IофшIэн зимыIэхэу ыкIи ащ лъыхъухэу Адыгеим щыпсэухэрэм ащыщхэр проектэу «Социальнэ зэзэгъыныгъ» зыфиIорэм хэлэжьэнхэ амал яI.

Гъот макIэ зиIэхэу IофшIэн лъыхъухэрэм социальнэ IэпыIэгъоу аратырэм изы лъэныкъоу мыр щыт. Унагъохэм IофшIэпIэ чIыпIэхэр, сэнэхьат гъэсэныгъэ тедзэхэр ягъэгъотыгъэнхэмкIэ, ежьхэм яIоф къызэIуахынымкIэ ыкIи унэе хъызмэтшIапIэ агъэ­псынымкIэ хэбзэ къулыкъухэр IэпыIэгъу афэхъух.

АР-м и ЛIышъхьэу КъумпIыл Мурат къызэрэхигъэщырэмкIэ, мыщ фэдэ IэпыIэгъум респуб­ликэм бэу къыщыкIэупчIэх. ИлъэситIукIэ узэкIэIэбэжьмэ социальнэ зэзэгъыныгъэмкIэ унэгъо 51-мэ IэпыIэгъу арагъэ­гъотыгъэмэ, мыгъэ ахэм япчъа­гъэ 714-рэ мэхъу.

— Социальнэ зэзэгъыныгъэм къыдилъытэрэ IэпыIэгъур лъыдгъэкIо­тэнэу къэралыгъом и Президент пшъэрылъ къытфишIыгъ. Гъэтхапэм и 1-м ыуж IофшIэпIэ чIыпIэ чIэзынагъэ­хэм ыкIи ахэм яуна­гъохэм IэпыIэгъу та­фэхъуным зэрэтфэлъэ­кIэу тыпылъ, — къы­Iуагъ КъумпIыл Мурат.

ЛIышъхьэм къызэрэхигъэщыгъэмкIэ, мы илъэсым сомэ миллион 90-рэ социальнэ зэзэгъыныгъэм игъэцэкIэн пэIуагъэ­хьагъ. ЗэкIэмкIи нэбгырэ 700-мэ мыщ фэдэ зэзэгъыныгъэхэр адашIыгъэх. Мыр бгъэпсыным пае IофшIэнымкIэ ыкIи цIыфхэр социальнэу къэухъумэгъэнхэмкIэ Гупчэм зыфэбгъэзэн фае.

IэпыIэгъоу къатыхэрэм социальнэ зэзэгъыныгъэр зэратекIырэр цIыфым ежь-ежьырэу зи­- I­ы­гъыжьын амал зэрэритырэр ары. Мыщ къыдыхэлъытэгъэ ахъщэр зыпэIубгъэхьащтыр гъэ­нэфагъэ. Ахэм ащыщ унэе бизнес гъэпсыгъэныр (зэтыгъоу сомэ 250000-рэ унагъом къыраты). Непэ унэе хъызмэт зепхьаныр псынкIэп, арышъ, сыд фэдэрэ ахъщэ IэпыIэгъуи ишIогъэшхо къэкIо.

КъызэкIагъэкIожьынэу щымыт социальнэ IэпыIэгъур къызфигъэфедагъ Нэшъукъуае щыщ УдыкIэко Нуриет. Ащ иунэе IофшIапIэ къызэIуихыным пае сомэ мин 250-рэ къыратыгъ. Торт зэмылIэужыгъохэр, тхьацум хэшIыкIыгъэ шхыныгъохэр зыщишIыщт ыкIи зыщыIуигъэ­кIыщт шхэпIэ цIыкIоу Пэнэжьы­къуае дэтыр бэджэндэу ыштагъэу мэзищ хъугъэу егъэлажьэ.

Нуриет къызэрэтфиIотагъэмкIэ, инэIуасэхэм мы программэмкIэ ахъщэ IэпыIэгъу къаратыгъэу зызэхехым, ежьыри мыщ хэлэжьэнэу рихъухьагъ. ЫпэкIэ бзылъфыгъэ ныбжьыкIэм ышIырэ тортхэм яIэшIугъэ икъоджэгъухэм зэлъашIагъэу иунэ исэу афишIыщтыгъ. «Оуиеу IофшIапIэ къызкIызэIумыхырэр» аIозэ инэIуасэхэм бэрэ къыраIо­щтыгъ. Апэ мылъкоу хилъхьащтыр шIуа­бэу тIэкIу тещыныхьэщтыгъ, арэу щытми, гу тыри­шIыхьи, социальнэ IэпыIэгъум ипрограммэ хэлэжьагъ. АщкIэ афэраз IофшIэнымкIэ ыкIи цIыфхэр социальнэу къэухъу­мэгъэнхэмкIэ Гупчэм иIофы­шIэхэм. Социальнэ зэзэгъыныгъэ ади­шIы­ным пае шап­хъэу щы­Iэхэм ыкIи ыгъэ- цэкIэн фаехэм специалистхэм ща­гъэгъозагъ. Бзылъфыгъэ ныбжьыкIэм IэпыIэ­гъоу къыратыгъэ сомэ мин 250-р къызфигъэфеди IофшIапIэр зычIэтыщтыр бэджэндэу къы­штагъ, ищыкIэгъэщтхэр зэригъэ­гъотыгъэх. Шап­хъэ­хэм адиштэу ахъщэр зэригъэфедагъэр зэрыт тхьапэр Гупчэм рихьылIэжьыгъ.

