ЦIыфхэм ящынэгъончъагъэ ыкIи щэфакIохэм яфитыны­гъэхэр къэухъумэгъэнхэмкIэ Федеральнэ къулыкъум икъу­тамэу Адыгэ Республикэм щыIэм къызэритырэмкIэ, не­пэрэ мафэм Адыгеим пэт­хъу-Iутхъур, гриппыр ыкIи нэмыкI зэпахырэ респираторнэ узхэр къызэолIагъэхэм япчъа­гъэ эпидемиологие гъу­нап­къэм процент 68-кIэ шIо­кIыгъ.

БлэкIыгъэ тхьамафэм мыщ фэдэ иуахътэ егъэпшагъэмэ, къэсымэджагъэхэм япчъагъэ фэдитIу хэхъуагъ. «Свиной грипп» зыфаIоу H1N1-р тхьамафэм къыкIоцI къызэолIагъэр нэбгырэ 44-рэ. Ковид хъугъэр нэбгырэ 36-рэ, а пчъагъэр блэкIыгъэ тхьамафэм мыщ фэдэ иуахътэ егъэпшагъэмэ, процент 16,3-кIэ нахь макI.

Пэтхъу-Iутхъур, зэпахырэ рес­пираторнэ узхэр жъугъэу кIэлэеджакIохэм къахэхьагъ, сымаджэхэрэм япчъагъэ хэхъо.

Гъэсэныгъэмрэ шIэ­ныгъэмрэкIэ Адыгэ Рес­пуб­ликэм иминистрэ игуадзэу Пэрэныкъо ­Сусанэ тызэрэщигъэгъозагъэмкIэ, непэрэ мафэм ехъулIэу респуб­ли­кэм игурыт еджапIэмэ ащеджэрэ кIэлэеджэкIо нэбгырэ мини 8202-рэ зэпэчыжьэ егъэ­джэным ишапхъэхэм атырагъэ­хьагъ. Адыгеим иеджэпIэ 25-мэ ахэхьэрэ класси 171-рэ а шIыкIэм те­хьагъэх. КiэлэеджакIоу ахэм ащеджэхэрэм япчъа­гъэ зэрэхъурэр нэбгырэ мини 4247-рэ. Зэрэщытэу зэпэчыжьэ егъэджэным техьэгъэ еджапIэхэри щыIэх, ахэр 8 мэхъух: Мыекъопэ ли­цееу N 35-р, Адыгэкъалэ игурыт еджапIэу N 1-р, Кощхьэблэ районым игурыт еджапIэхэу N 1-р, N 5-р, N 6-р, Джэджэ районым иеджапIэхэу N 2-р ыкIи N 3-р, Шэу­джэн районым игурыт еджапIэу N 3-р. ЗэкIэмкIи ахэр зэрэ­хъурэр клас­си 187-рэ, кIэлэ­еджэ­кIо мини 3955-рэ ащеджэ.

Классхэр къызэрикъу­жьыхэрэм, кIэлэеджакIоу хъужьыхэрэм япчъагъэ зэрэхэхъожьырэм ялъытыгъэу, зэпэчыжьэ егъэ­джэным къыхэкIыжьынхэм иунашъо ежь еджапIэхэм япащэхэм ашIы. Зэпахырэ узхэр къызэузыхэрэм ахэмыхъоным фэшI гурыт еджапIэхэм санитарнэ-гигиеническэ шапхъэхэр щагъэцэкIэнхэм нахь гъэлъэшыгъэу анаIэ тырагъэтынэу министерствэм иIофышIэ- хэм еджэпIэ пащэхэм афагъэ­пытэ.

Тэу Замир.