КIэлэцIыкIухэмрэ ныбжьыкIэхэмрэ зыхэхьэхэрэ Урысые движением иапэ­рэ зэфэс къалэу Москва щэкIо.

Хэгъэгум ишъолъыр пстэуми яныбжьыкIэ анахь IэпэIасэхэу ыкIи анахь чанхэу нэбгырэ мин пчъа­гъэ ащ хэлажьэ.

Адыгеим ыцIэкIэ кIэлэ­еджэкIуи 10 кIуагъэ. Урысыем щыкIорэ зэнэкъо­къухэм, проект ыкIи движение зэфэшъхьафхэм ахэлажьэх. ТилIыкIохэм пэщэныгъэ адызезыхьэрэр Кристина Сильченкэр ары. КIэлэцIыкIухэмрэ ныбжьыкIэхэмрэ я Урысые движение ишъо­лъыр къутамэ ар ипащ.

Хэгъэгум и Президент ныбжьыкIэхэм яапэрэ зэ­фэс мэхьанэу иIэр къыхи­гъэщыгъ. Владимир Путиныр зэфэсым хэлажьэ­хэрэм афэлъэIуагъ ахэр зыкIэхъопсыхэрэр къадэ­хъунхэу, зыми зыпамы­шIыжьэу, ежь акIуачIэкIэ, яакъылкIэ проект гъэ­нэфагъэхэр зэхагъэу­цонхэу.

Адыгэ Республикэм и ЛIышъхьэ къызэриIуа­гъэм­кIэ, хэгъэгум ипащэхэм непэ лъэшэу анаIэ тырагъэты ныбжьыкIэхэр кIэщакIо зыфэхъухэрэ Iоф­тхьабзэхэм адегъэштэгъэ­ным. Урысыем щызэха­щэгъэ движениеми ар къегъэшъыпкъэжьы. Мы илъэсым мэлылъфэгъум Урысыем и Президент дыригъэштагъ кIэлэцIыкIу­хэмрэ ныбжьыкIэхэмрэ я Урысые движение хэгъэгум щызэхэщэгъэным фэгъэхьыгъэ гупшысэу къахьыгъэм. Ежьхэм яшIоигъоныгъэкIэ ащ хэ­хьащтых, яIофхэри ежь­-ежьырэу зэрагъэзекIощтых. 2022-рэ илъэсым бэдзэогъум и 14-м Фе­деральнэ Законэу «КIэлэцIыкIухэмрэ ныбжьыкIэ­хэмрэ я Урысые движение ехьылIагъ» зыфиIорэм ар кIэтхэжьыгъ.

Адыгеим ныбжьыкIэ по­литикэм мэхьанэшхо щыраты. Ащ пае хабзэм икъулыкъу гъэнэфагъэ зэ­хащагъ, ныбжьыкIэхэм яIоф закъу ар зыпылъыщтыр. Мыщ дэжьым зы­гъэIорышIэжьыным мэхьанэшхо зэриIэр къыхэгъэщыгъэн фае — блэ­кIыгъэ илъэсхэм, пионер, комсомол организациехэр зыщэIэхэм, опытэу яIэ хъугъэми ар къы­хэщы.

— БлэкIыгъэм анахьы­шIур къыхэхыгъэныр ыкIи яцыхьэ зытелъыжьэу джырэ ныбжьыкIэ движениер гъэпсыгъэныр ары анахь мэхьанэ зиIэр. Сэри, хабзэм икъулыкъухэми ти­шIуагъэ къэдгъэкIощт кIэу зэхащэгъэ движением иуцункIи, ихэхъоныгъэкIи. Гухэлъ-гупшысэ дэгъухэр зыдэзыIыгъ ныбжьыкIабэ ащ зэрэзэкъуигъэуцощтым сицыхьэ телъ, — къыхигъэщыгъ КъумпIыл Мурат. — ЗэкIэ мы дви­жением кIэщакIо фэхъугъэхэми хэлажьэхэрэми сафэгушIо! Тарихъ мэхьа­нэ зиIэ чэзыоу ар щыт. Шъоры апэрэу мыщ хэ­хьагъэхэр ыкIи шъуипшъэ­дэкIыжь ащ нахь ин къе­шIы. ГухэлъыкIэхэр зыда­Iыгъхэу шIуагъэ зыпылъ Iофхэр тиныбжьыкIэхэм зэрэпхыращыщтхэм тицыхьэ тель!

ЛIышъхьэу КъумпIыл Мурат къэралыгъо щынэгъончъэнымкIэ къулыкъухэм яIофышIэ и Мафэ фэгъэхьыгъэ зэIукIэм тыгъуасэ хэлэжьагъ.

Iофтхьабзэм джащ фэдэу хэлэжьагъэх АР-м и Къэралыгъо Совет – Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, хэбзэухъумэкIо къулыкъухэм япащэхэр.

