Гупчэхэм къахэхъуагъ
Гриппымрэ пэтхъу-Iутхъумрэ къызэуталIэхэрэр джыдэдэм Адыгеими, Урысыеми хэпшIыкIэу нахьыбэ ащыхъугъ.
Ащ епхыгъэу АР-м псауныгъэр къэухъумэгъэнымкIэ и Министерствэ рихъухьагъ Мыекъопэ къэлэ поликлиникэм иполиклиническэ отделениехэм амбулаторнэ температурнэ гупчэхэу ащызэхэщагъэхэм ахэгъэхъогъэнэу. Министерствэм къызэритыгъэмкIэ, ахэм цIыфхэм медикэ-санитар IэпыIэгъу дэгъу игъом арагъэгъотын алъэкIыщт. Температурнэ гупчэхэр мыщ фэдэ чIыпIэхэм къащызэIуахыгъэх:
— Калининым иурам тет унэу N 213-м, сыхьатыр 8-м къыщегъэжьагъэу 6-м нэс ащ Iоф ешIэ. Зыгъэпсэфыгъо мафэхэм —сыхьатыр 9-м къыщегъэжьагъэу 1-м нэс.
— урамэу Комсомольскэм тет унэу N 159-м, сыхьатыр 8-м къыщегъэжьагъэу 4-м нэс ащ Iоф ешIэ. Зыгъэпсэфыгъо мафэхэм — сыхьатыр 9-м къыщегъэжьагъэу 1-м нэс.
— поселкэу Западнэм иурамэу Новэм тет унэу N 16А-м, сыхьатыр 8-м къыщегъэжьагъэу 4-м нэс Iоф ешIэ. Зыгъэпсэфыгъо мафэхэм – сыхьатыр 9-м къыщегъэжьагъэу 1-м нэс.
— Пэтхъу-Iутхъур къяутэлIагъэу зызэгуцэфэжьхэкIэ, температурэр къыдэмыкIоягъэми пэшIорыгъэшъэу зарамыгъэтхэу ыкIи гупчэу 122-м темыохэу ащ фэдэ гупчэхэм зафагъэзэн алъэкIыщт, — къыщаIуагъ АР-м псауныгъэр къэухъумэгъэнымкIэ и Министерствэ.
Пэтхъу-Iутхъумрэ гриппымрэ агъэгумэкIыхэрэм япчъагъэ зэрэхэхъуагъэм дакIоу менингококковэ инфекцие зы нэбгырэ горэм къыхагъэщыгъ. А бзылъфыгъэм стационарым щеIазэх. Адыгэ республикэ инфекционнэ сымэджэщым ащ фэгъэхьыгъэу къыщаIуагъ. Джащ фэдэу коронавирусыр къызэутэлIэгъэ сымаджэхэр АРКИБ-м къащэх. ГущыIэм пае, блэкIыгъэ тхьамафэм нэбгыри 6 ащ къащагъ.