Урысыем и Президентэу Владимир Путиным иунашъокIэ Адыгэ Республикэм ыцIэкIэ Урысые Федерацием исена­торэу, ФедерациемкIэ Советым экономикэ политикэмкIэ и Комитет итхьаматэ игуадзэу Хъопсэрыкъо Мурат къэралыгъо тынэу Зэкъошныгъэм и Орден къыфагъэшъошагъ.

УФ-м и Президент и Администрацие ипащэ иапэрэ гуадзэу Сергей Кириенкэм ар сенаторым къыритыжьыгъ.

«Сыгу къыздеIэу сыфэгушIо Адыгэ Республикэм ыцIэкIэ Урысые Федерацием исенаторэу, ФедерациемкIэ Советым экономикэ политикэмкIэ и Комитет итхьаматэ игуадзэу Хъопсэрыкъо Мурат къэралыгъо тын лъапIэр къызэрэфагъэшъошагъэмкIэ. Хэбзэгъэуцуным ихэхъоныгъэ иIахьышхо зэрэхилъхьа­гъэм, ащ чанэу зэрэдэлэжьагъэм, илъэсыбэ IофшIэным апае ар къыхагъэщыгъ.

Хъопсэрыкъо Мурат Адыгеим ихэхъо­ныгъэ тегъэпсыхьагъэу бэ зэшIуихыгъэр ыкIи ышIэрэр, мэхьанэшхо зиIэ лъэныкъохэм – инфраструктурнэ проектхэм япхырыщын, къоджэ псэупIэхэм яхэхъо­ныгъэ, спортым IэпыIэгъу егъэгъотыгъэ­ным, студентхэм, Москва щеджэрэ тиныбжьыкIэхэр зэрахэтхэу, адэIэпыIэгъэным алъэплъэ. Хэбзэгъэуцум иIоф­шIэн иIахьышхо, зэрэхабзэу, респуб­ликэм къырихьыжьэрэ Iофыгъохэр УФ-м и Федеральнэ ЗэIукIэ ФедерациемкIэ и Совет щыпхырыкIынхэми фэгъэхьыгъ.

«Джыри зэ сыфэгушIо Хъопсэрыкъо Мурат ыкIи рэзэныгъэ гущыIэхэр фэсэгъазэх ти Адыгее пае мафэ къэс зэшIуихырэ Iофхэм афэшI!» — къащитхыгъ исоциальнэ нэкIубгъохэм Къум­пIыл Мурат.