— Социальнэ зэзэгъыныгъэм ишIуагъэ къысэ­кIыгъ. Мыр зэтыгъо IэпыIэгъу къодыеп, Iоф­шIэным хэплъхьан плъэ­кIыщт. БэшIагъэу бизнес згъэпсын гухэлъ сиIагъ. IэпыIэгъум кIуачIэ къысити, сигухэлъхэм ауж сихьагъ, — еIо предприниматель ныбжьыкIэм.

УдыкIэко Нуриет Нэшъукъое гурыт еджапIэр къызеухым, Пшызэ социальнэ-экономическэ институтым бухгалтер сэнэхьатым илъэси 6-рэ щеджагъ, зэригъэгъотыгъ ау ащ Iоф ришIагъэп.

— Мы сэнэхьатым сырылэ­жьэнэу сыгу зы мафи къыфыдэчъыгъэп, — къеIуатэ Нуриет. — А лъэхъаным пщэрыхьаныр сикIасэу, тортхэр сшIыщтыгъэх. ИнстаграмымкIэ цIыфхэр къысфатхэхэзэ къызыкIэлъэIухэрэр афэсшIыщтыгъ ыкIи дэгъоу ащэфыщтыгъ. Джащ фэдэу тхьацум хэшIыкIыгъэ «венскэкIэ» заджэхэрэ гъэжъэгъэ зэмылIэ­ужыгъохэм яшIын зезгъэсэ­нымкIэ Краснодар щыкIогъэ мастер-классым сыхэлэжьагъ. Нэужым згъажъэхэрэм ахэзгъэхъуагъ. Мы мафэхэм торт зэмылIэужыгъохэр, джащ фэдэу «венскэ» зыцIэ гъэжъагъэхэр, нэмыкIхэри кафем щысэшIых ыкIи къоджэдэсхэм дэгъоу ащэфых. Гъэжъагъэхэм анэмыкIэу шхапIэм кофе щешъох, ар бэмэ ашIогупсэфэу къэкIох.

Нуриет къызэриIуагъэмкIэ, ыупщэрыхьэрэм хилъхьэхэрэм ядэгъугъэ уехъырэхъышэнэу щытэп. Ащ зэрилъытэрэмкIэ, лъэшэу уемыгугъумэ, бгъажъэ­рэр IашIу хъущтэп. ПшIырэр агу римыхьы хъумэ, цIыфхэм уипро­дукцие ащэфыщтэп. Иунэе Iоф­шIапIэ зигъэлажьэрэр мэзищ нахь мыхъугъэми, зыкъыгъэ­шъып­къэжьыгъэу Нуриет елъытэ.

— ШхапIэр зыдэщытыр чIыпIэ дэгъу, цIыфхэр бэу щызэблэкIых. IофшIэныр зедгъэ­жьагъэм иапэрэ мафэ къыщыублагъэу шхапIэм федэ къыхьэу ригъэжьагъ. IэпыIэгъум изэгъэгъотынкIэ яшIуагъэ къызэрэсагъэкIыгъэм фэшI Гупчэм иIофышIэхэм сафэраз, — къыIуагъ Нуриет.

Нуриет янэу Аминэт ыкIи ятэу Исмахьилэ щэн-щэфыным пылъхэу Нэшъукъуае Iоф щашIэ. Зы шыпхъу нахьыкIэ иI, ащ сабыйхэр епIух.

Бзылъфыгъэ ныбжьыкIэм тапэкIэ Адыгэкъалэ, Краснодар ежь иеу IофшIэпIэ чIыпIэхэр ащигъэпсынхэ гухэлъ иI. Ригъэ­жьэгъэ Iофыр лъигъэкIотэнэу, ренэу ащ федэ къыфихьынэу Нуриет тыфэлъаIо.

КIАРЭ Фатим.