КъэбарлъыгъэIэсыныр къэухъумэным и Дунэе мафэ ехъулIэу цифровой гъэсэныгъэмкIэ Гупчэу «IT-куб. Адыгея» зыфиIорэм кIэлэеджакIохэр рагъэблэгъагъэх. «Цифровое Доверие» зыцIэ платформэр къызфагъэфедэзэ киберщынэгъончъэным ылъэныкъокIэ упчIэхэр ащ къыщаIэтыгъэх.

Цифрэм ылъэныкъокIэ шIэныгъэу аIэкIэлъхэм ахэгъэхъогъэныр ары пшъэрылъ шъхьаIэу зэхэщакIохэм зыфагъэуцужьыгъэр. Гъэсэныгъэ программэр очнэ ыкIи заочнэ шIыкIэм тетэу кIуагъэ. «IT-куб. Адыгея» зыфиIорэм зишIэныгъэхэм ащыхэзыгъэхъорэ кIэлэеджа­кIохэр ыкIи кIэлэегъаджэхэр ары гъэсэныгъэ Iоф­тхьабзэм хэлэжьагъэхэр.

Лъэныкъо зэфэшъхьафхэм афэгъэхьыгъэ материалхэр платформэм къыщыбгъотынхэ плъэкIыщт. ДжэгукIэ шIыкIэм тетэу кIэлэцIыкIухэм егъэджэнхэр афызэхащагъэх, ИнтернеткIэ зэрэзэдэгущыIэхэрэм, нэбгырэ пэпчъ фэгъэхьыгъэ къэбарэу ащ къихьэхэрэр къэухъумэгъэнхэ зэрэфаем тегущыIагъэх. Джащ фэдэу сайт нэпцIхэр къызэрэпшIэщтхэр, хакерхэм уафэса­къын зэрэфаер ыкIи киберщынэгъончъэным ылъэны­къокIэ гумэкIыгъоу къэуцухэрэр гупчэм икIэлэегъа- джэу Сергей Коцур къэзэрэугъоигъэхэм къафиIотагъ.

Лъэпкъ проектэу «Гъэсэныгъэм» ифедеральнэ проектэу «Цифровая образовательная среда» зыцIэм къыдыхэлъытагъэу Адыгеим гъэсэныгъэ платформэу «Цифровое Доверие» зыфиIорэр щызэхащэ. Урокым изэхэщэн ипартнер хъугъэ «Альянс по защите детей в цифровой среде» зыфиIорэр. Интернет щынэгъончъэным ылъэныкъокIэ урысые компании 9 ащ зэрипхыгъ.

Шъугу къэдгъэкIыжьын, федеральнэ проектэу «Цифровая образовательная среда» зыфиIорэр Урысыем просвещениемкIэ и Министерствэ 2019-рэ илъэсым къыщегъэжьагъэу зэхищагъ. Гъэсэныгъэ организациехэм цифрэм ылъэныкъокIэ яамалхэм ахэгъэхъогъэным ар фэIорышIэ. Проектым къызэрэщыдэлъытагъэу, организациехэм аужырэ шапхъэхэм адиштэрэ Iэмэ-псымэхэр ачIагъэуцуагъэх. Мы лъэныкъор чанэу зэрэзэшIуахырэм къыхэкIыкIэ 2024-рэ илъэсым нэс цифровой гъэсэныгъэм епхыгъэ «IT-куб» 340-рэ Урысыем ичIыпIэ зэфэшъхьафхэм къащызэIуахыщт.

НэкIубгъор зыгъэхьазырыгъэр ДЕЛЭКЪО Анет.