Къыблэ шъолъыр дзэ хьыкумэу Ростов-на-Дону щыIэм Адыгэ Республикэм щыщ Ф.У. Жураевыр ыгъэмысагъ.

Егъэзыгъэ IофкIэ амыдэрэ организацием цIыфхэр хищэзэ террористическэ нэшанэ зиIэ бзэджэшIагъэ зэрахьан гухэлъ зэриIагъэм, джащ фэдэу терроризмэм хэщэгъэ цIыфхэр уIэшыгъэнхэмкIэ ыкIи ащ фэгъэ­хьазырыгъэнхэмкIэ мылъкукIэ IэпыIэгъу зэрафэхъущтыгъэм, террористическэ нэшанэ зиIэ бзэджэшIагъэ зэрахьанхэм къы­зэрэфаджэщтыгъэм, къэбар жъугъэм иамалхэр, анахьэу Интернетым изэпхыныгъэхэр къызфигъэфедэхэзэ террориз­мэр пропагандэ зэришIыщты­гъэм, амыдэрэ организациеу ар зыхэтыр УФ-м ихэбзэгъэуцугъэ тер­рористическэу зэри­лъы­тагъэр зэрэщигъэзыягъэм къа­хэкIэу хъулъфыгъэр агъэмысэ.

ЗэрагъэунэфыгъэмкIэ, 2020-рэ илъэсым шышъхьэIум къыщегъэжьагъэу чъэпыогъум нэс амыдэрэ дунэе террористическэ организациеу (МТО) «Катиба Таухид Валь-Джихад» зыфи­Iорэм хэтэу ИнтернетымкIэ мы организацием хэтхэм адэгущыIагъ, 2020-рэ илъэсым къалэу Волгоград щыщхэр организацием хищэнхэу пылъыгъ.

2020-рэ илъэсым иIоныгъо къыщегъэжьагъэу чъэпыогъум нэс мызэу, мытIоу шъолъырым щыпсэухэрэм зэдэгущыIэгъухэр адишIыгъ, террористическэ организацием зэрихьэрэ Iофтхьабзэхэр шIотэрэзэу цIыфхэр хищэным ар къыфэджагъ.

Ащ нэмыкIэу, диным инэшанэхэмкIэ егъэзыгъэ Iоф зы­хэлъ зекIокIэ дэйхэр къизыIотыкIырэ видеотехыгъэр шIотэрэзэу, джащ фэдэу экстремистскэ ыкIи террористическэ организацием хищэным къыфэджэрэ аудиотетхагъэр Интернетым къыригъэхьагъэх.

Хьыкумым ышIыгъэ унашъом къыпкъырыкIыхэзэ Ф. У. Жураевым лажьэ иIэу алъытагъ ыкIи зэкIэмкIи илъэс 12 хьапс тыралъхьагъ: илъэси 3-рэ мэзи 6-м хьапсым, адрэ илъэси 8-рэ мэзи 6-м пхъашэу зыщагъэпщынэхэрэ хьапсым дэсыщт.

Унашъом кIуачIэ иIэ хъугъэ.

ЩынэгъончъэнымкIэ федеральнэ къулыкъум и ГъэIорышIапIэу АР-м щыIэм ипресс-къулыкъу