Адыгеим и ЛIышъ­хьэу КъумпIыл Мурат я 419-рэ дзэ госпиталым икъутамэу N 3-м щыIагъ.

ХэушъхьафыкIыгъэ дзэ операциер зыщыкIорэ шъолъырхэу ДНР-м, ЛНР-м, Украинэм къаращыгъэхэу контрактым те­гъэпсыхьагъэу къулыкъур зы­хьыхэрэри ащ чIэлъхэм ахэтых.

Республикэм и ЛIышъхьэ зипсауныгъэ зыпкъ рагъэуцо­жьырэ дзэкIолIхэм гущыIэгъу афэхъугъ, ахэм япсауныгъэ изы­тет ыкIи яфэныкъоныгъэхэм защигъэгъозагъ. Медицинэм иIофышIэхэм ыкIи республикэм щыпсэурэ цIыф гумэкIылэхэу дзэкIолIхэм IэпыIэгъу афэхъу­хэрэм зэрафэразэхэр ахэм къаIуагъ. ЗэдэгущыIэгъум илъэхъан дзэкIолIхэр КъумпIыл Мурат къелъэIугъэх япалатэхэм телевизорхэр къафычIагъэуцонхэу. Республикэм и ЛIышъхьэ ащкIэ пшъэрылъ гъэнэфагъэхэр афи­шIыгъэх.

ТапэкIэ Адыгэ Республикэм и Къэралыгъо Совет — Хасэм идепутатхэм кондиционер 30-м ехъу, реанимацием щагъэфе­дэщт ошэкурхэр ыкIи нэмыкIхэр къащэфхи сымэджэщым фащэгъагъэх. Ащ нэмыкIэу Адыгэ Республикэм псауныгъэм икъэу­хъумэнкIэ и Министерствэ, республикэм и ЛIы­шъхьэ пшъэрылъ къызэрэфи­шIыгъэм тетэу, Мыекъопэ къутамэм IэпыIэгъу фэхъу медицинэ уплъэкIунхэр зэхэщэгъэнхэмкIэ, ящыкIэгъэ пкъыгъохэр, Iэзэгъу уцхэр IэкIегъахьэх.

Партиеу «Единэ Россием» ишъолъыр къутамэ хэтхэм дзэ­кIолIхэу сымэджэщым чIэлъхэм гъомылапхъэхэр ыкIи IэшIу­-IушIухэр къаIэкIагъэхьагъэх.

Адыгеим и ЛIышъхьэ пшъэ­рылъ зэрафишIыгъэм тетэу зипсауныгъэ зыпкъ изыгъэуцожьхэрэм агу къыдащэеным пае медицинэ учреждением къыпэIулъ чIыпIэр зэтырагъэ­псыхьэ: асфальткIэ щагур агъап­кIэ, тетIысхьапIэхэр ашIых, джащ фэдэу тэрэзэу къэгъэнэфыгъэным епхыгъэ Iофыгъо-хэри зэшIуахых. Мы мэфэ благъэхэм псэолъэшIхэм IофшIэнхэр аухынхэу ары.

«КIалэхэм къэралыгъом ыпа­шъхьэ пшъэрылъэу щыряIэхэр дэгъоу агъэцэкIагъэх, мамыр цIыфхэм якъэухъумэнкIэ зы­шъхьасыжьыгъэхэп, ахэм тэрэзэу тынаIэ атетыныр къалэ­жьыгъэ шъыпкъ.

Урысыем и Президентэу Владимир Путиным шъолъырхэм апашъхьэ пшъэрылъ къыщигъэуцугъ амал зэриIэу тидзэкIолIхэм тишIуагъэ нахь дэгъоу ядгъэкIынэу. Ащ пае Адыгеим федеральнэ ыкIи шъолъыр Iофтхьабзэхэр щы­зэрахьэх, мобилизацием къыхиубытагъэхэм, гуфакIохэм, кон­т­рактым тетэу къулыкъур зыхьыхэрэм ыкIи ахэм яуна­гъохэм арысхэм IэпыIэгъу афэ­хъух. Япшъэрылъ агъэцакIэзэ уIагъэ зытелъ хъугъэхэми тынаIэ атедгъэтыщт, IэпыIэгъу тафэ­хъущт», — къыIуагъ КъумпIыл Мурат.

АР-м и ЛIышъхьэ ипресс-къулыкъу