Пандемием зыщыпэуцужьыщтыгъэхэ лъэхъаным коронавирусым ыпкъ къикIыкIэ зидунай зыхъожьыгъэ врачхэм яIахьылхэм республикэм икъэралыгъо тынхэр защаратыжьыгъэ Iофтхьабзэ АР-м и Правительствэ зычIэт унэм тыгъуасэ щыкIуагъ.

Адыгеим и ЛIышъхьэу КъумпIыл Мурат медицинэ IофышIэхэу зышъхьамысыжьэу зипшъэрылъ зыгъэцэкIагъэхэм яунагъохэм арысхэм зафигъэзагъ. Рес­публикэм ипащэ зэрэхигъэунэфыкIыгъэм­кIэ, псауныгъэм икъэухъумэнкIи, экономикэмкIи, Адыгеим исхэмкIи пандемиер ушэтыпIэшхоу щытыгъ. Медицинэ Iофы­шIэхэм япсэемыблэжьыныгъэ, яIэпэIэсэныгъэ, яIоф зэрэфэшъыпкъэхэм бэдэд ялъытыгъагъэр.

«Тиврачхэмрэ медицинэ сестрахэм­рэ чэщи мафи шъолъыр плъыжьым зэрэщылажьэщтыгъэхэр, ягупсэхэр алъэ­гъунэу ахэм амал зэрямыIагъэр зэкIэми дэгъоу къэтэшIэжьы. IэпыIэгъу псынкIэм ибригадэхэм, рентгенолаборантхэм, студент волонтерхэм яшъып­къэу Iоф зэрашIэщтыгъэр тыгу къэкIы­жьы. Апшъэ бэдэдэ зэрэдафэщтыгъэм нэмыкIэу, ящыIэныгъи, япсауныгъи ямыгупшысэхэу, ахэм япшъэрылъ хьа­лэлэу агъэцэкIагъ. Ащ фэдэ цIыф шIа­гъохэм, IэпэIасэхэм яшIуагъэкIэ чIыпIэ къиным тыкъикIыжьын тлъэкIыгъ.

Мафэ къэс сымаджэхэм ахэтхэм уз­хэм ащаухьаныр къин мэхъу. Пандемием илъэхъан Адыгеим имедицинэ IофышIэ мини 3,5-м ехъумэ коронавирусыр къяузыгъ, 18-мэ ядунай зэра­хъожьыгъэр гукъэ­ошхоу щыт. Тэри, ти­медицини чIэнэгъэшхо тфэхъугъ. Уигупсэ идунай зихъожьыкIэ гууз-лыузэу зэхапшIэрэр птезыхын зылъэ­кIыщт гущыIэ щыIэп. Ау сэ къасIомэ сшIоигъор тиврачхэм лIыгъэу къахэфа­гъэр егъашIи зэрэтщымыгъупшэщтыр ары. Зидунай зыхъожьыгъэ врачхэм зэрэцIыф, зэрэIэпэIэсэ шъыпкъэхэр къагъэлъэгъуагъ. Тэ ахэм тарэгушхо», — къыIуагъ КъумпIыл Мурат.

АР-м и ЛIышъхьэ лIыгъэ зезыхьэгъэ врачхэм ацIэ къыри­Iуагъ. Ахэр республи­кэ клиникэ сы­мэджэщым иото­риноларин­гологическэ отделение ипащэу, иврач-ото­риноларингологэу Боджэкъо Адам, Мыекъопэ къэралыгъо технологическэ университетым IэзэнымкIэ ифакультет идеканэу Хьатхъохъу Майе, медицинэ IэпыIэгъу псынкIэмкIэ ыкIи тхьамыкIагъо­хэм ахэфагъэхэм медицинэ IэпыIэгъу ягъэгъотыгъэнымкIэ Адыгэ республикэ гупчэм ипащэу, иврачэу Олег Черниковыр ары. Коронавирусым пэуцужьыгъэнымкIэ ахэм псэемыблэжьыныгъэшхо къызэрэзыхагъэфагъэм фэшI ядунай за­хъожь нэуж республикэм иапшъэрэ къэралыгъо тынэу медалэу «Адыгеим и Щытхъузехь» зыфиIорэр къафагъэшъошагъ.

Мыекъопэ къэлэ клиникэ сымэджэщым итерапевтическэ отделение ипащэу, иврач-терапевтэу Марина Радионовами медалэу «Адыгеим и Щытхъузехь» зыфи­Iорэр идунай зехъожь нэуж къыфагъэшъошагъ. Адыгеим и ЛIышъхьэ пшъэрылъ зэрэфишIыгъэм тетэу АР-м псауныгъэр къэухъумэгъэнымкIэ иминистрэу Мэрэтыкъо Рустем медалыр Маринэ игупсэхэм аритыжьыщт. Iофтхьабзэм икIэух республикэм ипащэ врачхэм яунагъохэм арысхэм адэгущыIагъ. КъумпIыл Мурат ахэр къы­гъэгугъагъэх якIэлэцIыкIухэм яегъэджэн­кIэ ыкIи IофшIапIэ къафэгъотыгъэнымкIэ республикэм ипащэхэр сыдигъуи IэпыIэгъу къазэрафэхъущтхэмкIэ.

АР-м и ЛIышъхьэ ипресс-къулыкъу