Адыгеим искусствэмкIэ иеджапIэхэм якIэлэегъаджэхэр я ХII-рэ республикэ зэнэкъокъум хэлэжьагъэх.

Республикэм икъэралыгъо программэу культурэм хэхъоныгъэ ышIыным фэгъэ­хьыгъэм кIэлэегъаджэхэм яIэпэIэсэныгъэ къыщагъэлъэгъуагъ. Адыгэ Респуб­ликэм культурэмкIэ и Министерствэрэ АР-м искусствэмкIэ икIэлэцIыкIу еджапIэу N 1-м методикэмкIэ игупчэрэ кIэщакIо Iофтхьабзэм фэхъугъэх.

— Живописым, бгъэфедэн плъэкIыщт искусствэм кIэлэегъаджэхэр щызэнэкъо­къугъэх, — къыIуагъ зэхэщэкIо купым хэтэу Татьяна Горда. — КIэлэегъэджэ 44-мэ яIофшIэгъи 128-рэ къэтэгъэлъагъо.

Адыгэ Республикэм исурэтышIхэм я Союз ипащэу Елена Абакумовар, Къо­кIыпIэм щыпсэурэ лъэпкъхэм яискусствэкIэ Къэралыгъо музеим и Темыр- Кавказ къутамэ ипащэ игуадзэу Сулейманова Фатимэ осэшIхэм яIофшIагъэ зэфахьысыжьыгъ. ЗэхэщакIохэм ацIэкIэ хагъэунэфыкIырэ чIыпIэхэр къыдэзыхыгъэхэм афэгушIуагъэх, щытхъу тхылъхэр аратыжьыгъэх.

Адыгэ Республикэм инароднэ сурэтышIэу Хъуажъ Рэмэзан пхъэм хишIыкIы­гъэ лагъэхэр дахэх. Нарт Саусэрыкъо машIор къызэрихьыжьырэр сурэтым къыхэщы. Ольга Бреславцевам гобеленым хидыкIыгъэ IофшIагъэр бжыхьэм, пшъашъэм игупшысэ щыIэныгъэм щыпхы­рищыным зэрэфэхьазырым афэгъэ­хьыгъ.

Кощхьаблэ искусствэмкIэ икIэлэцIыкIу еджапIэу М. Хьагъэуджым ыцIэ зыхьырэм икIэлэегъаджэу Тутарыщ Еленэ Лэгъо-Накъэ гъэмафэм теплъэу иIэр исурэт къыщегъэлъагъо. Шъо зэфэшъхьаф­хэр къекIоу зэригъэфедагъэхэм IофшIагъэр къагъэбаигъ.

ИскусствэмкIэ Инэм икIэлэцIыкIу еджапIэ икIэлэегъаджэу Мария Кулатевам зэнэкъокъум апэрэ чIыпIэр къыщыдихыгъ. Адыгеим икъушъхьэхэр дахэх. Ошъогур, къушъхьэтхыр, къушъхьэ лъапэр зэдиштэхэу сурэтыр гъэпсыгъэ. Тыгъэм инэбзыйхэм янэфынэ шъабэу къушъхьэм къытепсэ.

— Адыгеим ичIыгу, икъушъхьэхэм язэпхыныгъэхэр сурэтым къыщызгъэлъа­гъохэ сшIоигъуагъ, — къытиIуагъ Мария Кулатаевам.

Светлана Лешинам, Анна Керн, Абрэдж Гощэфыжь, нэмыкIхэу щытхъу тхылъхэр къызыфагъэшъошагъэхэм къы­таIуагъ зэнэкъокъум хэлажьэхэзэ неущрэ мафэм фэгъэхьыгъэ гупшысэхэр зэрашIыгъэхэр.

Адыгеим инароднэ сурэтышIэу Гъогунэкъо Мухьарбый къэгъэлъэгъоным игуапэу еплъыгъ. КIэлэеджакIохэр бэ хъухэу зэхахьэм зэрэхэлэжьагъэхэм, кIэлэегъаджэхэм яIофшIагъэ щыIэны­гъэм зэрепхыгъэм мэхьэнэ ин яIэу ылъытагъ.

Сахьидэкъо Нурбый. Сурэтхэм арытхэр: Светлана Лешинар, Анна Керн, Мария Кулатаевар.