Мыекъопэ къэзэкъ отделым хэхьэрэ къэзэкъхэм хэушъхьафыкIыгъэ дзэ операцием хэлэжьэрэ дзэкъулыкъушIэхэм, мобилизацием къыхиубытагъэхэм ыкIи ежьхэм яшIоигъоныгъэкIэ кIуагъэхэм шIушIэ IэпыIэгъоу тонни 10 хъурэр афатIупщыгъ.

Предпринимательхэм, организациехэм, Адыгэ Республикэмрэ Краснодар краимрэ арыс цIыф гукIэгъухэм ащкIэ яшIогъэшхо къагъэкIуагъ.

ДзэкIолIхэм щыгъын фабэхэр, кIы­мэфэ лъэкъопылъхьэхэр, гъомылапхъэ­хэр, Iэзэгъу уцхэр, илъэсыкIэ шIухьафтынхэр аIэкIагъэхьагъэх.

«Тэ тэшIэ мафэ къэс къинышхоу шъулъэгъурэр зыфэдэр. Тэри тянэ-тятэхэр Хэгъэгу зэошхом хэлэжьагъэх. 1945-рэ илъэсым къэралыгъо тын лъапIэхэр абгъэгу хэлъхэу ахэм къагъэзэжьыгъ. ТиухъумэкIо лъапIэ­хэр, шъори джащ фэдэу шъупсаоу къэжъугъэзэжьынэу тышъуфэ­лъаIо», — кIатхэжьыгъ Мыекъуапэ щыщ пенсионерхэу Николайрэ Надеждэрэ дзэкIолI­хэм афагъэхьыгъэ шIушIэ IэпыIэгъум гъусэ фашIыгъэ тхыгъэм.

ПсэупIэу Краснооктябрьскэм щыщ Лариса Бариновам цылъэпэд ыкIи Iалъэ 36-рэ ыхъи афаригъэщагъ. Дзэ-патриот клубэу «Застава» зыфиIорэм иIоф­шIэн анахь чанэу хэлажьэхэрэм ащыщэу Валерия Гущинам къалэу Новодружескэ щыщ кIэлэцIыкIухэм афаригъэщэгъэ къэмланым IэшIу-IушIухэр, шIухьаф­тын цIыкIухэр дэлъых, тхыгъэ цIыкIоу ахэм гъусэ афишIыжьыгъэм мырэущтэу къыщеIо: «О лъэхъэнэ къин узщыпсэурэр, ау сэ лъэшэу сицыхьэ телъ шIэхэу ащ гъунэ зэрэфэхъущтым. Угу умыгъэкIод, Тхьэм псауныгъэ къыует».

ШIушIэ IэпыIэгъур автомобили 4-мэ арылъыгъ, купым ипэщагъэр Мыекъопэ къэзэкъ отделым иатаманэу Александр Даниловыр ары.

Новодружескэ щыпсэухэрэм заIо­кIэхэм мырэущтэу къараIуагъ: «ЩтыргъукI хъугъэ, тфэу зэтет унэхэр чъыIэх. Шъхьэзакъоу псэухэрэр ахэм чъыIэ арэлIыхьэх. Гази, свети щыIэп. Дзэкъу­лыкъушIэхэр зыщэIэхэм шхын горэхэр къытIэкIагъахьэщтыгъэх. Джы ахэр щыIэхэпышъ, цIыфхэр чъыIэм естых».

Мыекъопэ къэзэкъ отделыр шIушIэ IэпыIэгъум къыхэлэжьэгъэ пстэуми инэу афэраз. ЗэкIэ къаугъоигъэр аIэкIагъэ­хьагъ. ШIушIэ IэпыIэгъур лъэкIуатэ.

Екатерина Загорулько.