Хабзэ зэрэхъугъэу, Адыгеим икъэлэ шъхьаIэ зэнэкъокъу зэхещэ, ар щапIэ ыкIи цIыфхэм фэIо-фашIэхэр зыщапагъохырэ чIыпIэхэр ИлъэсыкIэм ехъулIэу мэфэкI шIыкIэм тетэу зэрэзэIыхыгъэщтхэм фэгъэхьыгъэщт.

Тучанмэ ягъэлъэгъуапIэхэр, щэпIэ кIоцIхэр, цIыфхэм яфэIо-фашIэхэр зыщагъэцакIэхэрэр ИлъэсыкIэ мэфэкIым диштэу зэрагъэкIэрэкIагъэхэм комиссием уасэ фишIыщт. ТекIоныгъэ зыфагъэшъошэщтхэр къыхэхыгъэнымкIэ анахьэу анаIэ зытырадзэщтхэр чIыпIэр зэрэзэпагъэнэфыгъэр, шIыкIэ шъхьафэу къыхахыгъэр, гъэлъэгъуапIэхэр агъэкIэракIэхэ зэхъум къыхагъэщыгъэ лъэныкъохэр, унэ гупэр, чIэхьапIэр ыкIи ащ къыпэIулъ шъолъырыр къызэрахэщырэр ары.

ТекIоныгъэ зэрафагъэшъошэщт лъэныкъохэр:

— зырызыщэ сатыум иорганизациехэр;

— общественнэ гъэшхэным пылъ организациехэр;

— цIыфмэ яфэIо-фашIэхэр зыгъэцэкIэрэ организациехэр.

Зэнэкъокъум хэлажьэ зышIоигъомэ къалэу Мыекъуапэ иадминистрацие предпринимательствэм хэхъоныгъэ егъэшIыгъэнымкIэ ыкIи бэдзэрхэмкIэ и ГъэIорышIапIэ тхылъхэр электроннэ почтэу torgmay@mail.ru зыфиIорэм тыгъэгъазэм и 25-м нэс ратынхэ алъэкIыщт.

ИлъэсыкIэ мэфэкIхэм ауж зэнэкъокъум зэфэхьысыжьхэр фашIыщтых. Гур къыдищаеу мэфэкIыр зэхязыгъэшIэщтхэм уасэ зиIэ шIухьафтынхэр аратыщтых.