгъэнымкIэ федеральнэ къу­лыкъум и ГъэIорышIапIэу Адыгеим щыIэм икъулыкъу­шIэхэр.

Хэбзэ IофышIэм утын рихыгъ

Красногвардейскэ районым щыпсэурэ хъулъ­фыгъэм ыкIуачIэ рихьылIи хэбзэ IофышIэм утын зэрэрихыгъэм фэшI уголовнэ Iофэу къыфызэIуахыгъэм ихэплъэн аухыгъ.

УФ-м и Следственнэ комитет иследственнэ Гъэ­IорышIапIэу Адыгеим щыIэм и Джэджэ межрайон следственнэ отдел илъэс 22-рэ зыныбжь хъулъфы­гъэм къыфызэIуахыгъэ уголовнэ Iофыр зэхифыгъ.

Следствием зэригъэунэфыгъэмкIэ, 2022-рэ илъэсым бэдзэогъум пчыхьэм хъулъфыгъэр ешъуагъэу селоу Красногвардейскэм дэт гаражхэм апэгъунэгъоу полицием икъулыкъушIэ изекIуакIэхэр мытэрэзхэу ылъы­ти, ыкIуачIэ къызфигъэфедэзэ ыбгъэгу еуагъ ыкIи хэбзэ къулыкъушIэм ищыгъын зэIитхъыгъ, ащ хэлъыгъэ полицейскэ жетоныр къыпитхъыгъ.

Красногвардейскэ район прокуратурэм къызэIуихыгъэ уголовнэ Iофыр хьыкумым фигъэхьыгъ.

ИIэнатIэ къызфигъэфедагъ

Адыгеим иполицие ипащэ игуадзэ къыфызэIуахыгъэ уголовнэ Iофым УФ-м и Следственнэ комитет иследственнэ ГъэIорышIапIэу АР-м щыIэм Iоф хьылъэхэм язэхэфынкIэ иотдел хэплъагъ. ИIэнатIэ къызфигъэфеди бзэджэшIагъэ зэрэзэрихьагъэм фэшI къулыкъушIэр агъэмысэ.

Следствием зэригъэунэфыгъэмкIэ, 2022-рэ илъэсым бэдзэогъум и 5-м къыщегъэжьагъэу шышъхьэIум и 27-м нэс IофшIэным къыдилъытэрэ зыгъэпсэфыгъом щыIэу, АР-м хэгъэгу кIоцI IофхэмкIэ и Министерствэ идокументхэм шапхъэу апылъхэр ыукъохэзэ, МВД-м ибаланс хэтэу къырапхыгъэ автомобилыр, гъэстыныпхъэр ежь ышъхьэкIэ къызфигъэфедагъэх.

ЩынэгъончъэнымкIэ федеральнэ къулыкъум ыкIи УФ-м хэгъэгу кIоцI IофхэмкIэ и Министерствэ къаугъоигъэ материалхэмкIэ уголовнэ Iофыр къызэIуа­хыгъ. УплъэкIун Iофтхьабзэу зэрахьагъэхэм къакIэлъыкIоу лажьэ зиIэр хэгъэгу кIоцI къулыкъум IуагъэкIыгъ.

Хабзэм къызэрэдилъытэу, уголовнэ Iофыр хьыкумым фагъэхьыгъ.

Хэбзэнчъэу зекIуагъ

Шэуджэн районым имуниципальнэ учреждение ипащэщтыгъэм къыфызэIуахыгъэ уголовнэ Iофыр ыкIэм фэкIуагъ. ИIэнатIэ къызфигъэфеди гъэпцIагъэ зыхэлъ бзэджэшIагъэ ащ зэрихьагъэу къыхагъэ­щыгъ.

Следствием зэригъэунэфыгъэмкIэ, учреждением идиректор 2017-рэ илъэсым иIоныгъо мазэ къыщыублагъэу къэгъэгъунакIор къышти, мазэ нахь Iоф ымышIагъэу IукIыжьынэу ащ рихъухьагъ ыкIи лэжьапкIэр къызэрыхьэщтыгъэ банкым икартэ пащэм ритыжьыгъ. Арэу щытми, къэгъэгъунакIор IофшIапIэм зэрэIукIыжьыгъэмкIэ пащэм унашъор ытхыгъэп ыкIи 2017-рэ илъэсым Iоныгъом къыщегъэжьагъэу 2021-рэ илъэсым мэлылъфэгъум нэс къэгъэгъунакIом илэжьапкIэ къызIэкIигъэхьагъ.

Пащэу Iоф зышIэщтыгъэм Шэуджэн район администрацием культурэмкIэ и ГъэIорышIапIэ зэрарэу сомэ мин 444-м ехъу ригъэшIыгъ.

Уголовнэ Iофым хьыкумыр хэплъэнэу фагъэхьыгъ.

ГъэпцIагъэ зэрахьагъ

Мыекъопэ район администрацием иIофышIэщтыгъэм ыкIи мы районым щыпсэурэ хъулъфыгъэм гъэпцIагъэ зыхэлъ бзэджэшIагъэ зэрэзэрахьагъэм фэшI агъэмысэх.

НэбгыритIур зэрэшIэхэзэ гъэпцIагъэ зыхэлъ бзэджэшIагъэ зэрэзэрахьагъэм фэшI УФ-м и Следственнэ комитет иследственнэ ГъэIорышIапIэу АР-м щыIэм Iоф хьылъэхэм язэхэфынкIэ отделым уголовнэ Iоф къафызэIуихыгъ. Ащ лъапсэ фэхъугъэр щынэгъончъэ­нымкIэ федеральнэ къулыкъум и ГъэIорышIапIэу АР-м щыIэм къыугъоигъэ материалхэр ары.

Следствием ыкIи хьыкумым зэрагъэунэфыгъэмкIэ, Мыекъопэ район администрацием иотдел иIофышIэрэ мы районым щыпсэурэмрэ пэшIорыгъэшъэу зэдэгущыIэжьхи, Новороссийскэ щыщ хъулъфыгъэу къяолIагъэм илъэIу зэрэфамыгъэцэкIэшъущтыр ашIэзэ сомэ мин 600 фэдиз къыIахыгъ.

Хьыкумым ышIыгъэ унашъомкIэ администрацием Iоф щызышIэщтыгъэм илъэси 2-рэ мэзи 10-рэ, хъулъфыгъэм илъэси 2-рэ мэзи 4-рэ хьапс условнэу атыралъхьагъ.

Зыгъэхьазырыгъэр КIАРЭ Фатим.