АР-м и ЛIышъхьэ министрэхэм я Кабинет унашъо фишIыгъ ИлъэсыкIэ мэфэкIым ехъулIэу кIэлэцIыкIухэм апае Iофтхьабзэхэр республикэм щызэхащэнхэу, шIухьафтынхэр афагъэхьазырынхэу.

Хабзэ зэрэхъугъэу, а 1 — 4-рэ классхэм арыс кIэлэеджэкIо цIыкIухэм IэшIу-IушIу шIухьафтынхэр аратыщтых. АР-м и ЛIышъхьэ къызэриIуагъэмкIэ, мы илъэсым ащ фэдэ шIухьафтынхэр Адыгеим ынаIэ зытыригъэтырэ Геническэ районым щыпсэурэ кIэлэцIыкIуми афагъэхьыщтых, Херсон хэкум къикIыжьыгъэ сабыйхэми аратыщтых.

— ИлъэсыкIэр къэсынкIэ тхьамафитIум тIэкIу къехъоу къэнагъ. Мы мэфэкIым анахьэу ежэхэрэр сабыйхэр ары, ахэр дгъэгушIонхэм амалэу тиIэр зэкIэ етхьылIэщт. МэфэкIыр кIэлэцIыкIухэм зэхашIэным тыпылъыщт, Iофтхьэбзэ зэфэшъхьафхэр афызэхэтщэщтых, Къэралыгъо филармонием къэ­гъэлъэгъонхэр, шIушIэ акциеу «Елкэм игухэлъы­шIухэр» зыфиIорэр щыредгъэкIокIыщтых, — къы­Iуагъ КъумпIыл Мурат.

Зипсауныгъэ къыщыкIагъэхэр, сэкъатныгъэ зиIэхэр, унэгъо Iужъумэ, гъот макIэ зиIэ унагъомэ арыс сабыйхэри Iахьынчъэу къагъанэхэ зэрэмыхъущтыр АР-м и ЛIышъхьэ пшъэрылъэу къыгъэнэфагъ.