ЩынэгъончъэнымкIэ Федеральнэ къулыкъум АР-мкIэ и ГъэIорышIапIэ ипащэу Михаил Кемеровыр ведомствэм иIофышIэхэм къафэгушIуагъ хэгъэгум щынэгъончъэнымкIэ икъулыкъухэр зызэхащагъэхэр илъэси 105-рэ зэрэхъурэмкIэ, псауныгъэ пытэ ахэм яIэнэу, хэгъэгум ипащэхэм къагъэуцугъэ пшъэрылъхэр гъэхъагъэ хэлъэу агъэцэкIэнхэу къафэлъэIуагъ.

Республикэм и ЛIышъхьэу КъумпIыл Мурат ипсалъэ къызэрэщыхигъэщыгъэмкIэ, Адыгеир хэгъэгум ишъолъыр анахь рэхьатхэм ыкIи ицыхьэ зытелъыжьэу хэхъоныгъэ зышIыхэрэм зэу ащыщ. Къэралыгъо щынэгъончъэнымкIэ къулыкъухэм яIофышIэхэр тихэгъэгу исхэр щынэгъончъэу щыIэнхэм яшъыпкъэу дэлажьэх, Урысыем исуверенитетрэ ифедэхэмрэ къагъэгъунэ. Мыщ фэдэ къулыкъум щылажьэхэрэр лIыгъэшхо зыхэлъхэр, япшъэрылъи цIыфхэми афэшъыпкъэхэр ары.

«Тихэгъэгу чIыпIэ къин зыщит лъэхъаным Iофыгъоу зэшIошъухыхэрэм непэкIэ мэхьанэшхо яI. Терроризмэм, экстремизмэм, зэхэщэгъэ бзэджэшIагъэм ябэныгъэныр, общественнэ, экономикэ щынэгъончъагъэр гъэпытэгъэныр непэкIэ мэхьанэшхо зиIэ пшъэрылъых. Урысыем и Президентэу Владимир Путиным зэрэхигъэунэфыкIыгъэу, «теубытагъэ хэлъэу шъушIуагъэ къытэу шъузекIоным, шъуиIофшIэн исыд фэдэрэ лъэныкъокIи нахьыбэу гъэхъагъэ шъушIыным мэхьанэшхо яI», - къыIуагъ КъумпIыл Мурат.

Щынэгъончъэным, общественнэ-политикэ, социальнэ зыпкъитыныгъэр республикэм къыщыухъумэгъэным атегъэпсыхьэгъэ пшъэрылъхэр зэшIохыгъэнхэм къыдыхэлъытагъэу щынэгъончъэнымкIэ Федеральнэ къулыкъум АР-мкIэ и ГъэIорышIапIэ республикэм ихэбзэ къулыкъухэм, нэмыкI ведомствэхэм зэдэлэжьэныгъэу адыриIэр зыфэдэм мэхьанэшхо зэриIэр Адыгеим и ЛIышъхьэ хигъэунэфыкIыгъ.

«Къиныгъохэр щыIагъэхэми, зэхъокIыныгъэшхохэу республикэм фэтшIыхэрэр къызэтедгъэуцуагъэхэп. АдыгеимкIэ мэхьанэшхо зиIэ проектышхуитIу едгъэжьагъ – зыгъэпсэфыпIэу «Лэгъонакъэрэ» промышленнэ паркрэ тэгъэпсых. Гухэлъэу тиIэхэр зэкIэ гъэхъагъэ хэлъэу дгъэцэкIэнхэм пае общественнэ зыпкъитыныгъэу, зэгурыIоныгъэу шъолъырым илъыр тапэкIи къэтыухъумэн фае. Арэущтэу тшIымэ ары ныIэп тэ гъэхъагъэхэм такъыфэкIон зытлъэкIыщтыр», - къыIуагъ КъумпIыл Мурат.

АР-м и ЛIышъхьэ щынэгъончъэнымкIэ Федеральнэ къулыкъум АР-мкIэ и ГъэIорышIапIэ иIофышIэхэм Урысые Федерацием къулыкъу фэхьыгъэнымкIэ гъэхъэгъакIэхэр ашIынхэу афэлъэIуагъ, IэпэIэсэныгъэшхоу ахэлъым, опытэу яIэм, яIоф зэрэфэшъыпкъэхэм яшIуагъэкIэ ведомствэм ипшъэрылъхэр ахэм гъэхъагъэ хэлъэу зэрагъэцэкIэщтхэм ицыхьэ зэрэтелъыр къыIуагъ.

УФ-м щынэгъончъэнымкIэ и Федеральнэ къулыкъу АР-мкIэ и ГъэIорышIапIэ иIофышIэ пэрытхэм къэралыгъо, ведомствэ тынхэр Iофтхьабзэм къащыфагъэшъошагъэх. шъхьэ ипресс-къулыкъу